ദുബൈ– യുഎഇയിലെ യാത്രാ സംവിധാനങ്ങളിൽ വലിയ മാറ്റങ്ങളുണ്ടാകുമെന്ന് റോഡ് ആൻഡ് ട്രാൻസ്പോർട്ട് അതോറിറ്റി അറിയിച്ചു. റമദാൻ മാസം കണക്കിലെടുത്ത് കൊണ്ടാണ് ഈ മാറ്റങ്ങൾ. പ്രവാസികൾക്ക് ഇഫ്താർ വിരുന്നുകളിൽ പങ്കെടുക്കാനും ഷോപ്പിങ്ങിനും മറ്റുമായി തടസ്സമില്ലാതെ പോകാൻ മെട്രോ, ട്രാം, പാർക്കിംഗ്, സാലിക് എന്നിവയുടെ സമയങ്ങളിൽ മാറ്റങ്ങൾ വരുത്തി.
ഇനി ഒരു മാസകാലത്തേക്ക് റെഡ് ലൈൻ, ഗ്രീൻ ലൈൻ മെട്രോ സർവീസുകളുടെ സമയം ദീർഘിപ്പിച്ചു. സാധാരണ ദിവസങ്ങളിൽ രാവിലെ 5:00 മുതൽ രാത്രി 12 വരെയും വെള്ളിയാഴ്ചകളിൽ രാത്രി 1മണി വരെയും സർവീസ് നീട്ടി. കൂടാതെ ദുബൈ ട്രാം രാവിലെ 6 മണി മുതൽ പുലർച്ചെ 1 മണി വരെയും സർവീസ് നടത്തും. ഞായറാഴ്ചകളിൽ മെട്രോ രാവിലെ 8 മണിക്കും ട്രാം 9 മണിക്കും മാത്രമേ സർവീസ് ആരംഭിക്കുകയുള്ളൂ എന്നും ആർടിഎ അറിയിച്ചു. അതേസമയം വാഹന പാർക്കിംഗ് ക്രമീകരണത്തിലും ചില മാറ്റങ്ങൾ വരുത്തിയിട്ടുണ്ട്. അതായത് ഇനി മുതൽ പണമടച്ചുള്ള പാർക്കിംഗ് സോണുകളിൽ വൈകിട്ട് 6 മണി മുതൽ 8 വരെ സൗജന്യമായി പാർക്കിങ് ചെയ്യാം. നോമ്പ് തുറന്ന് കഴിഞ്ഞതിന് ശേഷമുള്ള തിരക്ക് കുറയ്ക്കാനും കുടുംബങ്ങൾക്കൊപ്പം സമയം ചെലവഴിക്കാൻ ഈ സമയങ്ങളിലാണ് കൂടുതലായും ആളുകൾ പുറത്തിറങ്ങുന്നത് അതിനാലാണ് ഈ രണ്ട് മണിക്കൂർ സമയം സൗജന്യമാക്കാൻ തീരുമാനിച്ചത്. കൂടാതെ ഞായറാഴ്ചകളിൽ എല്ലാ പെയ്ഡ് സോണുകളിലും പാർക്കിംഗ് സൗജന്യമായിരിക്കും
എന്നാൽ മൾട്ടി ലെവൽ പാർക്കിംഗ് കെട്ടിടങ്ങളിൽ ഇത് ബാധകമല്ല. അതേസമയം സാലിക് ടോൾ നിരക്കുകളിലും സമയക്രമീകരണങ്ങൾ വന്നിട്ടുണ്ട്. രാവിലെ 9 മണി മുതൽ വൈകുന്നേരം 5 മണി വരെ തിരക്കേറിയ സമയങ്ങളിൽ 6 ദിർഹമാണ് നിരക്ക് ഈടാക്കുക. കൂടാതെ സുഹൂർ സമയത്ത് യാത്ര ചെയ്യുന്നവർക്ക് പുലർച്ചെ 2 മുതൽ രാവിലെ 7 വരെ പൂർണ്ണമായും സൗജന്യമായിരിക്കും. S’hail ആപ്പ് വഴി യാത്രക്കാർക്ക് അപ്ഡേറ്റ് ചെയ്ത ബസ് ഷെഡ്യൂളുകൾ പരിശോധിക്കാമെന്നും സമുദ്രഗതാഗത സമയം RTA വെബ്സൈറ്റിൽ ലഭ്യമാകുമെന്നും അതോറിറ്റി അറിയിച്ചു.