ദുബൈ– എമിറേറ്റിലെ പ്രധാന ആകർഷണങ്ങളിലൊന്നായ ഗാർഡൻ ഗ്ലോ സബീൽ പാർക്ക് ഗേറ്റ് മൂന്നിൽ ഉടൻ പ്രവർത്തനമാരംഭിക്കുമെന്ന് അധികൃതർ അറിയിച്ചു. ദുബൈ ഫ്രെയിമിന് സമീപത്താണ് പുതിയ സ്ഥാനം. നവീകരിച്ച ദിനോസർ പാർക്ക്, ഫാന്റസി പാർക്ക് എന്നിവയും ഗാർഡൻ ഗ്ലോയിലുണ്ടാകും. ഒരു ടിക്കറ്റിലൂടെ രണ്ടു പാർക്കുകളും സന്ദർശിക്കാമെന്നതാണ് സവിശേഷത.
ദിനോസറുകളുടെ ജീവിതവുമായി ബന്ധപ്പെട്ട് ഒട്ടേറെ സംവേദനാത്മക പ്രദർശനങ്ങളും സംഘടിപ്പിക്കും. എല്ലാ പ്രായക്കാർക്കും ഒരേപോലെ ആസ്വദിക്കാവുന്ന വിധത്തിലാണ് പുതിയ രൂപകല്പനകൾ. ഉദ്ഘാടന തീയതി, ടിക്കറ്റ് നിരക്ക് എന്നിവ സംബന്ധിച്ച വിവരങ്ങൾ പിന്നീട് അറിയിക്കും. വിസ്മയകാഴ്ചകളുടെ വർണക്കൊട്ടാരമായ ദുബൈ ഗാർഡൻ ഗ്ലോ 11-ാം പതിപ്പിനാണ് തയ്യാറെടുക്കുന്നത്. എൽഇഡി ലൈറ്റുകളിൽ നിറങ്ങൾ ഉപയോഗിച്ച് സമാനതകളില്ലാത്ത ദൃശ്യവിരുന്നാണ് ഗാർഡൻ ഗ്ലോ ഒരുക്കുന്നത്. മൃഗങ്ങൾ, പൂക്കൾ, പക്ഷികൾഎന്നിവയെല്ലാം വൈവിധ്യമാർന്ന നിറങ്ങളിലും രൂപങ്ങളിലും സന്ദർശകർക്ക് മികച്ച ദൃശ്യാനുഭവങ്ങൾ സമ്മാനിക്കും.