ദുബൈ – വാഹനങ്ങളില് നിന്നുള്ള അമിത ശബ്ദം നിയന്ത്രിക്കാന് ദുബായില് നോയ്സ് റഡാര് ശൃംഖല വികസിപ്പിക്കാനുള്ള പദ്ധതി ദുബൈ പോലീസ് പ്രഖ്യാപിച്ചു. അമിതമായ ശബ്ദമുണ്ടാക്കുന്ന വാഹനങ്ങള്ക്ക് 2,000 ദിര്ഹം വരെ പിഴ ചുമത്തും. കൂടാതെ ഡ്രൈവര്മാര്ക്ക് 12 ബ്ലാക്ക് പോയിന്റുകളും ലഭിക്കും.
നഗരവാസികളെയും സന്ദര്ശകരെയും ശല്യപ്പെടുത്തുന്ന അമിത ശബ്ദമുണ്ടാക്കുന്നതും തടസ്സപ്പെടുത്തുന്നതുമായ ഡ്രൈവിംഗ് തടയാനും, സൗന്ദര്യാത്മകവും പെരുമാറ്റപരവുമായ മാനദണ്ഡങ്ങള് ശക്തിപ്പെടുത്തി ലോകത്തിലെ ഏറ്റവും ശാന്തവും പരിഷ്കൃതവുമായ നഗരങ്ങളിലൊന്നായി മാറുക എന്ന ദുബൈയിയുടെ ലക്ഷ്യത്തെ പിന്തുണക്കാനുമാണ് ഈ നീക്കത്തിലൂടെ ലക്ഷ്യമിടുന്നത്.
കൂടുതല് അയല്പക്കങ്ങള് ഉള്പ്പെടുത്തി വരും മാസങ്ങളില് നോയ്സ് റഡാറുകളുടെ എണ്ണം ക്രമേണ വര്ധിപ്പിക്കുമെന്ന് പോലീസ് പറഞ്ഞു. ദുബൈ കിരീടാവകാശിയും ഉപപ്രധാനമന്ത്രിയും പ്രതിരോധ മന്ത്രിയും എക്സിക്യൂട്ടീവ് കൗണ്സില് ചെയര്മാനുമായ ശൈഖ് ഹംദാന് ബിന് മുഹമ്മദ് ബിന് റാശിദ് അല്മക്തൂമിന്റെ നിര്ദേശപ്രകാരം ആരംഭിച്ച ദുബൈ സിവിലിറ്റി കമ്മിറ്റിയുടെ മേല്നോട്ടത്തിലുള്ള പ്രവര്ത്തനങ്ങളുടെ ഭാഗമാണ് നോയ്സ് റഡാര് ശൃംഖല വിപുലീകരണം.
ജീവിത നിലവാരം മെച്ചപ്പെടുത്താനും പൊതുശാന്തത പ്രോത്സാഹിപ്പിക്കാനുമുള്ള വിശാലമായ ശ്രമങ്ങളുടെ പ്രധാന ഭാഗമാണ് ഈ പദ്ധതി. മോഡിഫൈ ചെയ്ത വാഹനങ്ങളും പരിസ്ഥിതി ശബ്ദപരിധി കവിയുന്ന വാഹനങ്ങളും കണ്ടെത്തുന്നതില് സ്മാര്ട്ട് റഡാറുകള് ഫലപ്രദമാണെന്ന് ഇതിനകം തെളിയിക്കപ്പെട്ടിട്ടുണ്ടെന്ന് ദുബൈ പോലീസിലെ ഓപ്പറേഷന്സ് അസിസ്റ്റന്റ് കമാന്ഡര്-ഇന്-ചീഫ് മേജര് ജനറല് സെയ്ഫ് മുഹൈര് അല്മസ്റൂഇ പറഞ്ഞു. ഉപകരണങ്ങള് വാഹന ശബ്ദം കൃത്യമായി അളക്കുകയും ഉറവിടം തിരിച്ചറിയുകയും പരിധികള് ലംഘിക്കുമ്പോള് വീഡിയോ തെളിവുകള് പകര്ത്തുകയും ചെയ്യുന്നു. അനാവശ്യ ഹോണ് ഉപയോഗവും കാറിനുള്ളിലെ ഓഡിയോ സിസ്റ്റങ്ങളില് നിന്നുള്ള അമിതമായ ശബ്ദവും അവ കണ്ടെത്തുന്നു.
ദുബൈ പോലീസിന്റെ സ്മാര്ട്ട് ട്രാഫിക് സാങ്കേതികവിദ്യകളിലെ ഗുണപരമായ കുതിച്ചുചാട്ടമാണ് പുതിയ സംവിധാനം. ഇത് ശല്യപ്പെടുത്തുന്ന പെരുമാറ്റം കുറക്കാനും ശാന്തവും സുരക്ഷിതവുമായ റോഡ് അന്തരീക്ഷം ഉറപ്പാക്കാനും സഹായിക്കുന്നു. മോഡിഫൈ ചെയ്ത എക്സ്ഹോസ്റ്റുകള്, ഉച്ചത്തിലുള്ള ഓഡിയോ ഉപകരണങ്ങള്, അനാവശ്യമായ ഹോണ് അടിക്കല് എന്നിവ റഡാറുകള് കണ്ടെത്തുന്ന ശബ്ദ കുറ്റകൃത്യങ്ങളില് ഉള്പ്പെടുന്നു. ഇത്തരം നിയമ ലംഘനങ്ങള്ക്ക് 2,000 ദിര്ഹം പിഴയും 12 ബ്ലാക്ക് പോയിന്റുകളും ലഭിക്കും. നിയമ ലംഘനങ്ങള്ക്ക് കസ്റ്റഡിയിലെടുക്കുന്ന വാഹനങ്ങള് വിട്ടുകൊടുക്കാനുള്ള റിലീസ് ഫീസ് ആയി 10,000 ദിര്ഹമും നിശ്ചയിച്ചിരിക്കുന്നു.
പിഴ ചുമത്തുകയല്ല, മറിച്ച് മാന്യമായ റോഡ് പെരുമാറ്റം പ്രോത്സാഹിപ്പിക്കുക എന്നതാണ് ലക്ഷ്യമെന്ന് മേജര് ജനറല് സെയ്ഫ് മുഹൈര് അല്മസ്റൂഇ പറഞ്ഞു. സമാധാനവും ശാന്തതയും നിലനിര്ത്തുന്നത്, ആധുനികവും പരിഷ്കൃതവുമായ നഗരമെന്ന ദുബായിയുടെ പ്രതിച്ഛായയെ പിന്തുണക്കുന്ന പങ്കിട്ട ഉത്തരവാദിത്തമാണ്. ദുബൈ പോലീസ് പട്രോളിംഗിലൂടെയും സ്മാര്ട്ട് സംവിധാനങ്ങളിലൂടെയും ശല്യമുണ്ടാക്കുന്ന വാഹനങ്ങള് നിരീക്ഷിക്കുന്നത് തുടരും. ശബ്ദമലിനീകരണത്തിന്റെ അപകടങ്ങളും ഇത് പൊതുജനാരോഗ്യത്തിലുണ്ടാകുന്ന ആഘാതവും ഉയര്ത്തിക്കാട്ടുന്ന ബോധവല്ക്കരണ കാമ്പെയ്നുകളും ഇതോടൊപ്പം ഉണ്ടാകും.
നഗരത്തിന്റെ പ്രതിച്ഛായ ഉയര്ത്തിപ്പിടിക്കാനും പൊതുജന സുഖസൗകര്യങ്ങള് ഉറപ്പാക്കാനുമുള്ള ശ്രമങ്ങളുടെ ഭാഗമായി, ശബ്ദത്തിന്റെ അളവ് നിരീക്ഷിക്കാനും നിയമം കൃത്യമായി നടപ്പാക്കാനും ദുബൈ പോലീസ് ഏറ്റവും പുതിയ സ്മാര്ട്ട് സാങ്കേതികവിദ്യകള് വിന്യസിക്കുന്നു. ജീവിത നിലവാര സൂചകങ്ങള് മെച്ചപ്പെടുത്താനും സുരക്ഷയും പരിസ്ഥിതി ക്ഷേമവും പിന്തുണക്കുന്ന നൂതന പരിഹാരങ്ങള് സ്വീകരിക്കാനുമുള്ള ദുബൈയിയുടെ വിശാലമായ തന്ത്രവുമായി ഈ സംരംഭം ഒത്തുപോകുന്നതായി മേജര് ജനറല് സെയ്ഫ് മുഹൈര് അല്മസ്റൂഇ കൂട്ടിച്ചേര്ത്തു.