മനാമ: ബഹറൈന്‍ കേരളീയ സമാജം വനിതാവേദി ഓണാഘോഷങ്ങളുടെ ഭാഗമായി സമാജം വനിതാവേദി വിവിധ മെഗാ കലാപരിപാടികള്‍ ഒരുക്കുന്നു. സെപ്റ്റംബര്‍ 14 ന് ‘മെഗാ തിരുവാതിര’ എന്ന പേരില്‍ നൂറ്റിയമ്പതോളം വനിതകള്‍ ചേര്‍ന്ന് ഏറ്റവും വലിയ തിരുവാതിര നൃത്തം അവതരിപ്പിക്കും. ഓണാഘോഷങ്ങളുടെ ഭാഗമായി സെപ്റ്റംബര്‍ 21 ന് റിഥംസ് ഓഫ് കേരള എന്ന പേരില്‍ മറ്റൊരു മെഗാ പ്രോഗ്രാം വനിത വേദിയുടെ നേതൃത്വത്തില്‍ അരങ്ങേറും. കേരളത്തിന്‍റെ തനതായ വൈവിധ്യമാര്‍ന്ന നൃത്ത പരിപാടികള്‍, ഇരുന്നുറിലേറെ കലാകാരന്മാരും കലാകാരികളും ചേര്‍ന്ന് അവതരിപ്പിക്കുന്ന ഈ പരിപാടിയില്‍ തിരുവാതിര, മാര്‍ഗംകളി, ഒപ്പന, കൈകൊട്ടിക്കളി എന്നിവ ഉള്‍പ്പെടുന്നു. ഇതുമായി ബന്ധപ്പെട്ട് കഴിഞ്ഞ ദിവസം ചേര്‍ന്ന യോഗത്തില്‍ നിരവധിപേര്‍ പങ്കെടുത്തു.
ബഹറൈന്‍ കേരളീയ സമാജത്തിന്‍റെ വനിതാവേദി സംഘടിപ്പിക്കുന്ന ഈ പരിപാടികള്‍ ഓണത്തോടനുബന്ധിച്ചുള്ള ആഘോഷങ്ങള്‍ക്ക് പുതിയൊരു നിറം പകര്‍ന്നുകൊണ്ട്, പ്രവാസ ലോകത്തുള്ള മലയാളികള്‍ക്ക് നാട്ടിലെ ഓര്‍മ്മകളുടെ മാധുര്യം പകരും എന്നു വനിത വിഭാഗം പ്രസിഡന്‍റ് മോഹിനി തോമസ്, സെക്രട്ടറി ജയ രവികുമാര്‍ എന്നിവര്‍ അറിയിച്ചു. ഈ പരിപാടിയില്‍ പങ്കെടുക്കാന്‍ താല്‍പര്യമുള്ളവര്‍ താഴെ കാണുന്ന നമ്പരുകളില്‍ ബന്ധപ്പെടുക: ജയ രവികുമാര്‍ (36782497), നിമ്മി റോഷന്‍ (32052047), വിജിന സന്തോഷ് (39115221), വിദ്യാ വൈശാഖ് (32380303).