ബഹ്‌റൈനിൽ മിസൈലിന്റെ അവശിഷ്ടങ്ങൾ വീണ് വിദേശ തൊഴിലാളി മരിച്ചു

മനാമ– ബഹ്‌റൈനിലെ സൽമാൻ ഇൻഡസ്ട്രിയൽ സിറ്റിയിൽ ഇറാൻ വിക്ഷേപിച്ച മിസൈലിന്റെ അവശിഷ്ടങ്ങൾ വീണ് ഒരു ഏഷ്യൻ പ്രവാസി തൊഴിലാളി മരിച്ചു. രണ്ട് പേർക്ക് ഗുരുതരമായി പരിക്കേറ്റു. ബഹ്‌റൈനിന്റെ പ്രതിരോധ സംവിധാനങ്ങൾ മിസൈൽ തടഞ്ഞെങ്കിലും അവശിഷ്ടങ്ങൾ വ്യാവസായിക മേഖലയിലെ ഒരു വിദേശ കപ്പലിന് മുകളിൽ വീഴുകയും തീപിടുത്തമുണ്ടാക്കുകയും ചെയ്തു. ഇതാണ് മരണത്തിനും പരിക്കുകൾക്കും കാരണമായത്. ബഹ്‌റൈൻ ആഭ്യന്തര മന്ത്രാലയം ഇത് സ്ഥിരീകരിച്ചു. രക്ഷാപ്രവർത്തകർ വേഗത്തിൽ എത്തി തീ നിയന്ത്രണവിധേയമാക്കി. സ്ഥിതി പൂർണമായും നിയന്ത്രണത്തിലാണെന്ന് അധികൃതർ അറിയിച്ചു.