ദോഹ– ഖത്തർ ആതിഥേയത്വം വഹിക്കുന്ന ഫിഫ അറബ് കപ്പ് ഫുട്ബോൾ ടൂർണമെൻ്റ് കിരീടപ്പോരാട്ടത്തിൻ്റെ കലാശത്തിലേക്ക് കടക്കുകയാണ്. ക്വാർട്ടർ ഫൈനലുകൾക്ക് ശേഷം കിരീടം ലക്ഷ്യമിട്ട് മൊറോക്കോ, സൗദി അറേബ്യ, യു.എ.ഇ., ജോർദാൻ എന്നീ നാല് ടീമുകളാണ് സെമിയിൽ ഏറ്റുമുട്ടുന്നത്. ഫുട്ബോൾ പ്രേമികൾക്ക് വിരുന്നൊരുക്കിക്കൊണ്ട് ഇന്ന് തീപാറുന്ന രണ്ട് സെമി പോരാട്ടങ്ങളാണ് അരങ്ങേറുന്നത്.
വൈകീട്ട് 5:30ന് (ഇന്ത്യൻ സമയം 8.00PM) ഖലീഫ ഇൻ്റർനാഷണൽ സ്റ്റേഡിയത്തിൽ നടക്കുന്ന ആദ്യ സെമിയിൽ ശക്തരായ മൊറോക്കോ യുണൈറ്റഡ് അറബ് എമിറേറ്റ്സിനെ (യു.എ.ഇ.) നേരിടും. ടൂർണമെൻ്റിൽ ഇതുവരെ തോൽവി അറിയാതെയാണ് മൊറോക്കോ സെമിയിലെത്തിയത്. മറുവശത്ത്, നിലവിലെ ചാമ്പ്യന്മാരായ അൽജീരിയയെ പെനാൽറ്റി ഷൂട്ടൗട്ടിൽ അട്ടിമറിച്ചതിൻ്റെ ആത്മവിശ്വാസത്തിലാണ് യു.എ.ഇ. കളത്തിലിറങ്ങുന്നത്.
രാത്രി 8:30ന് (ഇന്ത്യൻ സമയം 11.00PM) അൽ ബൈത്ത് സ്റ്റേഡിയത്തിൽ അരങ്ങേറുന്ന രണ്ടാം സെമിയിൽ സൗദി അറേബ്യ ജോർദാനുമായി കൊമ്പുകോർക്കും. ടൂർണമെൻ്റിൽ തോൽവി അറിയാത്ത മറ്റൊരു ടീമായ ജോർദാൻ ഇറാഖിനെ ഏകപക്ഷീയമായ ഒരു ഗോളിന് തോൽപ്പിച്ചാണ് സെമിയുറപ്പിച്ചത്. അതേസമയം, ഫൈനലിലേക്കുള്ള എളുപ്പവഴിയാണ് സൗദി അറേബ്യയുടെ ലക്ഷ്യം. ക്വാർട്ടർ ഫൈനലിൽ ഫലസ്തീനെതിരെ അധിക സമയത്ത് മുഹമ്മദ് കന്നോ നേടിയ തകർപ്പൻ ഹെഡർ ഗോളിലാണ് സൗദി 2-1ന് വിജയം നേടിയത്.
സിറിയയെ ഏകപക്ഷീയമായ ഒരു ഗോളിന് മറികടന്നാണ് മൊറോക്കോ സെമിയിലെത്തിയത്. ജോർദാൻ ഇറാഖിനെ ഒരു ഗോളിന് തോൽപ്പിച്ചു. ക്വാർട്ടർ ഫൈനലുകളിലെ വാശിയേറിയ പോരാട്ടങ്ങളുടെ തുടർച്ചയെന്നോണം സെമി മത്സരങ്ങളും ഫുട്ബോൾ പ്രേമികൾക്ക് ആവേശത്തിൻ്റെ നിമിഷങ്ങൾ സമ്മാനിക്കുമെന്നുറപ്പാണ്. ഡിസംബർ 18 നാണ് ഫൈനലും മൂന്നാം സ്ഥാനത്തിനായുള്ള മത്സരവും നടക്കുന്നത്.