ഫുട്ബോൾ ലോകത്തെ സൂപ്പർ താരം ക്രിസ്റ്റ്യാനോ റൊണാൾഡോ ഹോളിവുഡിലെ ഏറ്റവും വലിയ ആക്ഷൻ ഫ്രാഞ്ചൈസികളിലൊന്നായ ‘ഫാസ്റ്റ് ആൻഡ് ഫ്യൂരിയസി’ന്റെ ഭാഗമായേക്കും. പോർച്ചുഗീസ് ഇതിഹാസത്തിനായി ‘ഫാസ്റ്റ് ആൻഡ് ഫ്യൂരിയസ്’ ലോകത്തിൽ ഒരു കഥാപാത്രത്തെ എഴുതിച്ചേർത്തിട്ടുണ്ട് എന്ന് മുഖ്യനടനും നിർമ്മാതാവുമായ വിൻ ഡീസൽ വെളിപ്പെടുത്തിയതോടെ ഊഹാപോഹങ്ങൾ ശക്തമായിരിക്കുകയാണ്. ഈ നീണ്ട സിനിമാ സീരീസ് അതിൻ്റെ അവസാന ഭാഗത്തേക്ക് കടക്കുമ്പോൾ, റൊണാൾഡോയുടെ സിനിമാ അരങ്ങേറ്റത്തെക്കുറിച്ചുള്ള ഈ വാർത്ത ആരാധകരെ ആവേശത്തിലാഴ്ത്തിയിട്ടുണ്ട്.
ഔദ്യോഗിക കാസ്റ്റിങ് പ്രഖ്യാപനങ്ങളൊന്നും നടന്നിട്ടില്ലെങ്കിലും, നടനും നിർമ്മാതാവുമായ വിൻ ഡീസലിൻ്റെ വാക്കുകൾ ഈ നീക്കം വെറും ഊഹങ്ങളല്ല എന്ന് അടിവരയിടുന്നു. ഇൻസ്റ്റാഗ്രാമിൽ വിൻ ഡീസലും റൊണാൾഡോയും തംബ്സ് അപ്പ് കാണിച്ച് നിൽക്കുന്ന ഒരു ചിത്രം പോസ്റ്റ് ചെയ്തതിന് പിന്നാലെയാണ് വിൻ ഡീസൽ ഈ സൂചന നൽകിയത്. “അവനെ ഫാസ്റ്റ് മിത്തോളജിയിൽ ഉൾപ്പെടുത്തുമോ എന്ന് എല്ലാവരും ചോദിച്ചു. ഞങ്ങൾ അവനുവേണ്ടി ഒരു കഥാപാത്രത്തെ എഴുതിയിട്ടുണ്ട്,” എന്നായിരുന്നു വിൻ ഡീസലിൻ്റെ കുറിച്ചത്. ഈ പോസ്റ്റിൽ ആദ്യം ഒരു ഷോർട്ട് ഫിലിമിനെക്കുറിച്ച് പരാമർശിച്ചിരുന്നുവെങ്കിലും, അത് പിന്നീട് നീക്കം ചെയ്തത്, റൊണാൾഡോയുടെ പങ്ക് ഒരു സൈഡ് പ്രോജക്റ്റിന് വേണ്ടിയാണോ അതോ ഭാവിയിലെ പ്രധാന ഫീച്ചർ ഫിലിമിന് വേണ്ടിയാണോ എന്ന ആകാംഷ വർദ്ധിപ്പിക്കുന്നു.
മുമ്പ് ഒരു ഫീച്ചർ ഫിലിമിലും അഭിനയിച്ചിട്ടില്ലെങ്കിലും, കായികരംഗത്തിനപ്പുറം വിനോദ മേഖലയിലേക്ക് വ്യാപിപ്പിക്കുന്നതിൽ റൊണാൾഡോ നേരത്തെ താൽപ്പര്യം പ്രകടിപ്പിച്ചിരുന്നു. ഇത് യാഥാർത്ഥ്യമാവുകയാണെങ്കിൽ, സമീപ വർഷങ്ങളിലെ ഏറ്റവും ശ്രദ്ധേയമായ കായികതാരം-നടൻ ക്രോസ്ഓവറുകളിൽ ഒന്നായിരിക്കും ഇത്. വേഗത, കായികക്ഷമത, സാഹസികത എന്നിവക്ക് ഊന്നൽ നൽകുന്ന ഫാസ്റ്റ് ആൻഡ് ഫ്യൂരിയസ് ഫ്രാഞ്ചൈസി റൊണാൾഡോയുടെ ആഗോള ബ്രാൻഡിനും പ്രതിച്ഛായക്കും ചേരുന്ന ഒന്നായാണ് കണക്കാക്കപ്പെടുന്നത്.
അതേസമയം, ‘ഫാസ്റ്റ് എക്സ്; പാർട്ട് 2’ ഫ്രാഞ്ചൈസിയുടെ അവസാന അധ്യായമായിരിക്കുമെന്ന് ഡീസൽ പലതവണ പറഞ്ഞിട്ടുണ്ട്. 2027 ഏപ്രിലിൽ റിലീസ് ചെയ്യാൻ യൂണിവേഴ്സൽ സ്റ്റുഡിയോസ് ലക്ഷ്യമിടുന്ന ഈ ചിത്രത്തിൽ, ഡൊമിനിക് ടൊറെറ്റോ എന്ന തൻ്റെ കഥാപാത്രവും അന്തരിച്ച പോൾ വാക്കർ അവതരിപ്പിച്ച ബ്രയാൻ ഓ കോണർ എന്ന കഥാപാത്രവും വീണ്ടും ഒരുമിക്കാനുള്ള സാധ്യതയെക്കുറിച്ചുള്ള ഡീസലിൻ്റെ വെളിപ്പെടുത്തലാണ് ഏറ്റവും ശ്രദ്ധേയം. “ഡോമിനെയും ബ്രയാൻ ഓകോണറിനെയും വീണ്ടും ഒരുമിപ്പിക്കും. അവസാന ഭാഗത്ത് നിങ്ങൾക്ക് അത് ലഭിക്കും” എന്നാണ് വിൻ ഡീസൽ പറഞ്ഞത്. 2013-ൽ കാർ അപകടത്തിൽ മരണമടഞ്ഞ പോൾ വാക്കറിൻ്റെ കഥാപാത്രം എങ്ങനെ തിരിച്ചെത്തുമെന്നത് വ്യക്തമല്ലെങ്കിലും, ഡിജിറ്റൽ സാങ്കേതികവിദ്യയെ ആശ്രയിച്ചായിരിക്കും ഈ രംഗമെന്നാണ് പ്രതീക്ഷ. റൊണാൾഡോയുടെ റോളിനെക്കുറിച്ചുള്ള ഔദ്യോഗിക സ്ഥിരീകരണത്തിനും ബ്രയാൻ ഓ കോണറിൻ്റെ വൈകാരിക തിരിച്ചുവരവിനുമാണ് പ്രേക്ഷകർ ഇപ്പോൾ ആകാംഷയോടെ കാത്തിരിക്കുന്നത്.