ചെന്നൈ: തമിഴ് സിനിമാതാരം ശ്രീകാന്തിനെ ലഹരിമരുന്ന് ഉപയോഗവുമായി ബന്ധപ്പെട്ട കേസില്‍ ചെന്നൈ പോലീസ് അറസ്റ്റ് ചെയ്തു. രാവിലെ നടനെ ചോദ്യം ചെയ്തതിന് ശേഷം, നുങ്കമ്പാക്കം പോലീസ് ഗവണ്‍മെന്റ് ഹോസ്പിറ്റലില്‍ നടത്തിയ രക്തപരിശോധനയില്‍ ലഹരിമരുന്നിന്റെ സാന്നിധ്യം സ്ഥിരീകരിച്ചതായാണ് റിപ്പോര്‍ട്ടുകള്‍.
മുന്‍ എഐഎഡിഎംകെ പ്രവര്‍ത്തകനായ പ്രസാദിന്റെ അറസ്റ്റിന് പിന്നാലെയാണ് ശ്രീകാന്തിന്റെ അറസ്റ്റ്. ചെന്നൈയിലെ ഒരു പബ്ബില്‍ നടന്ന സംഘര്‍ഷത്തെ തുടര്‍ന്ന് പ്രസാദിനെ കഴിഞ്ഞ മാസം പോലീസ് കസ്റ്റഡിയിലെടുത്തിരുന്നു. ലഹരിമരുന്ന് ഉപയോഗവുമായി ബന്ധപ്പെട്ട അന്വേഷണത്തില്‍ പ്രസാദ് ശ്രീകാന്തിന്റെ പേര് വെളിപ്പെടുത്തിയതായാണ് വിവരം.
കഴിഞ്ഞ ആഴ്ച, നുങ്കമ്പാക്കം പോലീസ് ഘാന സ്വദേശിയായ ജോണ്‍ എന്നയാളെ 11 ഗ്രാം കൊക്കെയ്ന്‍ കൈവശം വച്ചതിന് അറസ്റ്റ് ചെയ്തിരുന്നു. ശ്രീകാന്ത് ജോണില്‍ നിന്നാണ് ലഹരിമരുന്ന് വാങ്ങിയതെന്ന് ‘ന്യൂ ഇന്ത്യന്‍ എക്‌സ്പ്രസ്’ റിപ്പോര്‍ട്ട് ചെയ്തു. എന്നാല്‍, ഇതുസംബന്ധിച്ച് പോലീസ് ഔദ്യോഗിക പ്രസ്താവന ഇതുവരെ പുറപ്പെടുവിച്ചിട്ടില്ല.
കേരള സിനിമാ മേഖലയിലും സമാന സംഭവങ്ങള്‍ അടുത്തിടെ റിപ്പോര്‍ട്ട് ചെയ്തിരുന്നു. നടന്‍ ഷൈന്‍ ടോം ചാക്കോ, സംവിധായകര്‍ ഖാലിദ് റഹ്‌മാന്‍, അഷ്‌റഫ് ഹംസ എന്നിവരെ കൊച്ചി സിറ്റി പോലീസ് ലഹരിമരുന്ന് ഉപയോഗവുമായി ബന്ധപ്പെട്ട് അറസ്റ്റ് ചെയ്തിരുന്നു.
2002-ല്‍ ‘റോജ കൂട്ടം’ എന്ന തമിഴ് ചിത്രത്തിലൂടെ അരങ്ങേറ്റം കുറിച്ച ശ്രീകാന്ത്, ‘ഏപ്രില്‍ മാധത്തില്‍’, ‘മനസെല്ലാം’, ‘പാര്‍ത്ഥിപന്‍ കനവ്’ തുടങ്ങിയ വിജയചിത്രങ്ങളിലൂടെ പ്രശസ്തനായി. 2023-ല്‍ ‘ഒകരികു ഒകരു’ എന്ന ചിത്രത്തിലൂടെ തെലുഗു സിനിമയിലും അരങ്ങേറ്റം നടത്തി. ‘കനാ കണ്ടേന്‍’, ‘അടവാരി മാതലകു അര്‍ധാലു വേരുലെ’, ‘ബോസ്’, ‘പൂ’, ‘കോഫി വിത്ത് കാദല്‍’, ‘നന്ബന്‍’ തുടങ്ങിയവയാണ് മറ്റ് ശ്രദ്ധേയ ചിത്രങ്ങള്‍. ഈ വര്‍ഷം മാര്‍ച്ചില്‍ പുറത്തിറങ്ങിയ ‘കൊഞ്ചം കാദല്‍ കൊഞ്ചം മോധല്‍’ ആണ് അവസാന ചിത്രം.