തിരുവനന്തപുരം– കേരളത്തിലെ നാല് നഗരങ്ങളില്‍ ഫുഡ് സ്ട്രീറ്റുകള്‍ ഒരുക്കാന്‍ തീരുമാനിച്ച് സര്‍ക്കാര്‍. മോഡണൈസേഷന്‍ ഓഫ് ഫുഡ് സ്ട്രീറ്റ്‌സ് പദ്ധതിയുടെ ഭാഗമായിട്ടാണ് ഇത് നടപ്പിലാക്കുന്നത്. കോഴിക്കോട് ബീച്ച്, മലപ്പുറം കോട്ടക്കുന്ന്, എറണാകുളം പനമ്പിള്ളി നഗര്‍, തിരുവനന്തപുരം ശംഖുമുഖം എന്നീ സ്ഥലങ്ങളിലാണ് ആദ്യഘട്ടത്തില്‍ ഫുഡ് സ്ട്രീറ്റുകള്‍ നിര്‍മിക്കുക. വൃത്തിയുള്ള മനോഹരമായ അന്തരീക്ഷത്തില്‍ നല്ല ഭക്ഷണം ഒരുക്കുന്നതിന്റെ മാതൃകാ പദ്ധതിയാണ് ഇതെന്ന് ആരോഗ്യമന്ത്രി വീണാ ജോര്‍ജ് പറഞ്ഞു.
ഒരു കോടി രൂപമുടക്കി ഭക്ഷ്യ സുരക്ഷാ മാനദണ്ഡങ്ങള്‍ പാലിച്ചാണ് ഫുഡ് സ്ട്രീറ്റ് നിര്‍മിക്കുക. നിലവില്‍ പ്രവര്‍ത്തിക്കുന്ന ഫുഡ് സ്ട്രീറ്റുകള്‍ മികവുറ്റതാക്കും. സംസ്ഥാനത്തിന്റെ തനത് ഭക്ഷണങ്ങള്‍ പ്രോത്സാഹിപ്പിക്കുക എന്നതും ഈ പദ്ധതിയുടെ ലക്ഷ്യമാണ്. വില്‍പന കേന്ദ്രങ്ങളില്‍ ഭക്ഷ്യസുരക്ഷ പരിശീലനവും സര്‍ട്ടിഫിക്കേഷനും ലഭിച്ചവരുടെ സേവനം ഉറപ്പാക്കും. ഇതിനോടൊപ്പം പരിസ്ഥിതി ശുചിത്വത്തിനും പ്രാധാന്യം നല്‍കും. ടോയ്‌ലെറ്റ് സംവിധാനവും മാലിന്യ സംസ്‌കരണത്തിനുമുള്ള സംവിധാനവും ഫുഡ് സ്ട്രീറ്റുകളില്‍ സജ്ജീകരിക്കും.