മോസ്കോ: ഇറാൻ ദേശീയ സുരക്ഷാ കൗൺസിൽ മുൻ സെക്രട്ടറിയും പ്രമുഖ നയതന്ത്രജ്ഞനുമായിരുന്ന അലി ലാറിജാനി തന്റെ ജീവിതം പൂർണ്ണമായും ഇറാന്റെ പരമാധികാരത്തിനും ജനക്ഷേമത്തിനുമായി നീക്കിവെച്ച വ്യക്തിത്വമായിരുന്നുവെന്ന് റഷ്യയിലെ ഇറാൻ സ്ഥാനപതി കാസെം ജലാലി പറഞ്ഞു. ടെഹ്റാനിലെ ലാറിജാനിയുടെ ഓഫീസിന് നേരെ ഇസ്രായേൽ-അമേരിക്കൻ സഖ്യം നടത്തിയ വ്യോമാക്രമണത്തിൽ അദ്ദേഹം രക്തസാക്ഷിത്വം വരിച്ച് 40 ദിവസം തികയുന്ന വേളയിൽ മോസ്കോയിൽ മാധ്യമങ്ങളോട് സംസാരിക്കുകയായിരുന്നു അദ്ദേഹം. രാജ്യം നേരിട്ട ഏറ്റവും കഠിനമായ പ്രതിസന്ധികളിലും വെല്ലുവിളികളിലും ലാറിജാനി നൽകിയ നേതൃത്വം സമാനതകളില്ലാത്തതാണെന്ന് ജലാലി അനുസ്മരിച്ചു.
നയതന്ത്രരംഗത്തെ ലാറിജാനിയുടെ കരുത്ത് എടുത്തുപറഞ്ഞ സ്ഥാനപതി, അദ്ദേഹം ഏഴ് തവണ റഷ്യ സന്ദർശിക്കുകയും പ്രസിഡന്റ് വ്ലാഡിമിർ പുടിനുമായി ഉന്നതതല ചർച്ചകൾ നടത്തുകയും ചെയ്തിട്ടുള്ള കാര്യം ഓർമ്മിപ്പിച്ചു. ഇരുരാജ്യങ്ങളും തമ്മിലുള്ള തന്ത്രപ്രധാനമായ ബന്ധം ശക്തമാക്കുന്നതിൽ ലാറിജാനി നിർണ്ണായക പങ്കുവഹിച്ചു. എത്ര സങ്കീർണ്ണമായ വിഷയങ്ങളിലും കൃത്യമായ പരിഹാരം കണ്ടെത്താൻ അദ്ദേഹത്തിന് പ്രത്യേക കഴിവുണ്ടായിരുന്നു. ഗാസ, ലബനൻ വിഷയങ്ങളിൽ അദ്ദേഹം നടത്തിയ ഇടപെടലുകൾ അന്താരാഷ്ട്ര തലത്തിൽ തന്നെ ശ്രദ്ധിക്കപ്പെട്ടതാണെന്നും ജലാലി കൂട്ടിച്ചേർത്തു.
ഇറാനിലെ വിവിധ ഉന്നത പദവികൾ അലങ്കരിച്ചപ്പോഴും ലാറിജാനി പുലർത്തിയിരുന്ന വിനയം മാതൃകാപരമായിരുന്നു. പാർലമെന്റ് സ്പീക്കർ, ഐ.ആർ.ഐ.ബി മേധാവി, സാംസ്കാരിക മന്ത്രി എന്നീ നിലകളിൽ അദ്ദേഹം കൊണ്ടുവന്ന വികസനങ്ങളും പരിഷ്കാരങ്ങളും ഇന്നും ഇറാന്റെ വളർച്ചയിൽ വലിയ പങ്കുവഹിക്കുന്നുണ്ട്. പുതിയ തലമുറയെ വളർത്തിയെടുക്കുന്നതിലും കൂട്ടായ പ്രവർത്തനത്തിലൂടെ ലക്ഷ്യങ്ങൾ കൈവരിക്കുന്നതിലും അദ്ദേഹം എന്നും താൽപ്പര്യം കാണിച്ചിരുന്നു. അലി ലാറിജാനിയുടെ വിയോഗം രാജ്യത്തിന് വലിയ നഷ്ടമാണെങ്കിലും അദ്ദേഹത്തിന്റെ പോരാട്ടവീര്യം ഇറാന് എന്നും കരുത്ത് പകരുമെന്നും സ്ഥാനപതി വ്യക്തമാക്കി.