കോഴിക്കോട്– വാട്‌സാപില്‍ മോശം പരാമര്‍ശം ചോദ്യം ചെയ്തതിനെത്തുടര്‍ന്ന വടകര, നാദാപുരത്ത് സഹോദരങ്ങളായ രണ്ടുപേര്‍ക്ക് വെട്ടേറ്റ് പരുക്ക്. നാദാപുരം ടൗണിലെ കെ.എസ്.എസ് വാടക സ്റ്റോര്‍ ഉടമകളായ ഊരംവീട്ടില്‍ നാസര്‍, സഹോദരന്‍ സലീം എന്നിവര്‍ക്കാണ് വെട്ടേറ്റത്. ഇരുവരും കോഴിക്കോട് സ്വകാര്യ ആശുപത്രിയില്‍ ചികിത്സയിലാണ്. അയല്‍വാസിയായ ചിറക്കുനി ബഷീര്‍ ആണ് ഇരുവരെയും വെട്ടിപ്പരിക്കേല്‍പ്പിച്ചതതെന്ന് ബന്ധുക്കള്‍ അറിയിച്ചു.
നാസറിന്റെ വയറിനും സലീമിന്റെ കൈയ്ക്കുമാണ് പരുക്കേറ്റത്. സലീമിന്റെ 2 കൈവിരല്‍ അറ്റുപോയി. ഇയാളെ ശസ്ത്രക്രിയക്ക് വിധേയമാക്കി. നാസറിനും ശസ്ത്രക്രിയ വേണ്ടി വരുമെന്ന് ബന്ധുക്കള്‍ അറിയിച്ചു.
ചൊവ്വാഴ്ച രാത്രി എട്ടരയോടെയായിരുന്നു സംഭവം. ബഷീറിന്റെ വീട്ടില്‍വെച്ചാണ് സഹോദരങ്ങള്‍ക്ക് നേരേ ആക്രമണമുണ്ടായത്. വാട്സാപ്പ് ഗ്രൂപ്പില്‍ മോശമായി പരാമര്‍ശിച്ചത് ചോദിക്കാനാണ് ഇരുവരും മറ്റൊരു സഹോദര പുത്രനൊപ്പം ബഷീറിനെ കാണാനെത്തിയത്. തന്റെ വീട്ടിലെത്തിയ ഇരുവരേയും ബഷീര്‍ വെട്ടിപ്പരുക്കേല്‍പ്പിക്കുകയായിരുന്നു. വാട്‌സാപില്‍ നാട്ടുകാരില്‍ പലര്‍ക്കുമെതിരെ മോശം പരാമര്‍ശം നടത്തുന്നത് ഇയാളുടെ സ്ഥിരം പതിവാണെന്നും ഇത്തരത്തില്‍ സന്ദേശങ്ങള്‍ പരത്തുന്നത് ചോദ്യം ചെയ്ത ഇരുവരുടേയും മറ്റൊരു സഹോദരനായ ഊരംവീട്ടില്‍ സമീറിന പള്ളിയില്‍ വെച്ച് മര്‍ദ്ദിക്കാന്‍ ബഷീര്‍ ശ്രമിച്ചിരുന്നതായും പരാതിയുണ്ട്.
ഇരുവര്‍ക്കും വെട്ടേറ്റ ഉടന്‍ നാദാപുരം പൊലീസ് സ്ഥലത്തെത്തുമ്പോഴേക്കും പ്രതി ഓടിരക്ഷപ്പെട്ടു. വീട്ടില്‍ വിശദ പരിശോധന നടത്തിയ പൊലീസ് കുത്താന്‍ ഉപയോഗിച്ച കത്തി, ബഷീര്‍ ഉപയോഗിച്ചുകൊണ്ടിരുന്ന ഫോണ്‍ എന്നിവ പിടിച്ചെടുത്തിട്ടുണ്ട്. കേസെടുത്ത് വിശദമായ അന്വേഷണമാരംഭിച്ചു.