ജിദ്ദ- സൗദി അറേബ്യയിൽ ഇന്ത്യൻ പാർട്ണർഷിപ്പിലുള്ള ആദ്യത്തെ രജിസ്റ്റേർഡ് ആന്റ് സർട്ടിഫൈഡ് ലൈസൻസ് ഓഡിറ്റ് സ്ഥാപനമായ പി.എ.എച്ച് ഇന്റലക്റ്റ് ജിദ്ദയിൽ പ്രവർത്തനം തുടങ്ങി. ഓഡിറ്റിംഗ് ആന്റ് കൺസൽട്ടൻസി മേഖലയിലെ പ്രമുഖ സ്ഥാപനമായ പി.എ.എച്ച് ഇന്റലക്റ്റാണ് സൗദി അറേബ്യയിലേക്കും പ്രവർത്തനം വ്യാപിപ്പിക്കുന്നത്. സൗദിയിൽ ഓഡിറ്റിംഗ് ലൈസൻസുള്ള ഇന്ത്യയിൽനിന്നുള്ള ഏക സ്ഥാപനമാണ് പി.എ.എച്ച് ഇന്റലക്റ്റ്. സൗദി അറേബ്യയിലെ നൂറു കണക്കിന് പ്രവാസി ഇന്ത്യൻ നിക്ഷേപകർക്ക് പി.എ.എച്ച് ഇന്റലക്റ്റ് ആവശ്യമായ സഹായങ്ങളൊരുക്കും. ജിദ്ദയിലെ വോക്കോ ഹോട്ടലിൽ നടന്ന ചടങ്ങിൽ ജിദ്ദ നാഷണൽ ഹോസ്പിറ്റിൽ ചെയർമാൻ വി.പി മുഹമ്മദലിയും പോളണ്ട് മൂസയും ചേർന്ന് പി.എ.എച്ച് ഇന്റലക്റ്റ് ഉദ്ഘാടനം ചെയ്തു. ഗൾഫിലേക്ക് പ്രവർത്തനം വ്യാപിപിക്കുന്നതിന്റെ ഭാഗമായാണ് ജിദ്ദയിൽ ഓഫീസ് പ്രവർത്തനം തുടങ്ങുന്നത്.
സൗദി അറേബ്യയിൽ കമ്പനി രജിസ്റ്റർ ചെയ്യുന്നതിനുള്ള മിസ ലൈസൻസിംഗ്, ബിസിനസ് സെറ്റപ്പ്, വാറ്റ് രജിസ്ട്രേഷൻ, ബാങ്ക് അക്കൗണ്ട് തുറക്കൽ തുടങ്ങി നിക്ഷേപകർക്കും സംരംഭകർക്കും ആവശ്യമായ മുഴുവൻ നടപടിക്രമങ്ങളും ആധുനിക സാങ്കേതിക വിദ്യയുടെ സഹായത്തോടെ പി.എ.എച്ച് നിർവഹിച്ചു കൊടുക്കുമെന്ന് പി.എ.എച്ച് ഡയറക്ടർ റാസിക്ക് അഹമ്മദ് എഫ്.സി.എ പറഞ്ഞു.
തന്റെ പിതാവിന്റെ സ്വപ്നം സാക്ഷാത്കരിക്കുന്നതിനുള്ള കഠിന പ്രയത്നത്തിനാണ് സൗദിയുടെ മണ്ണിൽ തുടക്കമാകുന്നതെന്നും റാസിക്ക് അഹമ്മദ് പറഞ്ഞു. മറ്റുള്ളവർ ചെയ്യുന്നതിൽനിന്ന് വ്യത്യസ്തമായ രീതിയിലാണ് പി.എ.എച്ച് ഇന്റലക്റ്റലിന്റെ പ്രവർത്തനം. അനുദിനം മാറിക്കൊണ്ടിരിക്കുന്ന സൗദി മാർക്കറ്റിൽ ഏറ്റവും പ്രൊഫഷണൽ രീതിയിലൂടെ മുന്നോട്ടുപോകുകയാണ് പി.എ.എച്ച് ഇന്റലക്റ്റിന്റെ ലക്ഷ്യമെന്നും അദ്ദേഹം പറഞ്ഞു.
സൗദിയുടെ വിഷന്‍ 2030 മുന്നോട്ടുവെക്കുന്ന കാഴ്ചപ്പാടുകള്‍ക്ക് അനുസരിച്ച് പ്രവര്‍ത്തിക്കുകയാണ് ലക്ഷ്യമെന്ന് പാര്‍ട്ണര്‍മാരിലൊരാളായ അബ്ദുറഹ്‌മാന്‍ സൈമാദഹല്‍ പറഞ്ഞു. സൗദിയില്‍ സ്വകാര്യവത്കരണത്തിന് സര്‍ക്കാര്‍ പൂര്‍ണമായ ഊന്നല്‍ നല്‍കുകയാണ്. വികസന സംരംഭങ്ങളില്‍ സ്വകാര്യമേഖലയുടെ വര്‍ധിത പങ്കാളിത്തമാണ് സൗദി സര്‍ക്കാര്‍ പ്രതീക്ഷിക്കുന്നത്. ഇത് നിരവധി വന്‍കിട ബിസിനസ് സംരംഭങ്ങള്‍ക്ക് അടിത്തറയേകുമെന്നും പി.എ.എച്ചിന് അതിന്റെ വികാസത്തില്‍ കാര്യമായ പങ്കുവഹിക്കാനാകുമെന്നും അദ്ദേഹം പറഞ്ഞു.
ആര്‍ടിഫിഷ്യല്‍ ഇന്റലിജന്‍സിന്റേയും ഡിജിറ്റൈസേഷന്റേയും സാധ്യതകള്‍ പൂര്‍ണമായും ഉപയോഗപ്പെടുത്തിയായിരിക്കും പ്രവര്‍ത്തനമെന്ന് അഷ്റഫ് മൊയ്തീന്‍ പറഞ്ഞു. വിശ്വാസ്യതയുള്ള സംഖ്യകളാണ് ബിസിനസിന്റെ വിജയമെന്ന് ചൂണ്ടിക്കാട്ടിയ അബ്ദുറഹ്‌മാന്‍ ഖാലിദ്, പി.എ.എച്ചിന് ഈ മേഖലയില്‍ കാര്യമായ സംഭാവനകള്‍ അര്‍പ്പിക്കാന്‍ കഴിയുമെന്ന് പറഞ്ഞു.
നാൽപ്പതു വർഷത്തോളമായി ഇന്ത്യയിൽ പ്രവർത്തിക്കുന്ന ചാർട്ടേഡ് അക്കൗണ്ടിംഗ് ആന്റ് ഓഡിറ്റിംഗ് സ്ഥാപനമാണ് പി.എ.എച്ച്. പി.അബ്ദുൽ ഹമീദ് എന്ന വിഖ്യാതനായ ചാർട്ടേഡ് എക്കൗണ്ടന്റ് സ്ഥാപിച്ചതാണ് ഈ സ്ഥാപനം. അദ്ദേഹത്തിന്റെ മകൻ റാസിഖ് അഹമ്മദ് ഡയറക്ടറായാണ് സൗദിയിലും പ്രവർത്തനം ആരംഭിക്കുന്നത്. യു.എ.ഇയിൽ നേരത്തെ തന്നെ സ്ഥാപനം പ്രവർത്തനം തുടങ്ങിയിട്ടുണ്ട്. വൈകാതെ ഖത്തറിലും ഒമാനിലും പ്രവർത്തനം ആരംഭിക്കും.
കമ്പനി പ്രൊഫൈൽ അബീർ ഗ്രൂപ്പ് പ്രസിഡന്റ് ആലുങ്ങൽ മുഹമ്മദ് പ്രകാശനം ചെയ്തു. ഉദ്ഘാടന ചടങ്ങിൽ പാർട്ണർ ആന്റ് ഡയറക്ടർ അബ്ദുറഹ്മാൻ സയിമൽദഹാർ, പാർട്ണർ അഷ്റഫ് മൊയ്തീൻ, പോളണ്ട് മൂസ, ഡയറക്ടർ അബ്ദുറഹ്മാൻ ഖാലിദ്, ഫിനാൻസ് എക്സിക്യുട്ടിവ് നസ്മ, ഏഷ്യ പോളി ക്ലിനിക് എം.ഡി വി.പി ഷംസുദ്ദീൻ, വൈറ്റ് പെട്രോ ഫൗണ്ടർ ആന്റ് ഡയറക്ടർ ഫഹീം അബ്ദുൽ മജീദ്, അമീർ ഇഹ്സാൻ അയമോൻ, ഉണ്ണീൻ പാലക്കൽ, അബ്രഹാം കുര്യൻ എന്നിവർ പ്രസംഗിച്ചു.