കൊച്ചി– സംസ്ഥാനത്ത് സ്വർണവിലയിൽ ചരിത്രത്തിലെ ഏറ്റവും വലിയ കുതിച്ചുചാട്ടം. പവന് ഒറ്റയടിക്ക് 8,640 രൂപ വർധിച്ച് വില 1,31,160 രൂപ എന്ന റെക്കോർഡ് നിലവാരത്തിലെത്തി. ഗ്രാമിന് 1,080 രൂപ ഉയർന്ന് 16,395 രൂപയായാണ് ഇന്ന് വ്യാപാരം നടക്കുന്നത്. സ്വർണവിലയുടെ ചരിത്രത്തിൽ ഇത്രയും വലിയൊരു വർധനവ് ഒരൊറ്റ ദിവസം രേഖപ്പെടുത്തുന്നത് ഇതാദ്യമാണ്.
ആഗോളതലത്തിലെ ഭൗമ രാഷ്ട്രീയ അരക്ഷിതാവസ്ഥയാണ് സ്വർണവിലയെ ഇത്രമേൽ സ്വാധീനിക്കുന്നത്. യുഎസ് പ്രസിഡന്റ് ഡൊണാൾഡ് ട്രംപിന്റെ പുതിയ സാമ്പത്തിക നയങ്ങളും ഗ്രീൻലാൻഡിന് മേലുള്ള അവകാശവാദത്തെച്ചൊല്ലിയുള്ള തർക്കങ്ങളും വിപണിയിൽ ആശങ്ക പടർത്തിയിട്ടുണ്ട്. സുരക്ഷിത നിക്ഷേപം എന്ന നിലയിൽ വലിയ തോതിൽ നിക്ഷേപകർ ഓഹരി വിപണിയിൽ നിന്ന് പിന്മാറി സ്വർണത്തിലേക്ക് ചുവടുമാറ്റുന്നതും വിലക്കയറ്റത്തിന് ആക്കം കൂട്ടി.
നിക്ഷേപകർക്ക് ഈ വിലക്കയറ്റം നേട്ടമാകുമെങ്കിലും സാധാരണക്കാരെ സംബന്ധിച്ചിടത്തോളം സ്വർണം അപ്രാപ്യമാകുന്ന നിലയിലാണ് കാര്യങ്ങൾ. പണിക്കൂലിയും ജിഎസ്ടിയും കൂടി കണക്കാക്കുമ്പോൾ ഒരു പവൻ സ്വർണം വാങ്ങാൻ ഇപ്പോൾ ഒന്നര ലക്ഷം രൂപയ്ക്കടുത്ത് ചെലവാക്കേണ്ടി വരും. വരാനിരിക്കുന്ന വിവാഹ സീസണുകളിൽ ഈ വിലവർധനവ് വലിയ പ്രതിസന്ധിയുണ്ടാക്കുമെന്നാണ് വിപണി നിരീക്ഷകർ വിലയിരുത്തുന്നത്.