കൊച്ചി– സ്വർണവില തുടർച്ചയായ അഞ്ചാം ദിവസവും കുതിച്ചുയർന്നു. ഇന്ന് (ഒക്ടോബർ 7) ഒരു ഗ്രാം സ്വർണത്തിന് 115 രൂപയും ഒരു പവന് 920 രൂപയും വർധിച്ചു. ഇതോടെ ഒരു ഗ്രാം 11,185 രൂപയും ഒരു പവൻ 89,480 രൂപയുമായി. ഇതിനാൽ, ഒരു പവൻ സ്വർണാഭരണം വാങ്ങാൻ നികുതിയും പണിക്കൂലിയും ചേർത്ത് ഏകദേശം ഒരു ലക്ഷം രൂപ ചെലവ് വരും.
ഇന്നലെ ഒരു ഗ്രാമിന് 125 രൂപ വർധിച്ച് 11,070 രൂപയും ഒരു പവന് 1,000 രൂപ കൂടി 88,560 രൂപയുമായിരുന്നു. കഴിഞ്ഞ ഒരു മാസത്തിനിടെ ഒരു പവന് 11,840 രൂപയാണ് വർധിച്ചത്. സെപ്റ്റംബർ ആദ്യം 77,640 രൂപയായിരുന്ന 22 കാരറ്റ് സ്വർണത്തിന്റെ (8 ഗ്രാം) വില, മാസാവസാനത്തോടെ 86,760 രൂപയായി ഉയർന്നു.
ഒക്ടോബറിലും വിലക്കയറ്റം തുടരുകയാണ്. ഒക്ടോബർ 1ന് 87,000 രൂപയിൽ വ്യാപാരം തുടങ്ങി. ഈ മാസത്തെ ഏറ്റവും കുറഞ്ഞ നിരക്ക് ഒക്ടോബർ 3ന് 86,560 രൂപയായിരുന്നു. എന്നാൽ, തൊട്ടടുത്ത ദിവസങ്ങളിൽ വില വീണ്ടും കുതിച്ചു.
18 കാരറ്റ് സ്വർണത്തിന് ഗ്രാമിന് 100 രൂപ കൂടി 9,200 രൂപയും 14 കാരറ്റിന് 70 രൂപ വർധിച്ച് 7,170 രൂപയുമായി. ആഗോള വിപണിയിൽ സ്വർണം റെക്കോഡ് നിരക്കിൽ വ്യാപാരം തുടരുന്നു. ഒരു ട്രോയ് ഔൺസിന് 3,974.78 ഡോളർ എന്ന ചരിത്ര ഉയർന്ന വിലയിലാണ് വ്യാപാരം നടക്കുന്നത്.