മൈസൂരു– മൈസൂരു-ബംഗളൂരു പാതയിലെ ചന്നപട്ടണയ്ക്ക് സമീപം പുലർച്ചെ മൂന്ന് മണിയോടെയുണ്ടായ സ്വകാര്യ ബസ് അപകടത്തിൽ നാല് മലയാളി യാത്രക്കാർക്ക് ദാരുണാന്ത്യം. കോഴിക്കോട് നിന്ന് ബംഗളൂരുവിലേക്ക് സർവീസ് നടത്തിയിരുന്ന പി.കെ. ട്രാവൽസിൻ്റെ സ്ലീപ്പർ ബസാണ് അപകടത്തിൽപ്പെട്ടത്. കൊയിലാണ്ടി സ്വദേശികളായ മുഹമ്മദ് ഫർഹാൻ (22), റഫീസ് (45), റഷീദ് (45) എന്നിവരും മാഹി സ്വദേശിയായ സാക്കിറുമാണ് (27) മരണപ്പെട്ടത്. ഡ്രൈവർ ഉറങ്ങിപ്പോയതിനെത്തുടർന്ന് നിയന്ത്രണം നഷ്ടപ്പെട്ട ബസ് റോഡ് ഡിവൈഡറിലേക്ക് ഇടിച്ചുകയറുകയായിരുന്നുവെന്നാണ് പ്രാഥമിക വിവരം.
അപകടത്തിന്റെ ആഘാതത്തിൽ ബസിന്റെ മുൻഭാഗം പൂർണ്ണമായും തകർന്ന നിലയിലാണ്. പെരുന്നാൾ അവധി കഴിഞ്ഞ് ബംഗളൂരുവിലെ വിവിധ ജോലിസ്ഥലങ്ങളിലേക്കും കോളജുകളിലേക്കും മടങ്ങിപ്പോകുകയായിരുന്നവരാണ് ബസിലുണ്ടായിരുന്ന യാത്രക്കാരിൽ ഭൂരിഭാഗവും. മറ്റ് യാത്രക്കാർക്ക് നിസാരമായ പരിക്കുകൾ മാത്രമാണ് ഏറ്റത്. പരിക്കേറ്റവരെ ഉടൻ തന്നെ അടുത്തുള്ള ആശുപത്രികളിലേക്ക് മാറ്റി വിദഗ്ധ ചികിത്സ ലഭ്യമാക്കി. സംഭവസ്ഥലത്തെത്തിയ പോലീസ് അപകടത്തിൽ പ്രാഥമിക അന്വേഷണം ആരംഭിച്ചിട്ടുണ്ട്.