അബുദാബി- ബിഗ് ടിക്കറ്റിന്റെ ഏറ്റവും പുതിയ തത്സമയ നറുക്കെടുപ്പിൽ പ്രവാസി മലയാളികൾക്ക് കോടികളുടെ സമ്മാനങ്ങൾ. ദുബായിൽ ഡ്രൈവറായി ജോലി ചെയ്യുന്ന അബ്ദുൽ റഷീദ് അലിപ്ര വളപ്പിൽ അബ്ദുവാണ് 2.5 കോടി ദിർഹത്തിന്റെ (ഏകദേശം 64.6 കോടി ഇന്ത്യൻ രൂപ) ബമ്പർ സമ്മാനം സ്വന്തമാക്കിയത്. കഴിഞ്ഞ 17 വർഷമായി യുഎഇയിലുള്ള ഇദ്ദേഹം, കഴിഞ്ഞ ആറ് വർഷമായി മുടങ്ങാതെ ടിക്കറ്റ് എടുക്കാറുണ്ടായിരുന്നു. സുഹൃത്തുക്കളോടൊപ്പം സമയം ചെലവഴിക്കുന്നതിനിടയിലാണ് ജീവിതം മാറ്റിമറിച്ച ഈ വാർത്ത റഷീദിനെ തേടിയെത്തിയത്. നാട്ടിലുള്ള കുടുംബത്തോടൊപ്പം ഈ സന്തോഷം പങ്കുവെക്കാനായതിന്റെ ആവേശത്തിലാണ് ഈ 48-കാരൻ.
മറ്റൊരു മലയാളിയായ അഷ്റഫ് അബ്ദുള്ളയെ തേടി ആഡംബര കാറായ ലാൻഡ് റോവർ ഡിഫൻഡറാണ് എത്തിയത്. അബുദാബിയിൽ ഡ്രൈവറായി ജോലി ചെയ്യുന്ന ഇദ്ദേഹം കഴിഞ്ഞ 9 വർഷമായി തുടർച്ചയായി ബിഗ് ടിക്കറ്റിൽ പങ്കാളിയാകാറുണ്ട്. തന്റെ ഭാഗ്യം ഒരു ദിവസം തെളിയുമെന്ന പ്രതീക്ഷയിലായിരുന്നു അഷ്റഫ്. 40 പേരടങ്ങുന്ന ഗ്രൂപ്പിന്റെ ഭാഗമായി എടുത്ത ടിക്കറ്റിനാണ് സമ്മാനം ലഭിച്ചത് എന്നതിനാൽ, സമ്മാനത്തുക ഗ്രൂപ്പിലെ സുഹൃത്തുക്കളുമായി പങ്കുവെക്കാനാണ് അഷ്റഫിന്റെ തീരുമാനം. അപ്രതീക്ഷിതമായി ലഭിച്ച ഈ വിജയത്തിൽ ഏറെ സന്തോഷമുണ്ടെന്ന് അദ്ദേഹം പ്രതികരിച്ചു.
ഇന്നലെ നടന്ന നറുക്കെടുപ്പിലെ മറ്റ് സമ്മാനങ്ങളും ഇന്ത്യക്കാരുടെ കുത്തകയായിരുന്നു. പത്ത് ലക്ഷം ദിർഹം വീതം ലഭിച്ച അഞ്ച് സമാശ്വാസ സമ്മാന ജേതാക്കളും ഇന്ത്യക്കാരാണ്. ലിയോ ലോറൻസ്, റിതേഷ് ലോബോ, രജത് സതീഷ്, ചൈതന്യ രാമചന്ദ്രൻ, മുരളി വാഴയിൽ എന്നിവരാണ് ഈ ഭാഗ്യശാലികൾ. ഇതിൽ മുരളി വാഴയിലും ലിയോ ലോറൻസും മലയാളികളാണ്. ഒമാനിൽ നിന്നും അജ്മാനിൽ നിന്നും ദുബായിൽ നിന്നുമുള്ള പ്രവാസികളാണ് ഇവർ. ഇതോടെ ബിഗ് ടിക്കറ്റ് ചരിത്രത്തിലെ അവിസ്മരണീയമായ ഒരു രാത്രിയായി ഇത് മാറി.
വരും മാസങ്ങളിലും വൻ സമ്മാനങ്ങളുമായി ബിഗ് ടിക്കറ്റ് സജീവമായി രംഗത്തുണ്ടാകും. മെയ് മാസത്തിലെ ക്യാമ്പെയ്നിൽ രണ്ട് കോടി ദിർഹമാണ് ഗ്രാൻഡ് പ്രൈസായി പ്രഖ്യാപിച്ചിരിക്കുന്നത്. ജൂൺ മൂന്നിന് നടക്കുന്ന നറുക്കെടുപ്പിലൂടെ ഇതിന്റെ വിജയിയെ അറിയാൻ സാധിക്കും. ഇതുകൂടാതെ ലക്ഷക്കണക്കിന് ദിർഹം സമ്മാനം ലഭിക്കുന്ന പ്രതിവാര ഇ-ഡ്രോകളും ആഡംബര കാറുകൾ നേടാനുള്ള അവസരങ്ങളും ബിഗ് ടിക്കറ്റ് പങ്കാളികൾക്കായി ഒരുക്കിയിട്ടുണ്ട്.