വാഷിംഗ്ടണ് – ഇറാനെതിരെ കടുത്ത മുന്നറിയിപ്പുമായി അമേരിക്കൻ പ്രസിഡന്റ് ഡൊണാൾഡ് ട്രംപ്. വെടിനിർത്തൽ കരാറിൽ ഒപ്പിടാൻ താൻ നൽകിയ സമയപരിധിയായ ചൊവ്വാഴ്ച വൈകുന്നേരത്തിനുള്ളിൽ തീരുമാനമായില്ലെങ്കിൽ ഇറാനെ പൂർണ്ണമായും നശിപ്പിക്കുമെന്നാണ് ട്രംപിന്റെ ഭീഷണി. വാഷിംഗ്ടണിൽ നടന്ന പത്രസമ്മേളനത്തിലാണ് ട്രംപ് ഇക്കാര്യം പറഞ്ഞത്. ഇറാനിൽ നിന്ന് അമേരിക്കൻ പൈലറ്റുമാരെ വിജയകരമായി രക്ഷപ്പെടുത്തിയതിനെക്കുറിച്ച് വിശദീകരിക്കാനാണ് വൈറ്റ് ഹൗസിൽ വാർത്താസമ്മേളനം വിളിച്ചത്. ഒറ്റ രാത്രികൊണ്ട് ഇറാനെ തകർക്കാൻ അമേരിക്കയ്ക്ക് സാധിക്കുമെന്നും ആ രാത്രി ഒരുപക്ഷേ ഈ ചൊവ്വാഴ്ച ആയിരിക്കാമെന്നും അദ്ദേഹം കൂട്ടിച്ചേർത്തു. കരാർ അംഗീകരിച്ചില്ലെങ്കിൽ ഇറാനെ ശിലായുഗത്തിലേക്ക് മടക്കി അയക്കാനുള്ള പദ്ധതികൾ തന്റെ പക്കലുണ്ടെന്നും അദ്ദേഹം പറഞ്ഞു. എങ്കിലും വൈദ്യുതി നിലയങ്ങളും പാലങ്ങളും ബോംബിട്ടു തകർക്കേണ്ടി വരില്ലെന്നാണ് പ്രതീക്ഷിക്കുന്നതെന്നും ട്രംപ് വ്യക്തമാക്കി.
ഹോർമുസ് കടലിടുക്ക് വഴിയുള്ള ഗതാഗതം പുനഃസ്ഥാപിക്കുന്നതിനും എണ്ണയുടെ സ്വതന്ത്രമായ നീക്കത്തിനുമാണ് താൻ മുൻഗണന നൽകുന്നത്. നിശ്ചിത സമയത്തിനുള്ളിൽ സ്വീകാര്യമായ കരാറിലെത്തണം എന്നതാണ് അമേരിക്കയുടെ ആവശ്യം. ഇറാൻ ഭരണകൂടം വലിയ മാറ്റങ്ങൾക്ക് വിധേയമായിട്ടുണ്ടെന്നും നല്ല ഉദ്ദേശത്തോടെയാണ് ചർച്ചകൾ നടക്കുന്നതെന്നും ട്രംപ് പറയുന്നുണ്ടെങ്കിലും, അവിടുത്തെ ജനങ്ങൾ ഭരണകൂടത്തിനെതിരെ കലാപം നടത്തണമെന്ന് അദ്ദേഹം ആഹ്വാനം ചെയ്തു. ഇറാനിൽ പ്രതിഷേധക്കാർ കൊല്ലപ്പെട്ടതിൽ അദ്ദേഹം അതൃപ്തി പ്രകടിപ്പിച്ചു. അവർക്ക് ആയുധങ്ങൾ എത്തിച്ചുനൽകാൻ അമേരിക്ക ശ്രമിച്ചിരുന്നെങ്കിലും അത് പരാജയപ്പെട്ടതിൽ അദ്ദേഹം നിരാശ പ്രകടിപ്പിച്ചു. കരാർ അംഗീകരിക്കാത്ത പക്ഷം ഇറാനിലെ സിവിലിയൻ അടിസ്ഥാന സൗകര്യങ്ങളെപ്പോലും ലക്ഷ്യം വയ്ക്കുന്നതിൽ തനിക്ക് ആശങ്കയില്ലെന്നും ഇറാൻ ഇതിന് വലിയ വില നൽകേണ്ടി വരുമെന്നും അദ്ദേഹം മുന്നറിയിപ്പ് നൽകി.
ഇറാനുമായി ഇപ്പോൾ നടക്കുന്ന ചർച്ചകൾ വളരെ നിർണ്ണായകമാണെന്നാണ് ട്രംപിന്റെ വിലയിരുത്തൽ. ഖുദ്സ് ഫോഴ്സ് കമാൻഡർ ഖാസിം സുലൈമാനിയുടെ വധം ഇറാനെ ചർച്ചയുടെ പാതയിലേക്ക് കൊണ്ടുവരാൻ സഹായിച്ചുവെന്നും അദ്ദേഹം അവകാശപ്പെട്ടു. സ്റ്റീവ് വിറ്റ്കോഫ്, ജാരെഡ് കുഷ്നർ എന്നിവരാണ് നിലവിൽ ചർച്ചകൾക്ക് നേതൃത്വം നൽകുന്നത്. വരും ദിവസങ്ങളിൽ വൈസ് പ്രസിഡന്റ് ജെ.ഡി വാൻസും ഇവർക്കൊപ്പം ചേരാൻ സാധ്യതയുണ്ട്. ഇറാൻ തന്റെ ആവശ്യങ്ങൾ അംഗീകരിച്ചാൽ യുദ്ധം അവസാനിപ്പിക്കുമെന്നും അമേരിക്കൻ സൈന്യത്തെ തിരികെ വിളിക്കുമെന്നും ട്രംപ് പറഞ്ഞു. ഇറാനിൽ ഇനിയും ചില മിസൈലുകളും ഡ്രോണുകളും ബാക്കിയുണ്ടെന്നും അദ്ദേഹം ഓർമ്മിപ്പിച്ചു. അതേസമയം, ഇറാൻ ഇന്ന് ഏറ്റവും വലിയ വ്യോമാക്രമണത്തിന് സാക്ഷ്യം വഹിക്കുമെന്നും ആക്രമണത്തിന്റെ തീവ്രത ഇനിയും കൂടുമെന്നും യുഎസ് പ്രതിരോധ സെക്രട്ടറി പീറ്റ് ഹെഗ്സെത്തും വ്യക്തമാക്കി.