തെഹ്റാന് – ശത്രുക്കളുടെ സുരക്ഷ ഇല്ലാതാക്കണമെന്ന്, ഇറാന് ഇന്റലിജന്സ് മന്ത്രിയുടെ കൊലപാതകത്തെ തുടര്ന്ന് ഇറാന്റെ പുതിയ പരമോന്നത നേതാവ് മുജ്തബ ഖാംനഇ. ഇറാന് ഇന്റലിജന്സ് മന്ത്രി ഇസ്മായില് ഖതീബിനെ ഇസ്രായില് വധിച്ചതിന് ശേഷം, പുറപ്പെടുവിച്ച പരമോന്നത നേതാവിന്റെ പ്രസ്താവന പ്രസിഡന്റ് മസൂദ് പെസെഷ്കിയാന് അയച്ച് നല്കി. യുദ്ധത്തിന്റെ ആദ്യ ദിവസം, ഫെബ്രുവരി 28 ന് ഇസ്രായിലി വ്യോമാക്രമണത്തില് പിതാവ് അലി ഖാംനഇ (86) കൊല്ലപ്പെട്ട ശേഷം, പരമോന്നത നേതാവായി നാമനിര്ദേശം ചെയ്യപ്പെട്ടതിനുശേഷം മുജ്തബ ഖാംനഇ പരസ്യമായി പ്രത്യക്ഷപ്പെട്ടിട്ടില്ല. മുജ്തബ ഖാംനഇക്ക് യുദ്ധത്തില് ഗുരുതരമായി പരിക്കേറ്റതായി യു.എസ്, ഇസ്രായില് ഉദ്യോഗസ്ഥര് സൂചിപ്പിച്ചു.
ബുധനാഴ്ച ഇറാന്റെ ഇന്റലിജന്സ് മേധാവി ഇസ്മായില് ഖതീബ് ഇസ്രായിലി ആക്രമണത്തില് കൊല്ലപ്പെട്ടതോടെ ഇറാന് മറ്റൊരു തിരിച്ചടി നേരിട്ടു. ഏതൊരു ഉന്നത ഇറാന് ഉദ്യോഗസ്ഥനെയും വധിക്കാന് ഇസ്രായില് തങ്ങളുടെ സൈന്യത്തിന് അധികാരം നല്കിയിട്ടുണ്ട്. സുപ്രീം നാഷണല് സെക്യൂരിറ്റി കൗണ്സില് സെക്രട്ടറി അലി ലാരിജാനി ഇസ്രായിലി ആക്രമണത്തില് കൊല്ലപ്പെട്ടതായി ഇറാന് സ്ഥിരീകരിച്ചതിന് ഒരു ദിവസത്തിന് ശേഷമാണ് ഇസ്മായില് ഖതീബിന്റെ മരണവാര്ത്ത പുറത്തുവന്നത്.