ജിദ്ദ – ഗള്ഫ് സഹകരണ കൗണ്സിലിനും (ജി.സി.സി) ഇന്ത്യക്കും ഇടയിലുള്ള സ്വതന്ത്ര വ്യാപാര കരാര് ചര്ച്ചകള്ക്ക് തുടക്കമിട്ട് ജി.സി.സി സെക്രട്ടറി ജനറല് ജാസിം അല്ബുദൈവിയും ഇന്ത്യന് വാണിജ്യ, വ്യവസായ മന്ത്രി പിയൂഷ് ഗോയലും ന്യൂഡല്ഹിയില് സംയുക്ത പ്രസ്താവനയില് ഒപ്പുവെച്ചു.
ഇത് ജി.സി.സിയും ഇന്ത്യയും തമ്മിലുള്ള തന്ത്രപരമായ പങ്കാളിത്തത്തിലെ പുതിയ ഘട്ടത്തെ അടയാളപ്പെടുത്തുന്നു. സ്വതന്ത്ര വ്യാപാര കരാര് മെച്ചപ്പെട്ട സഹകരണത്തിനും ശക്തമായ സാമ്പത്തിക, വ്യാപാര ബന്ധങ്ങള്ക്കും സഹായിക്കും. 2026 ഫെബ്രുവരി 5 ന് ന്യൂഡല്ഹിയില് ഒപ്പുവച്ച റഫറന്സ് നിബന്ധനകള് ഈ ചര്ച്ചകള്ക്ക് സമഗ്രവും വ്യക്തവുമായ ചട്ടക്കൂട് നല്കുന്നതായി ഒപ്പുവെക്കല് ചടങ്ങിനിടെ അല്ബുദൈവി പറഞ്ഞു. ചരക്ക് വ്യാപാരം, കസ്റ്റംസ് നടപടിക്രമങ്ങള്, സേവന വ്യാപാരം, ഡിജിറ്റല് വ്യാപാരം തുടങ്ങിയ സുപ്രധാന തന്ത്രപരമായ മേഖലകളിലെ സഹകരണം ശക്തിപ്പെടുത്താനുള്ള വഴികള് വിശകലനം ചെയ്യുന്നതും ചട്ടക്കൂടില് ഉള്പ്പെടുന്നതായി ജി.സി.സി സെക്രട്ടറി ജനറല് പറഞ്ഞു. സാനിറ്ററി, ഫൈറ്റോസാനിറ്ററി നടപടികള്, ബൗദ്ധിക സ്വത്തവകാശങ്ങള്, സൂക്ഷ്മ, ചെറുകിട, ഇടത്തരം സംരംഭങ്ങളിലെ സഹകരണം എന്നിവയും ചട്ടക്കൂടില് ഉള്പ്പെടുന്നു. ഇത് കരാറിന്റെ സമഗ്ര സ്വഭാവത്തെയും ഭാവിയിലെ സമ്പദ്വ്യവസ്ഥയുമായി പൊരുത്തപ്പെടാനുള്ള അതിന്റെ കഴിവിനെയും പ്രതിഫലിപ്പിക്കുന്നു.
ഈ വര്ഷം രണ്ടാം പകുതിയില് റിയാദിലെ ജി.സി.സി ആസ്ഥാനത്ത് ആദ്യ റൗണ്ട് ചര്ച്ചകള്ക്ക് ആതിഥേയത്വം വഹിക്കാന് ജി.സി.സി ജനറല് സെക്രട്ടേറിയറ്റ് പൂര്ണ്ണമായും സന്നദ്ധമാണ്. താരിഫ്, നോണ്-താരിഫ് തടസ്സങ്ങള് ഇല്ലാതാക്കുന്നതും ഇരു ദിശകളിലേക്കും ഗുണനിലവാരമുള്ള നിക്ഷേപങ്ങളുടെ ഒഴുക്ക് വര്ധിപ്പിക്കുന്നതും പരസ്പരം പ്രയോജനകരമായ രീതിയില് ജി.സി.സിയും ഇന്ത്യയും തമ്മിലുള്ള വ്യാപാര, നിക്ഷേപ സഹകരണത്തില് കൂടുതല് ഉദാരവല്ക്കരണം കൈവരിക്കുന്നതും ആയ സമഗ്രവും അഭിലഷണീയവുമായ ഒരു സ്വതന്ത്ര വ്യാപാര കരാറില് എത്തിച്ചേരാന് ഈ ചര്ച്ചകള് സഹായിക്കുമെന്ന് ജാസിം അല്ബുദൈവി പ്രത്യാശ പ്രകടിപ്പിച്ചു. ഇത് ഉത്തേജകമായ സാമ്പത്തിക അന്തരീക്ഷവും നിക്ഷേപ അന്തരീക്ഷവും പ്രദാനം ചെയ്യും. ഇത് ബിസിനസ് മേഖലക്ക് വിശാലമായ ചക്രവാളങ്ങള് തുറക്കുകയും വിതരണ ശൃംഖലകളെ പിന്തുണക്കുകയും ജി.സി.സി രാജ്യങ്ങളുടെ അഭിലഷണീയമായ വികസന ദര്ശനങ്ങള്ക്ക് അനുസൃതമായി സാമ്പത്തിക വളര്ച്ച ത്വരിതപ്പെടുത്തുകയും ചെയ്യും.
ഗള്ഫ് സഹകരണ കൗണ്സിലും ഇന്ത്യയും തമ്മിലുള്ള സംയുക്ത സഹകരണ ബന്ധങ്ങള് അവലോകനം ചെയ്ത യോഗത്തില്, ഉഭയകക്ഷി സഹകരണം വിശാലമായ ചക്രവാളങ്ങളിലേക്ക് ഉയര്ത്താനും പരസ്പര താല്പ്പര്യങ്ങള് നിറവേറ്റാനും ഇരുപക്ഷവും തമ്മിലുള്ള തന്ത്രപരമായ പങ്കാളിത്തത്തിനുള്ള അവസരങ്ങള് ശക്തിപ്പെടുത്താനുമുള്ള വഴികള് ചര്ച്ച ചെയ്തു. സ്വതന്ത്ര വ്യാപാര കരാറുമായി ബന്ധപ്പെട്ട ചര്ച്ചകളില് ഇരു രാജ്യങ്ങളിലെയും ചര്ച്ചാ സംഘങ്ങള് വഹിച്ച പങ്കിനെ ജാസിം അല്ബുദൈവിയും പിയൂഷ് ഗോയലും പ്രശംസിച്ചു. ഗള്ഫ് സഹകരണ കൗണ്സിലിനും ഇന്ത്യക്കും ഇടയിലുള്ള വ്യാപാരത്തിന്റെ സുഗമമായ ഒഴുക്കിനെ പിന്തുണക്കുകയും സാമ്പത്തിക ഏകീകരണം വര്ധിപ്പിക്കുകയും ചെയ്യുന്ന സമഗ്ര കരാറിലെത്താന് സഹായിക്കുന്ന നിലക്ക് ഈ പാതയില് പ്രകടമായ പുരോഗതി കൈവരിക്കാന് നടത്തിയ ശ്രമങ്ങളെ ഇരുവരും അഭിനന്ദിച്ചു.