ഫ്ലോറിഡ– മേജർ ലീഗ് സോക്കർ ഈസ്റ്റേൺ കോൺഫറൻസ് കലാശ പോരാട്ടത്തിൽ ഇന്റർ മയാമിക്ക് തകർപ്പൻ ജയത്തോടെ കിരീടം. ഫ്ലോറിഡയിൽ വെച്ച് നടന്ന പോരാട്ടത്തിൽ കരുത്തരായ ന്യൂയോർക്ക് സിറ്റിയെ ഒന്നിനെതിരെ അഞ്ചു ഗോളുകൾക്ക് പരാജയപ്പെടുത്തിയാണ് മെസ്സിയും സംഘവും കിരീടം ചൂടിയത്. ജയത്തോടെ ഞായറാഴ്ച നടക്കുന്ന എംഎൽഎസ് കപ്പ് പോരാട്ടത്തിനായി മയാമി ഇറങ്ങും. വാൻകൂവർ വൈറ്റ്കാപ്സാണ് കപ്പ് പോരാട്ടത്തിലെ എതിരാളികൾ.
മത്സരത്തിൽ മയാമിയുടെ അഞ്ചിൽ നാലും ഗോളുകളും പിറന്നത് അർജന്റീനിയൻ താരങ്ങളുടെ ബൂട്ടിൽ നിന്നാണ്. ടാഡിയോ അല്ലെൻഡെ ഹാട്രിക് നേടി കളം നിറഞ്ഞപ്പോൾ മറ്റു രണ്ടു ഗോളുകൾ നേടിയത് മാറ്റിയോ സിൽവെറ്റിയും വെനസ്വേലൻ താരമായ ടെലാസ്കോ സെഗോവിയ എന്നിവരാണ്. സൂപ്പർതാരം ലയണൽ മെസ്സി ഒരു അസിസ്റ്റും നേടി മികച്ച പ്രകടനം കാഴ്ചവച്ചു. ന്യൂയോർക്ക് സിറ്റിയുടെ ആശ്വാസഗോൾ നേടിയത് ജസ്റ്റിൻ ഹാക്കാണ്.
മത്സരത്തിന്റെ ആരംഭം മുതൽ തന്നെ ആക്രമിച്ച് കളിക്കുന്ന മയാമിയെയാണ് ഗ്രൗണ്ടിൽ കണ്ടത്. പതിമൂന്നാം മിനിറ്റിൽ മെസ്സിയുടെ ഫ്രീകിക്ക് ഒരു ഹെഡ്ഡറിലൂടെ സിൽവെറ്റി വലയിലാക്കാൻ ശ്രമിച്ചെങ്കിലും കൃത്യമായി ഗോൾ കീപ്പറുടെ കയ്യിൽ എത്തി. എന്നാൽ തൊട്ടടുത്ത നിമിഷം തന്നെ സെർജിയോ ബുസ്കെറ്റ്സ് നീട്ടി നൽകിയ പന്ത് ഒരു ഉഗ്രൻ ഷോട്ടിലൂടെ ഗോളിയെ കാഴ്ചക്കാരനാക്കി അല്ലെൻഡെ അക്കൗണ്ട് തുറന്നു. 23-ാം മിനുറ്റിൽ ലെഫ്റ്റ് ബാക്ക് ജോർഡി ആൽബ നൽകിയ പന്ത് കൃത്യമായി തല വെച്ച് അല്ലെൻഡെ തന്നെ ലീഡ് ഇരട്ടിയാക്കി. 37-ാം മിനുറ്റിൽ ജസ്റ്റിൻ ഹാക്ക്‌ ഗോൾ നേടി എതിരാളികൾക്ക് പ്രതീക്ഷ നൽകി. ഒന്നാം പകുതിയിൽ പിന്നീട് ഗോളുകൾ ഒന്നും വന്നില്ല.
രണ്ടാം പകുതിയിൽ ഇരു ടീമുകളും ആക്രമിച്ചാണ് കളിച്ചത്. 67-ാം മിനുറ്റിൽ ആൽബ മെസ്സിക്ക് നൽകിയ പന്ത് പ്രതിരോധ താരങ്ങളെ കബളിപ്പിച്ച് സിൽവെറ്റിക്ക്‌ നൽകി. പന്ത് കൃത്യമായി താരം വലയിൽ എത്തിച്ചതോടെ സ്കോർ 3-1. ഇതോടെ ലോക ഫുട്ബോൾ ചരിത്രത്തിൽ ഏറ്റവും ഏറ്റവും കൂടുതൽ അസിസ്റ്റ് എന്നാ റെക്കോർഡ് മെസ്സിയുടെ പേരിലായി. 404 അസിസ്റ്റുള്ള ഹംഗേറിയൻ ഇതിഹാസ താരം ഫ്രാങ്ക് പുഷ്കാസിന്റെ റെക്കോർഡ് ആണ് മെസ്സി തകർത്തത്.
മൂന്നാം ഗോൾ വീണതോടെ മത്സരത്തിൽ ആധിപത്യം പുലർത്തിയ മയാമിക്ക് വേണ്ടി 83-ാം മിനുറ്റിൽ സെഗോവിയയും വല കുലുക്കിയതോടെ മെസ്സിയും സംഘവും വിജയം ഉറപ്പിച്ചു. ഈ ഗോളിനും അസിസ്റ്റ് നൽകിയത് ആൽബയാണ്. മത്സരം അവസാനിക്കാ നിമിഷങ്ങൾ മാത്രം ബാക്കി നിൽക്കെ അല്ലെൻഡെ അടുത്ത ഗോൾ നേടി ഹാട്രിക് തികച്ചു.
ചരിത്രത്തിൽ ആദ്യമായി ഇന്റർ മയാമി എംഎൽഎസ് ഈസ്റ്റേൺ കോൺഫറൻസ് കിരീടം നേടുന്നത്. മാത്രമല്ല അമേരിക്കൻ ക്ലബ് സ്വന്തമാക്കുന്ന മൂന്നാമത്തെ മാത്രം കിരീടം ആണിത്. ഈ മൂന്ന് കിരീടങ്ങളും നേടിയത് മെസ്സിയുടെ വരവിന് ശേഷമാണ്. മെസ്സിയുടെ കരിയറിലെ 47 മത്തെ കിരീടം കൂടിയാണിത്.