വാഷിംഗ്ടണ്‍ – കുടിയേറ്റം മുതല്‍ സാമ്പത്തിക നയം വരെയുള്ള എല്ലാ കാര്യങ്ങളിലും ഏറ്റുമുട്ടിയ രാഷ്ട്രീയ എതിരാളികളായ യു.എസ് പ്രസിഡന്റ് ഡൊണാള്‍ഡ് ട്രംപും ന്യൂയോര്‍ക്ക് സിറ്റി മേയര്‍ തെരഞ്ഞെടുപ്പില്‍ ഉജ്വല വിജയം നേടിയ സൊഹ്റാന്‍ മംദാനിയും വൈറ്റ് ഹൗസില്‍ വെച്ച് ആദ്യമായി നേരിട്ട് കൂടിക്കാഴ്ച നടത്തി.
മംദാനിക്ക് ഊഷ്മള സ്വീകരണമാണ് വൈറ്റ് ഹൗസില്‍ ലഭിച്ചത്. മംദാനിയുടെ തെരഞ്ഞെടുപ്പ് വിജയത്തെ ട്രംപ് പ്രശംസിച്ചു. ഈ മാസം ആദ്യം ന്യൂയോര്‍ക്കിലെ മേയര്‍ തിരഞ്ഞെടുപ്പില്‍ വിജയിച്ച ജനാധിപത്യ സോഷ്യലിസ്റ്റും അധികം അറിയപ്പെടാത്ത സംസ്ഥാന നിയമനിര്‍മ്മാതാവുമായ മംദാനി, ജീവിതച്ചെലവ് പ്രശ്നങ്ങളും പൊതുസുരക്ഷയും ചര്‍ച്ച ചെയ്യാന്‍ ട്രംപുമായി കൂടിക്കാഴ്ചക്ക് അപേക്ഷിക്കുകയായിരുന്നു. മാധ്യമങ്ങളില്‍ മാസങ്ങളോളം നീണ്ടുനിന്ന വാഗ്വാദങ്ങള്‍ക്കും ചെളിവാരിയെറിയലുകള്‍ക്കും ശേഷം, നിയുക്ത മേയറും യു.എസ് പ്രസിഡന്റും തങ്ങളുടെ അഭിപ്രായവ്യത്യാസങ്ങള്‍ മാറ്റിവെച്ച് ഓവല്‍ ഓഫീസില്‍ കൂടിക്കാഴ്ചയും ചര്‍ച്ചയും നടത്തി.
ഞാന്‍ വിചാരിച്ചതിലും കൂടുതല്‍ കാര്യങ്ങളില്‍ ഞങ്ങള്‍ പരസ്പര ധാരണയിലെത്തി – സ്വകാര്യ കൂടിക്കാഴ്ചക്ക് ശേഷം ഓവല്‍ ഓഫീസിലേക്ക് മാധ്യമപ്രവര്‍ത്തകരെ ക്ഷണിച്ച ട്രംപ് പറഞ്ഞു. ഞങ്ങള്‍ക്ക് പൊതുവായ ഒരു കാര്യമുണ്ട്, ഞങ്ങള്‍ ഇഷ്ടപ്പെടുന്ന ഈ നഗരം വളരെ നന്നായി മുന്നോട്ടുപോകണമെന്ന് ഞങ്ങള്‍ ആഗ്രഹിക്കുന്നു – ട്രംപ് പറഞ്ഞു. തന്റെ കസേരിയലിരുന്ന്, തന്റെ വലതുവശത്ത് നിന്നിരുന്ന മംദാനിയെ നോക്കി പുഞ്ചിരിച്ചുകൊണ്ട് ട്രംപ്, ഈ മാസം ആദ്യം നടന്ന മേയര്‍ തെരഞ്ഞെടുപ്പില്‍ വിജയിച്ചതിന് അഭിനന്ദനങ്ങള്‍ അറിയിച്ചു. അദ്ദേഹം വളരെ കടുപ്പമേറിയ ആളുകളോടും വളരെ സ്മാര്‍ട്ടായ ആളുകളോടും അവിശ്വസനീയമായ മത്സരം നടത്തി – ട്രംപ് കൂട്ടിച്ചേര്‍ത്തു.
പങ്കിട്ട ബഹുമാനത്തിന്റെയും സ്‌നേഹത്തിന്റെയും സ്ഥലമായ ന്യൂയോര്‍ക്ക് നഗരത്തിന്റെ കാര്യങ്ങളിലും ന്യൂയോര്‍ക്കുകാരുടെ ജീവിതഭാരം ലഘൂകരിക്കേണ്ടതിന്റെ ആവശ്യകതയിലും ശ്രദ്ധ കേന്ദ്രീകരിച്ച ഉല്‍പ്പാദനക്ഷമമായ കൂടിക്കാഴ്ചയാണ് ട്രംപുമായി നടത്തിയതെന്ന് മംദാനി പറഞ്ഞു. പക്ഷപാതപരമായ വ്യത്യാസങ്ങള്‍ മാറ്റിവെക്കുന്നതില്‍ സന്തോഷമുണ്ടെന്ന് ട്രംപ് പറഞ്ഞു. അദ്ദേഹം എത്രത്തോളം നന്നായി ചെയ്യുന്നുവോ അത്രയും ഞാന്‍ സന്തോഷവാനാണ് – യു.എസ് പ്രസിഡന്റ് പറഞ്ഞു.
വോട്ടെടുപ്പില്‍ മംദാനി വിജയത്തിലേക്ക് കുതിച്ചപ്പോള്‍, റിപ്പബ്ലിക്കന്‍കാരനായ ട്രംപ്, യു.എസിലെ ഏറ്റവും വലിയ നഗരമായ ന്യൂയോര്‍ക്കിനുള്ള ഫെഡറല്‍ ധനസഹായം തടയുമെന്ന് ഭീഷണി മുഴക്കി. നഗരത്തിലെ ഫെഡറല്‍ ഇമിഗ്രേഷന്‍ എന്‍ഫോഴ്സ്മെന്റ് ശ്രമങ്ങള്‍ ത്വരിതപ്പെടുത്താനുള്ള പദ്ധതികള്‍ ഉള്‍പ്പെടെ ട്രംപിന്റെ നിരവധി നയങ്ങളെ നിയുക്ത മേയര്‍ പതിവായി വിമര്‍ശിച്ചു. ന്യൂയോര്‍ക്ക് നിവാസികളില്‍ പത്തില്‍ നാല് പേര്‍ വിദേശികളാണ്. മുന്‍ ന്യൂയോര്‍ക്ക് നിവാസി കൂടിയായ 79 കാരനായ പ്രസിഡന്റ്, 34 കാരനായ മംദാനിയെ തീവ്ര ഇടതുപക്ഷ ഭ്രാന്തന്‍, കമ്മ്യൂണിസ്റ്റ്, ജൂത വിരോധി എന്നിങ്ങനെ മുദ്രകുത്തി. ആ വാദങ്ങള്‍ക്ക് ട്രംപ് തെളിവുകളൊന്നും നല്‍കിയിരുന്നില്ല.
മംദാനി കമ്മ്യൂണിസമല്ല, നോര്‍ഡിക് ശൈലിയിലുള്ള ജനാധിപത്യ സോഷ്യലിസമാണ് സ്വീകരിച്ചത്. ഇസ്രായിലിന്റെ കടുത്ത വിമര്‍ശകനാണെങ്കിലും, പ്രമുഖ ജൂത രാഷ്ട്രീയക്കാര്‍ അദ്ദേഹത്തെ പിന്തുണച്ചിരുന്നു. മംദാനി തന്റെ പുതിയ ഭരണകൂടത്തില്‍ ജൂത ഉദ്യോഗസ്ഥരെ നിയമിക്കുന്നു. ന്യൂയോര്‍ക്ക് പോലീസ് കമ്മീഷണര്‍ ജെസീക്ക ടിഷ്, ജൂതവിരുദ്ധതയെ ആവര്‍ത്തിച്ച് അപലപിച്ചിട്ടുണ്ട്.
നിയുക്ത മേയര്‍ വൈറ്റ് ഹൗസിലേക്ക് വരുന്നതിന് തൊട്ടുമുമ്പ് വെള്ളിയാഴ്ച ട്രംപ് തന്റെ ഭാഷ മയപ്പെടുത്തി. തങ്ങളുടെ കൂടിക്കാഴ്ച തികച്ചും സിവില്‍ ആയിരിക്കുമെന്ന് പ്രതീക്ഷിക്കുന്നതായി പറഞ്ഞ ട്രംപ്, മംദാനിയുടെ വിജയത്തെ അഭിനന്ദിക്കുകയും ചെയ്തു. ഞാന്‍ അദ്ദേഹത്തെ അല്‍പ്പം കഠിനമായി വിമര്‍ശിക്കുകയായിരുന്നു. നമ്മള്‍ നന്നായി ഒത്തുപോകുമെന്ന് ഞാന്‍ കരുതുന്നു. നോക്കൂ, നമ്മള്‍ ഒരേ കാര്യം അന്വേഷിക്കുകയാണ്. ന്യൂയോര്‍ക്കിനെ ശക്തമാക്കാന്‍ ഞങ്ങള്‍ ആഗ്രഹിക്കുന്നു – ട്രംപ് ഫോക്‌സ് ന്യൂസിനോട് പറഞ്ഞു. നേരത്തെ, വാഷിംഗ്ടണിലേക്ക് പോകുന്ന വിമാനത്തിന്റെ സീറ്റിലിരുന്ന് എടുത്ത ചിരിക്കുന്ന സെല്‍ഫി മംദാനി സോഷ്യല്‍ മീഡിയയില്‍ പോസ്റ്റ് ചെയ്തിരുന്നു.