സ്കൂളിൽ പോകുന്നതിനിടെ അപകടം; പിതാവിന്റെ കണ്മുന്നിൽ വെച്ച് രണ്ടാം ക്ലാസുകാരിക്ക് ദാരുണാന്ത്യം

പാലക്കാട്- സ്കൂളിൽ പോകുന്നതിനിടെ സ്‌കൂട്ടറിൽനിന്നു വീണ് ശരീരത്തിലൂടെ ബസ് കയറിയിറങ്ങി രണ്ടാം ക്ലാസുകാരിക്ക് ദാരുണാന്ത്യം.
പാലക്കാട്–പൊള്ളാച്ചി പാതയിൽ കൊഴിഞ്ഞാമ്പാറ കരുവപ്പാറയിൽ വെച്ച് രാവിലെയായിരുന്നു അപകടം. അച്ഛനോടൊപ്പം സ്കൂളിലേക്ക് പോകുകയായിരുന്നു കുട്ടി. കൊഴിഞ്ഞാമ്പാറ സെന്റ് പോൾസ് ഇംഗ്ലീഷ് മീഡിയം സ്കൂളിലെ രണ്ടാം ക്ലാസ് വിദ്യാർഥിനി നഫീസത് മിസ്രിയ (6) ആണ് മരിച്ചത്. പഴനിയിർപാളയം സബീർ അലി – ആയിഷ ദമ്പതികളുടെ മകളാണ്. മുമ്പിലുണ്ടായിരുന്ന ഓട്ടോ പെട്ടെന്ന് നിർത്തിയപ്പോൾ വാഹനം ഇടിക്കാതിരിക്കാൻ ബ്രേക്ക് ചെയ്ത സ്കൂട്ടർ ചരിയുകയായിരുന്നു. പിന്നാലെ കുട്ടി റോഡിലേക്ക് തെറിച്ചു വീഴുകയായിരുന്നു. തുടർന്നാണ് ബസ് കുട്ടിയുടെ ശരീരത്തിലൂടെ കയറിയിറങ്ങിയത്.