മസ്കത്ത്– ഒമാനിലെ അഷ്ഖാര ബീച്ചിൽ തിമിംഗലം ചത്ത നിലയിൽ കണ്ടെത്തി. തിമിംഗലത്തിന്റെ ശരീരത്തിൽ കയറുകൾ കുടുങ്ങിയതാണ് കാരണമെന്നാണ് കണ്ടെത്തൽ. കയറുകൾ കുടുങ്ങിയതിനെത്തുടർന്ന് തിമിംഗലത്തിന് ചലിക്കാനും ശ്വസിക്കാനും സാധിക്കാതെ വരികയായിരുന്നു. ഉപേക്ഷിക്കപ്പെട്ട മത്സ്യബന്ധന വലകളും കയറുകളും ഉൾപ്പെടെയുള്ള സമുദ്ര മാലിന്യങ്ങൾ സമുദ്ര ആവാസവ്യവസ്ഥയ്ക്ക് ഭീഷണിയാണെന്ന് ഈ സംഭവം എടുത്തുകാണിക്കുന്നു.
മത്സ്യത്തൊഴിലാളികളിലും കടൽ യാത്രക്കാരിലും പരിസ്ഥിതി അവബോധത്തിന്റെ പ്രാധാന്യം ഈ സംഭവങ്ങൾ അടിവരയിടുന്നതായി അതോറിറ്റി പറഞ്ഞു. സമുദ്രജീവികളെയും പാരിസ്ഥിതിക സന്തുലിതാവസ്ഥയെയും സംരക്ഷിക്കുന്നതിന് മത്സ്യബന്ധന ഉപകരണങ്ങൾ സുരക്ഷിതമായി സംസ്കരിക്കാനും കടലിലേക്ക് മാലിന്യങ്ങൾ നിക്ഷേപിക്കുന്നത് ഒഴിവാക്കാനും അതോറിറ്റി ആവശ്യപ്പെട്ടു.
ഒമാനിലെ സമുദ്ര പരിസ്ഥിതിയുടെ സംരക്ഷണത്തിന് ബോധവൽക്കരണ കാമ്പെയ്‌നുകളും ആനുകാലിക നിരീക്ഷണവും നടപ്പിലാക്കുമെന്ന് അതോറിറ്റി വ്യക്തമാക്കി.