ദുബൈ-കേരളത്തിൽ കളിക്കാനുള്ള മന്ത്രിതല ചർച്ചകൾ സജീവമായി നടക്കുന്നതായി അർജന്റീന ടീം മാർക്കറ്റിങ് ഡയറക്ടർ ലിയാൻഡ്രോ പീറ്റേഴ്സൺ. സർക്കാറുമായി ചർച്ചകൾ തുടർന്നുകൊണ്ടിരിക്കുകയാണ്. അടുത്ത ഫുട്ബാൾ ലോകകപ്പിന് മുമ്പ് ടീം കേരളത്തിൽ എത്തുമെന്നാണ് പ്രതീക്ഷ എന്നും അദ്ദേഹം പറഞ്ഞു.
ദുബൈയിൽ ലുലു ഫിനാൻഷ്യൽ ഹോൾഡിങ്സുമായി ധാരണ പത്രത്തിൽ ഒപ്പ് വെക്കുന്ന ചടങ്ങിൽ സംസാരിക്കുകയായിരുന്നു അദ്ദേഹം. ഇന്ത്യയിൽ പ്രത്യേകിച്ച് കേരളത്തിൽ അർജൻ്റീന ആരാധകർ ഏറെ ഉണ്ടെന്ന് എന്നുള്ളത് അഭിമാനകരമാണ്. അവരുടെ മുന്നിൽ കളിക്കണമെന്നുള്ളത് സന്തോഷകരമാണ്. അടുത്ത ലോകകപ്പ് കളിക്കാൻ ലയണൽ മെസ്സി ശാരീരികമായി ഫിറ്റ് ആണ് എന്നും ലിയാൻഡ്രോ പിറ്റേഴ്സൺ പറഞ്ഞു.
ഒക്ടോബറിൽ ലയണൽ മെസ്സിയും ടീമും കേരളത്തിൽ കളിക്കാനെത്തുമെന്ന് ഈവർഷമാദ്യമാണ് കായികമന്ത്രി വി. അബ്ദുറഹ്മാൻ പ്രഖ്യാപിച്ചത്. എന്നാൽ, പിന്നീട് ഇതുസംബന്ധിച്ച് ആശയക്കുഴപ്പങ്ങളും വിവാദങ്ങളുമുണ്ടായി.
ഒക്ടോബറിൽ അർജന്റീന ടീം ചൈനയിലായിരിക്കുമെന്ന റിപ്പോർട്ടുകളും പുറത്തുവന്നു. എന്നാൽ, അർജന്റീന ടീം കേരളത്തിലേക്ക് വരുമെന്ന് ജൂൺ ആറിന് കായികമന്ത്രി വി. അബ്ദുറഹ്മാൻ ഔദ്യോഗികമായി പ്രഖ്യാപിച്ചു. അതേസമയം, എന്നാണ് ടീം കേരളത്തിലെത്തുകയെന്ന് അദ്ദേഹം വ്യക്തമാക്കിയിരുന്നില്ല.