ന്യൂഡല്‍ഹി– ഇന്ത്യയിലെ അനേകായിരം സാധാരണക്കാരായ ഇസ്്‌ലാം മത വിശ്വാസികള്‍ക്ക് ആശ്വാസ വാര്‍ത്ത. വന്‍തുക ചെലവഴിക്കാതെ ഹജ്ജ് തീര്‍ത്ഥാടനത്തിന് അവസരമൊരുങ്ങുന്നു. കുറഞ്ഞ ചെലവിലും കുറഞ്ഞ ദിനങ്ങളിലും ഉള്ള പ്രത്യേക ഹജ്ജ് പാക്കേജ് ഒരുക്കിയാണ് ഇന്ത്യന്‍ ഹജ്ജ് കമ്മിറ്റി അടുത്ത ഹജ്ജിന് തയ്യാറെടുപ്പ് നടത്തുക. 20 ദിവസത്തെ ഹൃസ്വകാല പാക്കേജ് അടുത്ത ഹജ്ജ് (2026) മുതല്‍ ആരംഭിക്കുമെന്ന് അധികൃതര്‍ അറിയിച്ചു. പലര്‍ക്കും ഏറെ പ്രയോജനം ചെയ്യുന്ന ഈ നീക്കം വലിയ ചുവടുവെപ്പ് ആയിരിക്കുമെന്ന് വിലയിരുത്തപ്പെടുന്നു.
Haj 2025 marked a historic milestone:
— Ministry of Minority Affairs (@MOMAIndia) July 4, 2025
"Haj 2025 was one of the most successful ever," said Hon’ble Union Minister of Minority Affairs Shri @KirenRijiju, during the Haj Review Meeting held today at Dr. Ambedkar International Centre, New Delhi. The meeting reviewed the smooth… pic.twitter.com/k2rIRmN4wd
പ്രവാസികള്‍, രോഗികള്‍, പ്രായം കൂടിയവര്‍, ശാരീരിക ബുദ്ധിമുട്ടുള്ളവര്‍, ബിസിനസുകാര്‍, നയതന്ത്ര മേഖലയില്‍ ഉള്ളവര്‍, രാഷ്ട്ര തന്ത്രഞ്ജര്‍ തുടങ്ങി അനേകം വിഭാഗം വിശ്വാസി സമൂഹത്തിന് ഈ പാക്കേജ് പ്രയോജനം ചെയ്യും. മാത്രമല്ല സാമ്പത്തിക ചെലവ് കുറയ്ക്കാനും സാധിക്കുമെന്നതിനാല്‍ കൂടുതല്‍ പേര്‍ക്ക് ഹജ്ജ് പ്രാപ്യമാവുകയും ചെയ്യും. സാധാരണ രീതിയില്‍ 35 മുതല്‍ 40 വരെ ദിവസങ്ങളാണ് ഉള്ളത്. അതു കൊണ്ടു തന്നെ ചെലവ് ഏറും. 20 ദിനങ്ങള്‍ ആവുമ്പോള്‍ വലിയ കുറവ് തന്നെ ചെലവില്‍ ഉണ്ടാകും.
അതേസമയം ഹജ്ജ് അപേക്ഷ നടപടികള്‍ വേഗത്തില്‍ പൂര്‍ത്തിയാക്കാനാണ് ഈ വര്‍ഷത്തെ തീരുമാനം. സൗദി ഹജ്ജ് മന്ത്രാലയം അടുത്തവര്‍ഷത്തെ ഹജ്ജിനുള്ള ഒരുക്കങ്ങള്‍ തുടങ്ങിക്കഴിഞ്ഞു. ഈ മാസം രണ്ടാം വാരം ഓരോ രാജ്യങ്ങള്‍ക്കുമുള്ള ഹജ്ജ് ക്വാട്ട സൗദി ഗവണ്‍മെന്റ് പ്രഖ്യാപിക്കും. കഴിഞ്ഞവര്‍ഷം ഇന്ത്യന്‍ ഹജ്ജ് കമ്മിറ്റി പ്രൈവറ്റ് ഹജ്ജ് ഓപ്പറേറ്റര്‍മാര്‍ക്ക് നീക്കി വെച്ച 30% സീറ്റുകളില്‍ നിന്ന് 45,000 ത്തോളം സീറ്റുകള്‍ നടപടിക്രമങ്ങള്‍ പൂര്‍ത്തിയാക്കി സൗദി ഹജ്ജ് മന്ത്രാലയത്തിന്റെ നുസൂക് ആപ്പില്‍ ഓണ്‍ലൈന്‍ രെജിസ്‌ട്രേഷന്‍ വൈകിയത് മൂലം അവസരം നഷ്ടപ്പെട്ടിരുന്നു. അവരുടെ പണം ഇതുവരെ തിരിച്ചു നല്‍കിയിട്ടില്ല.
മക്കയിലും മദീനയിലും മുന്‍കൂട്ടി ബുക്ക് ചെയ്ത് ബില്‍ഡിങ് അഡ്വാന്‍സ് അടച്ച ടൂര്‍ ഓപ്പറേറ്റര്‍മാര്‍ ഇതുമൂലം പ്രയാസപ്പെടുകയാണ്. വന്‍ തുക നഷ്ടം വരുമെന്നാണ് അവരുടെ പരാതി. ഹജ്ജിനു വേണ്ടി കരുതിവെച്ച പണം നഷ്ടപ്പെടുമോ എന്ന ആശങ്കയിലാണ് അപേക്ഷകര്‍. അത് കൊണ്ട് ഈ വര്‍ഷം ഹജ്ജ് കമ്മിറ്റി മുഖേനയുള്ള അപേക്ഷകരുടെ എണ്ണം കൂടാനാണ് സാധ്യത.