ജിദ്ദ – നിയമ ലംഘനങ്ങള്‍ക്ക് ഹിസ്റ്റോറിക് ജിദ്ദ ഏരിയയില്‍ പെട്ട ബലദില്‍ പ്രവര്‍ത്തിക്കുന്ന കോര്‍ണിഷ് സെന്ററിലെ വ്യാപാര സ്ഥാപനങ്ങള്‍ അടപ്പിച്ചതായി ജിദ്ദ നഗരസഭ അറിയിച്ചു.
സേവന നിലവാരം മെച്ചപ്പെടുത്താനും നിയമപാലന തോത് വര്‍ധിപ്പിക്കാനുമുള്ള നഗരസഭയുടെ നിരന്തര ശ്രമങ്ങളുടെ ഭാഗമായാണ് നിയമ ലംഘനങ്ങള്‍ നടത്തിയ സ്ഥാപനങ്ങള്‍ അടപ്പിച്ചത്. ലൈസന്‍സില്ലാത്തതിനും ലൈസന്‍സ് കാലാവധി അവസാനിച്ചതിനും കോര്‍ണിഷ് സെന്ററിലെ ഏതാനും സ്ഥാപനങ്ങള്‍ ജിദ്ദ നഗരസഭക്കു കീഴിലെ ജാമിഅ ബലദിയ നഗരസഭയിലെ മാര്‍ക്കറ്റ് കാര്യ വിഭാഗവുമായി സഹകരിച്ച് മെയ് 29 ന് പിഴ ചുമത്തി അടപ്പിച്ചിരുന്നു. ഈ സ്ഥാപനങ്ങളുടെ പദവി ശരിയാക്കാന്‍ കോര്‍ണിഷ് സെന്റര്‍ അഡ്മിനിസ്‌ട്രേഷന് കര്‍ശന നിര്‍ദേശവും നല്‍കി.
ജൂണ്‍ 19 ന് നഗരസഭാ ഉദ്യോഗസ്ഥര്‍ കോര്‍ണിഷ് സെന്ററില്‍ നടത്തിയ പരിശോധനയില്‍ നേരത്തെ അടപ്പിച്ച ചില സ്ഥാപനങ്ങള്‍ നഗരസഭ പതിച്ച സീല്‍ പൊട്ടിച്ച് നിയമ വിരുദ്ധമായി വീണ്ടും തുറന്നതായി ശ്രദ്ധയില്‍ പെട്ടു. തുടര്‍ന്ന് ഈ സ്ഥാപനങ്ങള്‍ വീണ്ടും അടപ്പിക്കുകയും ബന്ധപ്പെട്ടവര്‍ക്കെതിരെ നിയമാനുസൃത നടപടികള്‍ സ്വീകരിക്കുകയും ചെയ്തു. രാജ്യത്തെ നിയമ വ്യവസ്ഥകള്‍ക്കും നിര്‍ദേശങ്ങള്‍ക്കും അനുസൃതമായി മുഴുവന്‍ നിയമ ലംഘനങ്ങളും അവസാനിപ്പിച്ച് പദവി ശരിയാക്കുന്നതു വരെ കോര്‍ണിഷ് സെന്റര്‍ ജാമിഅ ബലദിയയും നഗരസഭയിലെ മാര്‍ക്കറ്റ് കാര്യ വിഭാഗവും നിരീക്ഷിക്കുന്നത് തുടരുമെന്നും ജിദ്ദ നഗരസഭ വ്യക്തമാക്കി.