കൊച്ചി: കേരള ബ്ലാസ്റ്റേഴ്സിന്റെ മലയാളി താരം കെ പി രാഹുല്‍ വിട്ടു. സമൂഹ മാധ്യമങ്ങളിലൂടെ ഔദ്യോഗികമായാണ് ക്ലബ്ബ് ഇക്കാര്യം അറിയിച്ചത്. ഒഡീഷ എഫ്.സിയുമായാണ് താരം കരാറില്‍ ഏര്‍പ്പെട്ടത്. കഴിഞ്ഞ ആറു സീസണുകളിലായി മഞ്ഞപ്പടക്കൊപ്പമുള്ള 24 കാരന് വിംഗര്‍ നിരവധി ഗോളുകളും നേടിയിട്ടുണ്ട്.
ബ്ലാസ്റ്റേഴ്സിന്റെ പോസ്റ്റര്‍ ബോയ് ആയ രാഹുല്‍ ഇതുവരെ 76 മത്സരങ്ങളിലാണ് മഞ്ഞ ജഴ്‌സിയണിഞ്ഞത്. ഒമ്പത് ഗോളുകള്‍ നേടിയിരുന്നു. കഴിഞ്ഞ ദിവസം പഞ്ചാബ് എഫ്.സിക്കെതിരായ ബ്ലാസ്റ്റേഴ്സിന്റെ എവേ മത്സരത്തില്‍ സ്‌ക്വാര്‍ഡില്‍ പോലും താരമുണ്ടായിരുന്നില്ല. ഇതോടെ ക്ലബ് വിടുന്ന അഭ്യൂഹങ്ങള്‍ ശക്തമായിരുന്നു. ഇതിന് പിന്നാലെയാണ് ഔദ്യോഗിക പ്രഖ്യാപനമെത്തിയത്. 2019-ലാണ് രാഹുല്‍ ബ്ലാസ്റ്റേഴ്‌സില്‍ ചേരുന്നത്.
നിലവില്‍ 14 മാച്ചില്‍ അഞ്ച് ജയമുള്ള ഒഡീഷ പോയന്റ് ടേബിളില്‍ ആറാം സ്ഥാനത്താണ്. യുവതാരവുമായി കരാറില്‍ എത്തിയതിന് പിന്നാലെ ഒഡീഷ ജഴ്സിയിലുള്ള രാഹുലിന്റെ വീഡിയോ ടീം മാനേജ്മെന്റ് സമൂഹ മാധ്യമങ്ങളിലൂടെ പങ്കുവെച്ചു. ബ്ലാസ്റ്റേഴ്‌സ് താരങ്ങളായ ഡിഫന്‍ഡര്‍ പ്രീതം കോട്ടാല്‍, യുവതാരം അമാവിയ, സൗരവ് മണ്ഡല്‍, ബ്രൈസ് മിറാന്‍ഡ എന്നിവരുടെ പേരും ജനുവരി ട്രാന്‍സ്ഫര്‍ ജാലകത്തില്‍ ഉയര്‍ന്നുകേള്‍ക്കുന്നു.