കൽപ്പറ്റ: വയനാട് മുണ്ടക്കൈ-ചൂരൽമല ദുരന്തത്തിൽ രാഷ്ട്രീയം കളിക്കുന്നത് ദു:ഖകരണമാണെന്ന് വയനാട് എം.പി പ്രിയങ്കാ ഗാന്ധി.
ദുരന്തബാധിതരുടെ പുനരധിവാസവുമായി ബന്ധപ്പെട്ട് യൂത്ത് കോൺഗ്രസ് നടത്തിയ മാർച്ചിനു നേരെയുള്ള പോലീസ് ലാത്തിചാർജിനെയും അവർ അപലപിച്ചു. ദുരന്തബാധിതരുടെ പുനരധിവാസത്തിനായി കൃത്യമായ ഇടപെടൽ ആവശ്യപ്പെട്ട് മുഖ്യമന്ത്രിക്ക് താൻ കത്തെഴുതും. കേന്ദ്രത്തിലും സമ്മർദ്ദം ചെലുത്തും. ഇതാവശ്യപ്പെട്ട യൂത്ത് കോൺഗ്രസ് പ്രവർത്തകരെ പോലീസ് തല്ലിച്ചതച്ചത് തെറ്റാണെന്നും പ്രിയങ്ക ചൂണ്ടിക്കാട്ടി.
എല്ലാ രാഷ്ട്രീയത്തിനും അപ്പുറം അതിഭീകരമായ മാനുഷിക ദുരന്തമാണ് ഇവിടെ നടന്നത്. അതിലാരും രാഷ്ട്രീയം കാണരുത്. ദുരന്തം ഉണ്ടായപ്പോൾ എല്ലാവരും ഒന്നിച്ചുനിന്നു. രാഷട്രീയത്തിലും ഈ യോജിപ്പ് തുടരണം. മുഖ്യമന്ത്രിയും പ്രധാനമന്ത്രിയും ഇവിടെയത്തി ദുരന്തബാധിതരെ കണ്ടിട്ടുണ്ട്. ആ മനുഷ്യരുടെ മുഖം ഓർക്കണമെന്ന് രണ്ടുപേരോടും താൻ അഭ്യർത്ഥിക്കുകയാണ്. കേന്ദ്രസർക്കാരിന്റെ അവഗണനയ്ക്കെതിരെ താൻ പാർലമെന്റിൽ ശബ്ദമുയർത്തുമെന്നും പ്രിയങ്ക വ്യക്തമാക്കി.
ദുരന്തത്തിനുശേഷം വയനാട്ടിലേ്ക്ക് വരുന്നത് സുരക്ഷിതമല്ലെന്നാണ് ചിലരുടെ പ്രചാരണം. ഇത് ശരിയല്ല. ഇവിടെ വീണ്ടും ടൂറിസം വളർത്തണം. വയനാട് അത്ര സുന്ദരമാണെന്നും കാർഷികവൃത്തി, ഭക്ഷ്യ സുരക്ഷ എന്നിവയ്ക്കെല്ലാം മുൻഗണന നൽകുമെന്നും നിങ്ങളുടെ സ്നേഹത്തിന് കലവറയില്ലാത്ത നന്ദിയുണ്ടാകുമെന്നും അവർ അറിയിച്ചു.
തെരഞ്ഞെടുപ്പ് വിജയത്തിൽ നന്ദി അറിയിക്കാൻ വയനാട് പാർലമെന്റ് മണ്ഡലത്തിൽ രണ്ടു ദിവസത്തെ സന്ദർശനത്തിനെത്തിയതായിരുന്നു പ്രിയങ്ക ഗാന്ധി. മണ്ഡലത്തിന്റെ വിവിധ ഭാഗങ്ങളിൽ കൂറ്റൻ സ്വീകരണമാണ് അവർക്കു ലഭിച്ചത്.