മനാമ: ബഹ്റൈനിലെ പ്രമുഖ വ്യവസായി ഫാറൂഖ് അല്‍മൊയ്ദ് 80-ാം വയസ്സില്‍ അന്തരിച്ചു. ഏതാനും ദിവസങ്ങളായി ചികില്‍സയിലായിരുന്ന ഫാറൂഖ് തിങ്കളാഴ്ച രാവിലെയാണ് നിര്യാതനായത്. ബഹ്റൈനില്‍ വൈ.കെ.അല്‍മോയ്ദ് ഗ്രൂപ്പ് ചെയര്‍മാനായ അദ്ദേഹത്തിന്‍റെ നിര്യാണം ബഹ്റൈന്‍ വ്യവസായ സമൂഹത്തിന് കനത്ത ആഘാതമായി.
തന്‍റെ കരിയറിലുടനീളം, പ്രമുഖ കമ്പനികളിലും സംഘടനകളിലും നിരവധി മുതിര്‍ന്ന പദവികള്‍ ഫാറൂഖ് വഹിച്ചിട്ടുണ്ട്. വൈ.കെ അല്‍മോയിഡ് & സണ്‍സ്, വൈ.കെ അല്‍മോയിദ് പ്രോപ്പര്‍ട്ടീസ്, നാഷണല്‍ ബാങ്ക് ഓഫ് ബഹ്റൈന്‍, ബഹ്റൈന്‍ ഡ്യൂട്ടി ഫ്രീ, ഗള്‍ഫ് ഹോട്ടല്‍സ് ഗ്രൂപ്പ്, ബഹ്റൈന്‍ നാഷണല്‍ ഹോള്‍ഡിംഗ്, അഹ്ലിയ യൂണിവേഴ്സിറ്റി, നാഷണല്‍ ഫിനാന്‍സ് ഹൌസ്, അല്‍മോയിദ് ഇന്‍റര്‍നാഷണല്‍ ഗ്രൂപ്പ്, ബഹ്റൈന്‍ സ്മോള്‍ ആന്‍ഡ് മീഡിയം എന്‍റര്‍പ്രൈസസ് സൊസൈറ്റി എന്നിവയുടെ നേതൃത്വം ഉള്‍പ്പെടെ നിരവധി സ്ഥാനങ്ങള്‍ അലങ്കരിച്ചിട്ടുണ്ട്. അദ്ദേഹം അംഗമായിരുന്ന സാമ്പത്തിക വികസന ബോര്‍ഡിലേക്കും ഇബ്ന്‍ ഖുല്‍ദൂണ്‍ നാഷണല്‍ സ്കൂളിന്‍റെ ബോര്‍ഡ് ഓഫ് ട്രസ്റ്റികളുടെ ചെയര്‍മാനായും അദ്ദേഹത്തിന്‍റെ സംഭാവനകള്‍ വ്യാപിച്ചു.
ലേബര്‍ മാര്‍ക്കറ്റ് റെഗുലേറ്ററി അതോറിറ്റിയുടെയും നാഷണല്‍ ബാങ്ക് ഓഫ് ബഹ്റൈന്‍റേയും ഡെപ്യൂട്ടി ചെയര്‍മാനായും അദ്ദേഹം സേവനമനുഷ്ഠിച്ചു. ബഹ്റൈന്‍ സൌദി ബാങ്ക്, അറബ് ബാങ്കിംഗ് കോര്‍പ്പറേഷന്‍, യുണൈറ്റഡ് ഗള്‍ഫ് ഇന്‍ഷുറന്‍സ് ആന്‍ഡ് റീഇന്‍ഷുറന്‍സ്, ഹോങ്കോങ്ങിലെ ഏഷ്യ ഇന്‍റര്‍നാഷണല്‍ ബാങ്ക്, ഇന്‍വെസ്റ്റ്കോര്‍പ്പ് എന്നിവയില്‍ ഡയറക്ടര്‍ സ്ഥാനങ്ങള്‍ വഹിച്ചിട്ടുണ്ട്. ഹാര്‍വാര്‍ഡ് യൂണിവേഴ്സിറ്റിയുടെ ഇന്‍സ്റ്റിറ്റ്യൂട്ട് ഫോര്‍ സോഷ്യല്‍ ആന്‍ഡ് ഇക്കണോമിക് പോളിസി ഇന്‍ മിഡില്‍ ഈസ്റ്റ്, ജോര്‍ജ്ജ്ടൌണ്‍ യൂണിവേഴ്സിറ്റിയുടെ സെന്‍റര്‍ ഫോര്‍ കണ്ടംപററി അറബ് സ്റ്റഡീസ് എന്നിവയുള്‍പ്പെടെയുള്ള അന്താരാഷ്ട്ര സ്ഥാപനങ്ങളില്‍ അഡ്വൈസര്‍ ആയിരുന്നു. കൂടാതെ, റോട്ടറി ക്ലബ് ഓഫ് മനാമയുടെ ഓണററി അംഗവുമായിരുന്നു അദ്ദേഹം.
ബഹ്റൈന്‍റെ പുരോഗതിക്കുള്ള അദ്ദേഹത്തിന്‍റെ നേതൃത്വം, സമര്‍പ്പണം എന്നിവയുടെ പേരില്‍ ഫാറൂഖ് അല്‍ മൊയ്യദ് എന്നും ഓര്‍മ്മിക്കപ്പെടും. അദ്ദേഹത്തിന്‍റെ പ്രവര്‍ത്തനങ്ങള്‍ ബഹ്റൈന്‍റെ സമ്പദ്വ്യവസ്ഥയില്‍ ആഴത്തിലുള്ള സ്വാധീനം ചെലുത്തുകയും രാജ്യത്തിന്‍റെ ആധുനിക വികസനത്തിലെ ഒരു പ്രധാന വ്യക്തിയായി അംഗീകാരം നേടുകയും ചെയ്തു.
1944ല്‍ മനാമയില്‍ ജനിച്ച ഫാറൂഖ് ഒരു സുസ്ഥാപിത വ്യാപാര കുടുംബത്തിന്‍റെ ഭാഗമായ ഫരീജ് അല്‍ ഫദേല്‍ പരിസരത്താണ് വളര്‍ന്നത്. 1966ല്‍ ഇംഗ്ലണ്ടിലെ ലോഫ്ബറോ സര്‍വകലാശാലയില്‍ നിന്ന് മെക്കാനിക്കല്‍ എഞ്ചിനീയറിംഗില്‍ ബിരുദം നേടിയ അദ്ദേഹം കുടുംബ ബിസിനസില്‍ ചേരുന്നതിനായി ബഹ്റൈനിലേക്ക് മടങ്ങി. മാറുന്ന സാമ്പത്തിക കാലഘട്ടത്തില്‍ അതിന്‍റെ വളര്‍ച്ച ഉറപ്പാക്കിക്കൊണ്ട് അതിന്‍റെ പ്രവര്‍ത്തനങ്ങള്‍ വിപുലീകരിക്കാനും ശക്തിപ്പെടുത്താനും അദ്ദേഹത്തിന്‍റെ പങ്കാളിത്തം സഹായിച്ചു.