കൊച്ചി: വഖഫ് ബോർഡിനെതിരെ പ്രതിഷേധവുമായി മുനമ്പം സമരസമിതി. വഖഫ് ബോർഡിന്റെ കോലം കടലിൽ താഴ്ത്തിയാണ് പ്രതിഷേധം.
1995-ലെ വഖഫ് നിയമത്തിന്റെ കോലമാണ് സമരക്കാർ കടലിൽ കെട്ടിത്താഴ്ത്തിയത്. അഞ്ഞൂറിലധികം പ്രതിഷേധക്കാരാണ് സമരത്തിന്റെ 43-ാം നാളിൽ മുനമ്പം കടലിലേക്ക് പ്രതിഷേധവുമായി എത്തിയത്.
വഖഫ് ആസ്തി വിവരപട്ടികയിൽ നിന്ന് തങ്ങളുടെ ഭൂമി ഒഴിവാക്കണമെന്ന് സമരസമിതി ആവശ്യപ്പെട്ടു. മുനമ്പം തർക്കത്തിൽ മുഖ്യമന്ത്രി പിണറായി വിജയൻ സമര സമിതിയുമായി ചർച്ച നടത്തിയെങ്കിലും സമരത്തിൽനിന്നും പ്രദേശവാസികൾ പിൻമാറിയിട്ടില്ല.
ഒരാളെയും കുടിയൊഴിപ്പിക്കില്ലെന്നും മുനമ്പത്തെ പ്രശ്‌നങ്ങൾ മൂന്നുമാസത്തിനകം പരിഹരിക്കുമെന്നും മുഖ്യമന്ത്രി സമരക്കാർക്ക് ഉറപ്പ് നൽകിയിട്ടുണ്ട്. പ്രശ്‌ന പരിഹാരത്തിനായാണ് സർക്കാർ ജുഡീഷ്യൽ കമ്മിഷനെ നിയോഗിച്ചത്. ഭൂമിയുടെ ഉടമസ്ഥർക്ക് റവന്യൂ അധികാരം നഷ്ടപ്പെട്ടത് എങ്ങനെ എന്നത് അടക്കമുള്ള കാര്യങ്ങൾ ഹൈക്കോടതി മുൻ ആക്ടിങ് ചീഫ് ജസ്റ്റിസ് സി.എൻ രാമചന്ദ്രൻ നായർ അധ്യക്ഷനായ ജുഡീഷ്യൽ കമ്മിഷന്റെ പരിശോധനയിൽ വരുമെന്ന് സർക്കാർ വ്യക്തമാക്കിയിട്ടുണ്ട്.
അതിനിടെ, സർക്കാറിന് കേവലം പത്തുമിനുട്ട് കൊണ്ട് തീർക്കാവുന്ന പ്രശ്‌നം പിണറായി വിജയൻ, സംഘപരിവാറിന് മുതലെടുക്കാൻ അവസരം കൊടുക്കുംവിധം സങ്കീർണമാക്കുകയാണെന്നാണ് പ്രതിപക്ഷ നേതാവിന്റെ വിമർശം. എന്നാൽ, സർക്കാർ ജുഡീഷ്യൽ കമ്മിഷനെ വച്ചത് സ്വാഗതം ചെയ്തിരിക്കുകയാണ് വഖഫ് സംരക്ഷണ സമിതി.