ബെയ്‌റൂത്ത് – ഹിസ്ബുല്ല വക്താവ് മുഹമ്മദ് അഫീഫ് ബെയ്‌റൂത്തിലെ റാസ് അല്‍നബഅ് ഏരിയയില്‍ ഇസ്രായില്‍ നടത്തിയ ആക്രമണത്തില്‍ കൊല്ലപ്പെട്ടു. ബെയ്‌റൂത്തിന്റെ ദക്ഷിണ പ്രാന്തപ്രദേശത്തു നിന്ന് പലായനം ചെയ്ത അഭയാര്‍ഥികള്‍ കഴിയുന്ന, ബെയ്‌റൂത്തിലെ ജനനിബിഡമായ പ്രദേശത്ത് നടത്തിയ ആക്രമണത്തിലാണ് മുഹമ്മദ് അഫീഫ് കൊല്ലപ്പെട്ടത്.
ലെബനോനിലെ അറബ് സോഷ്യലിസ്റ്റ് ബഅത് പാര്‍ട്ടി കെട്ടിടം ലക്ഷ്യമിട്ട് നടത്തിയ ആക്രമണത്തിലാണ് മുഹമ്മദ് അഫീഫ് കൊല്ലപ്പെട്ടതെന്ന് പാര്‍ട്ടി സെക്രട്ടറി ജനറല്‍ അലി ഹിജാസി പറഞ്ഞു. ആക്രമണത്തില്‍ ആകെ അഞ്ചു പേര്‍ കൊല്ലപ്പെട്ടതായി അല്‍മയാദീന്‍ ചാനല്‍ റിപ്പോര്‍ട്ട് ചെയ്തു.
കൊല്ലപ്പെട്ടവരില്‍ ഒരാള്‍ മുഹമ്മദ് അഫീഫിന്റെ അസിസ്റ്റന്റ് മഹ്മൂദ് അല്‍ശര്‍ഖാവിയാണ്. ലെബനോന്‍ യുദ്ധം ആരംഭിച്ച ശേഷം ബെയ്‌റൂത്തിലെ റാസ് അല്‍നബഅ് ഏരിയയില്‍ ഇസ്രായില്‍ നടത്തുന്ന ആദ്യ ആക്രമണമാണിത്.
ദക്ഷിണ ലെബനോനില്‍ ലെബനീസ് സൈനിക കേന്ദ്രം ലക്ഷ്യമിട്ട് ഇസ്രായില്‍ ഇന്ന് ആക്രമണം നടത്തിയതായി ലെബനീസ് സൈന്യം പ്രസ്താവനയില്‍ പറഞ്ഞു. ആക്രമണത്തില്‍ ഒരു ലെബനീസ് സൈനികന്‍ കൊല്ലപ്പെടുകയും മൂന്നു പേര്‍ക്ക് പരിക്കേല്‍ക്കുകയും ചെയ്തു. പരിക്കേറ്റ സൈനികരില്‍ ഒരാളുടെ നില ഗുരുതരമാണ്. ലെബനീസ് സൈനിക പോസ്റ്റ് ലക്ഷ്യമിട്ട് ഇസ്രായിലി പാറ്റന്‍ ടാങ്ക് ആണ് ആക്രമണം നടത്തിയതെന്ന് ബന്ധപ്പെട്ടവര്‍ പറഞ്ഞു.