ഇത്തിഹാദ്: യുവേഫാ ചാംപ്യന്‍സ് ലീഗില്‍ ചെക്ക് റിപ്പബ്ലിക്ക് ക്ലബ്ബ് സ്പാര്‍ട്ടാ പ്രാഗിനെതിരേ അഞ്ച് ഗോളിന്റെ ജയവുമായി മാഞ്ചസ്റ്റര്‍ സിറ്റി. ഇംഗ്ലിഷ് ചാംപ്യന്‍മാര്‍ക്കായി എര്‍ലിങ് ഹാലന്റ് ഇരട്ട ഗോളുകള്‍ നേടി. ഫില്‍ ഫോഡന്‍, സ്‌റ്റോണ്‍സ് എന്നിവരാണ് മറ്റ് ഗോളുകള്‍ നേടിയത്. മറ്റൊരു മല്‍സരത്തില്‍ ലിവര്‍പൂള്‍ എതിരില്ലാത്ത ഒരു ഗോളിന് ജര്‍മ്മന്‍ ക്ലബ്ബ് ആര്‍ബി ലെപ്‌സിഗിനെ വീഴ്ത്തി. മുഹമ്മദ് സലാഹിന്റെ അസിസ്റ്റില്‍ 27ാം മിനിറ്റില്‍ ഡാര്‍വിന്‍ ന്യൂനസാണ് ചെമ്പടയുടെ വിജയഗോള്‍ നേടിയത്. എന്നാല്‍ പിന്നീട് ഒരു ഗോള്‍ കൂടി നേടാന്‍ ലിവര്‍പൂളിനായില്ല. ലെപ്‌സിഗ് കനത്ത പ്രതിരോധം സൃഷ്ടിക്കുകയായിരുന്നു.
മറ്റ് മല്‍സരങ്ങളില്‍ ഇന്റര്‍മിലാന്‍ യങ് ബോയിസിനെ എതിരില്ലാത്ത ഒരു ഗോളിന് പരാജയപ്പെടുത്തി. റെഡ് ബുള്‍ സാല്‍സ്ബര്‍ഗ് ഡൈനാമോ സെഗരിബിനെ എതിരില്ലാത്ത രണ്ട് ഗോളിനും വീഴ്ത്തി.
സ്‌പോര്‍ട്‌സ് ലേഖിക