ഇടുക്കി: ബസ് ബൈക്കിലിടിച്ച് ബൈക്ക് യാത്രികനായ യുവാവിന് ദാരുണാന്ത്യം. ഇടുക്കി ഒളമറ്റം പൊന്നന്താനം തടത്തിൽ ടി.എസ് ആൽബർട്ട് (19) ആണ് മരിച്ചത്. ഇന്നലെ രാത്രി കരിങ്കുന്നത്തിനടുത്ത് തവളകുഴിയിൽ വച്ചാണ് അപകടമുണ്ടായത്.
പാലാ ഭാഗത്തേയ്ക്ക് പോകുകയായിരുന്ന ബൈക്കും എതിർ ദിശയിലെത്തിയ അന്തർ സംസ്ഥാന സർവീസ് നടത്തുന്ന കല്ലട ബസും കൂട്ടിയിടിക്കുകയായിരുന്നു. ആൽബർട്ട് പൊന്നന്താനം തടത്തിൽ സന്തോഷ്-റീന ദമ്പതികളുടെ മകനാണ്. അഞ്ജലീന സഹോദരിയാണ്. വർഷങ്ങളായി പൊന്നന്താനത്ത് വാടകയ്ക്ക് താമസിക്കുകയാണ് കുടുംബം.
അപകടത്തിൽ, ബൈക്ക് ഓടിച്ച കരിങ്കുന്നം വടക്കുംമുറി കൊച്ചുഭൂതക്കാട്ടിൽ എബിൻ ജോബിക്ക് ഗുരുതര പരുക്കുണ്ട്. എബിന്റെ വലതുകാൽ അറ്റുപോയിട്ടുണ്ട് ഇയാളെ തൊടുപുഴയിലെ സ്വകാര്യ ആശുപത്രിയിൽ പ്രവേശിപ്പിച്ച ശേഷം കൊച്ചിയിലേക്ക് മാറ്റിയിട്ടുണ്ട്. സംഭവത്തിൽ കേസെടുത്ത് അന്വേഷണം ആരംഭിച്ചതായി പോലീസ് പറഞ്ഞു.