കൊച്ചി: രാത്രി വീട്ടിൽ പഠനത്തിൽ മുഴുകിയ ബി.ബി.എ വിദ്യാർത്ഥിനിയെ പുലർച്ചെ കുളത്തിൽ മരിച്ചനിലയിൽ കണ്ടെത്തി. എടത്തല എം.ഇ.എസ് കോളേജിലെ ബി.ബി.എ വിദ്യാർത്ഥിനിയും കങ്ങരപ്പടി കണിയാത്ത് വീട്ടിൽ സുരേന്ദ്രൻ-ശ്യാമള ദമ്പതികളുടെ മകളുമായ അമൃത(19)യെയാണ് തേവക്കലിൽ കുളത്തിൽ മരിച്ച നിലയിൽ കണ്ടെത്തിയത്.
ഞായറാഴ്ച രാത്രി 12 മണിവരെ മകൾ മുറിയിലിരുന്ന് പഠിക്കുകയായിരുന്നുവെന്നും പിന്നീട് കാണാതായതായും മാതാപിതാക്കൾ പറഞ്ഞു. തുടർന്നുള്ള പരിശോധനയിൽ വീടിന് താഴ്ഭാഗത്തുള്ള മുൻസിപ്പാലിറ്റി കുളത്തിന് സമീപത്ത് പെൺകുട്ടിയുടെ ചെരുപ്പ് കണ്ടെത്തുകയായിരുന്നു. പിന്നാലെ പോലീസിനെയും ഫയർഫോഴ്‌സിനെയും വിവരമറിയിക്കുകയായിരുന്നു.
തുടർന്നുള്ള തിരച്ചിലിൽ ആറ് മണിയോടെ ഫയർഫോഴ്‌സ് മൃതദേഹം പുറത്തെടുക്കുകയായിരുന്നു. ഇൻക്വസ്റ്റിന് ശേഷം മൃതദേഹം പോസ്റ്റ്‌മോർട്ടത്തിനായി കളമശ്ശേരി മെഡിക്കൽ കോളേജിലേക്ക് മാറ്റി. സംഭവത്തിൽ കേസെടുത്ത് അന്വേഷണം ആരംഭിച്ചതായി പോലീസ് പറഞ്ഞു. സഹോദരൻ: അതുൽ സുരേന്ദ്രൻ.