ടെൽ അവീവ്- ഇസ്രായേലിൽ ദേശീയ ഐക്യ സർക്കാർ രൂപീകരിക്കാനുള്ള ഇടക്കാല പ്രധാനമന്ത്രി ബെഞ്ചമിൻ നെതന്യാഹുവിന്റെ ആഹ്വാനത്തെ പ്രധാനമന്ത്രി സ്ഥാനാർത്ഥിയും മുൻ സൈനിക മേധാവിയുമായ ഗാഡി ഐസൻകോട്ട് തള്ളി. തെരഞ്ഞെടുപ്പിൽ പരാജയപ്പെട്ടെന്ന് വ്യക്തമായി അറിയാവുന്നതിനാലുള്ള രാഷ്ട്രീയ തന്ത്രം മാത്രമാണിതെന്ന് അദ്ദേഹം ആരോപിച്ചു. സർക്കാർ രൂപീകരണ ചർച്ചകൾ പുരോഗമിക്കുന്നതിനിടെയാണ് നെതന്യാഹു വീണ്ടും ആഹ്വാനവുമായി എത്തുന്നത്. ഐക്യത്തെക്കുറിച്ച് സംസാരിക്കുമ്പോഴും അദ്ദേഹം ഭിന്നതയും സംഘർഷവുമാണ് സൃഷ്ടിക്കുന്നതെന്നും ഇത്തരം തന്ത്രങ്ങൾ തന്നോട് വിലപ്പോവില്ലെന്നും ഐസൻകോട്ട് വ്യക്തമാക്കി.
എന്നാൽ, ഇറാനിൽ നിന്നുള്ള ഭീഷണി പൂർണ്ണമായും ഇല്ലാതാക്കാൻ ദേശീയ ഐക്യ സർക്കാർ അനിവാര്യമാണെന്ന് നെതന്യാഹു ശനിയാഴ്ച പുറത്തുവിട്ട വീഡിയോ പ്രസ്താവനയിൽ ആവർത്തിച്ചു. വ്യാഴാഴ്ച ഐസൻകോട്ടുമായി നടത്തിയ കൂടിക്കാഴ്ചയ്ക്ക് ശേഷം ഈ ബോധ്യം വർധിച്ചതായും, ഇസ്രായേലിനെ യഹൂദ രാഷ്ട്രമായി അംഗീകരിക്കുന്ന പാർട്ടികൾ ചേർന്ന് സർക്കാർ രൂപീകരിക്കണമെന്നും അദ്ദേഹം ആവശ്യപ്പെട്ടു. ഇസ്രായേലിനെതിരെ ആണവായുധങ്ങൾ പ്രയോഗിക്കാൻ ഇറാൻ മടിക്കില്ലെന്നും നെതന്യാഹു ആരോപിച്ചു.
