ഇസ്താംബൂള്‍– കൂട്ടായ പ്രതിരോധം ശക്തിപ്പെടുത്തുന്നതിനും പ്രാദേശിക സുരക്ഷ മെച്ചപ്പെടുത്തുന്നതിനുമായി തുര്‍ക്കിയും ഖത്തറും സംയുക്ത പ്രതിരോധ കരാറില്‍ ഒപ്പുവെച്ചു. ഇരു രാജ്യങ്ങള്‍ക്കും നേരെയുണ്ടാകുന്ന ഏതൊരു ബാഹ്യ സായുധ ആക്രമണത്തെയും ഒറ്റക്കെട്ടായി നേരിടുമെന്ന് ചര്‍ച്ചകള്‍ക്ക് ശേഷം പുറത്തിറക്കിയ സംയുക്ത പ്രസ്താവനയില്‍ വ്യക്തമാക്കി.
ഇസ്താംബൂളില്‍ നടന്ന സുപ്രീം സ്ട്രാറ്റജിക് കമ്മിറ്റിയുടെ 12-ാമത് സമ്മേളനത്തിനിടെ തുര്‍ക്കി പ്രസിഡന്റ് റജബ് ത്വയ്യിബ് ഉര്‍ദുഗാനും ഖത്തര്‍ അമീര്‍ ശൈഖ് തമീം ബിന്‍ ഹമദ് അല്‍ഥാനിയുമാണ് കരാറില്‍ ഒപ്പുവെച്ചത്. പരമാധികാരവും പ്രാദേശിക അഖണ്ഡതയും സംരക്ഷിക്കാനുള്ള ഇരു രാജ്യങ്ങളുടെയും പ്രതിബദ്ധതയാണ് ഈ കരാര്‍ പ്രതിഫലിപ്പിക്കുന്നതെന്ന് പ്രസ്താവനയില്‍ പറയുന്നു.
പ്രധാന തീരുമാനങ്ങള്‍
- സൈനിക സഹകരണം: സുരക്ഷാ ഭീഷണികളെയും പ്രതിരോധ നയങ്ങളെയും കുറിച്ച് പരസ്പരം കൂടിയാലോചിക്കാനും, സംയുക്ത സൈനിക അഭ്യാസങ്ങള്‍, പ്രതിരോധ വ്യവസായ സഹകരണം, ഉദ്യോഗസ്ഥര്‍ക്കുള്ള പരിശീലനം എന്നിവ വിപുലീകരിക്കാനും ധാരണയായി.
- ഊര്‍ജ പങ്കാളിത്തം: ദീര്‍ഘകാല ബന്ധം കൂടുതല്‍ ശക്തിപ്പെടുത്തുന്നതിന്റെ ഭാഗമായി ഊര്‍ജ മേഖലയില്‍, പ്രത്യേകിച്ച് ദ്രവീകൃത പ്രകൃതിവാതക (എല്‍.എന്‍.ജി) വ്യാപാരത്തില്‍ സഹകരണം വര്‍ധിപ്പിക്കാന്‍ ഇരുരാജ്യങ്ങളും തീരുമാനിച്ചു.
- മേഖലാ സമാധാനം: ഗള്‍ഫ് മേഖലയില്‍ വീണ്ടും യുദ്ധസാഹചര്യം ഉണ്ടാകുന്നത് തടയാനും ചര്‍ച്ചകളിലൂടെ സമാധാനം കൈവരിക്കാനും ഒരുമിച്ച് പ്രവര്‍ത്തിക്കുമെന്ന് പ്രസിഡന്റ് ഉര്‍ദുഗാന്‍ വ്യക്തമാക്കി.
Set featured image
മക്ക കരാറിന് പിന്നാലെ പുതിയ നീക്കം ഈ വര്‍ഷം ഓഗസ്റ്റില്‍ തുര്‍ക്കി, സൗദി അറേബ്യ, പാകിസ്ഥാന്‍ എന്നീ രാജ്യങ്ങള്‍ ഒപ്പുവെച്ച ‘മക്ക സംയുക്ത പ്രതിരോധ കരാറിന്’ കഴിഞ്ഞ ആഴ്ച തുര്‍ക്കി പാര്‍ലമെന്റ് അംഗീകാരം നല്‍കിയിരുന്നു. മൂന്ന് രാജ്യങ്ങളില്‍ ഏതെങ്കിലും ഒന്നിന് നേരെയുണ്ടാകുന്ന ആക്രമണം എല്ലാവര്‍ക്കും നേരെയുള്ള ആക്രമണമായി കണക്കാക്കുന്നതാണ് ഈ കരാര്‍. ഇതോടെ, യെമനിലെ ഹൂത്തി വിമതരുടെ ആക്രമണങ്ങളെ നേരിടുന്ന സൗദി അറേബ്യക്ക് സൈനിക സഹായം നല്‍കാന്‍ തുര്‍ക്കിക്ക് വഴിയൊരുങ്ങിയിരുന്നു. ഇതിന് പിന്നാലെയാണ് ഖത്തറുമായും തുര്‍ക്കി സമാനമായ പ്രതിരോധ കരാറില്‍ ഏര്‍പ്പെട്ടിരിക്കുന്നത്.