കുവൈത്ത് സിറ്റി– രക്ഷിതാക്കളുടെ ശ്രദ്ധയില്‍പ്പെടാതെ സെക്കന്‍ഡറി സ്‌കൂള്‍ വിദ്യാര്‍ഥികള്‍ക്ക് ഇ-സിഗരറ്റുകള്‍ വില്‍ക്കാനായി ഭക്ഷണപ്പൊതികള്‍ക്കുള്ളില്‍ അവ ഒളിപ്പിച്ചുവെച്ച മൂന്നംഗ സംഘത്തെ കുവൈത്ത് പോലീസ് അറസ്റ്റ് ചെയ്തു. സ്‌കൂള്‍ വിദ്യാര്‍ഥികള്‍ക്കിടയില്‍ വേപ്പിംഗ് ഉല്‍പ്പന്നങ്ങളുടെ ഉപയോഗം വര്‍ധിച്ചുവരുന്നതായി ലഭിച്ച രഹസ്യവിവരത്തിന്റെ അടിസ്ഥാനത്തില്‍ നടത്തിയ അന്വേഷണത്തിനൊടുവിലാണ് അറസ്റ്റ്.
ഒരു പലചരക്ക് കട കേന്ദ്രീകരിച്ചാണ് വിദ്യാര്‍ഥികള്‍ക്കുള്ള ഭക്ഷണപ്പൊതികള്‍ തയ്യാറാക്കിയിരുന്നതും അതിനുള്ളില്‍ ഇ-സിഗരറ്റുകള്‍ ഒളിപ്പിച്ചിരുന്നതും. ഓര്‍ഡര്‍ ഡെലിവറി ചെയ്യുന്നതിനിടയില്‍ നിയമപരമായ അനുമതിയോടെ ആദ്യ പ്രതിയെ പോലീസ് പിടികൂടുകയായിരുന്നു. തുടര്‍ന്ന് ഇവര്‍ സാധനങ്ങള്‍ തയ്യാറാക്കിയിരുന്ന കേന്ദ്രത്തില്‍ നടത്തിയ പരിശോധനയിലാണ് മറ്റു രണ്ടു പേരെക്കൂടി കസ്റ്റഡിയിലെടുത്തത്.
ക്യാപിറ്റല്‍ ഗവര്‍ണറേറ്റ് ക്രിമിനല്‍ ഇന്‍വെസ്റ്റിഗേഷന്‍ ഡിപ്പാര്‍ട്ട്മെന്റിന്റെ നേതൃത്വത്തിലാണ് ഓപ്പറേഷൻ നടന്നത്. കുവൈത്ത് മുനിസിപ്പാലിറ്റി, വാണിജ്യ-വ്യവസായ മന്ത്രാലയം, പബ്ലിക് അതോറിറ്റി ഫോർ ഫുഡ് ആന്റ് ന്യൂട്രീഷൻ എന്നിവയിലെ ഉദ്യോഗസ്ഥരും അന്വേഷണ സംഘത്തിൽ പങ്കെടുത്തു. ചോദ്യം ചെയ്യലിൽ മൂന്നുപേരും കുറ്റം സമ്മതിച്ചതായി ആഭ്യന്തര മന്ത്രാലയം അറിയിച്ചു.
പ്രതികളുടെ രീതിയും കർശന മുന്നറിയിപ്പും
പലചരക്ക് കട നടത്തിപ്പുകാരായ രണ്ടുപേരാണ് പണമുണ്ടാക്കാനായി ഭക്ഷണസാധനങ്ങള്‍ക്കിടയില്‍ ഇ-സിഗരറ്റുകള്‍ ഒളിപ്പിച്ച് ഓര്‍ഡറുകള്‍ തയ്യാറാക്കിയത്. പാക്കേജുകളില്‍ എന്താണെന്ന് അറിഞ്ഞുകൊണ്ട് തന്നെ അവ വിദ്യാര്‍ഥികളിലേക്ക് എത്തിച്ചുകൊടുത്തു എന്നതാണ് മൂന്നാമത്തെ പ്രതിക്കെതിരെയുള്ള കുറ്റം. പിടിച്ചെടുത്ത ഉല്‍പ്പന്നങ്ങള്‍ അധികൃതര്‍ കണ്ടുകെട്ടുകയും പ്രതികളെ നിയമനടപടികൾക്കായി ബന്ധപ്പെട്ട വകുപ്പുകൾക്ക് കൈമാറുകയും ചെയ്തിട്ടുണ്ട്.
സാധാരണ ഡെലിവറി സേവനങ്ങള്‍ ഉപയോഗപ്പെടുത്തി കുട്ടികളിലേക്ക് നിരോധിത ഉല്‍പ്പന്നങ്ങള്‍ എത്തിക്കാന്‍ സാധ്യതയുണ്ടെന്നും രക്ഷിതാക്കള്‍ ജാഗ്രത പാലിക്കണമെന്നും ആഭ്യന്തര മന്ത്രാലയം മുന്നറിയിപ്പ് നൽകി. കുട്ടികളുടെ ഓണ്‍ലൈന്‍ പര്‍ച്ചേസുകളിലും ഭക്ഷണപ്പൊതികളിലും രക്ഷിതാക്കള്‍ പ്രത്യേക ശ്രദ്ധ ചെലുത്തണമെന്നും, പുകവലിയുടെയും വേപ്പിംഗിന്റെയും അപകടങ്ങളെക്കുറിച്ച് കുട്ടികളുമായി തുറന്നു സംസാരിക്കണമെന്നും മന്ത്രാലയം നിര്‍ദ്ദേശിച്ചു.
പുതിയ നിയമങ്ങൾ വരുന്നു
2027 ജനുവരി 1 മുതൽ പ്രാബല്യത്തിൽ വരുന്ന പുകയില, നിക്കോട്ടിന്‍ ഉല്‍പ്പന്നങ്ങള്‍ സംബന്ധിച്ച കര്‍ശന നിയന്ത്രണങ്ങളുടെ പശ്ചാത്തലത്തിലാണ് ഈ നടപടി. പുതിയ നിയമപ്രകാരം 21 വയസ്സില്‍ താഴെയുള്ള ആര്‍ക്കും ഇത്തരം ഉല്‍പ്പന്നങ്ങള്‍ വില്‍ക്കുന്നത് നിരോധിച്ചിട്ടുണ്ട്. കൂടാതെ പലചരക്ക് കടകള്‍, ഓണ്‍ലൈന്‍ പ്ലാറ്റ്ഫോമുകള്‍, ഡെലിവറി സേവനങ്ങള്‍ എന്നിവ വഴിയുള്ള വില്‍പ്പനയ്ക്കും നിയന്ത്രണമുണ്ടാകും. വിദ്യാഭ്യാസ സ്ഥാപനങ്ങളുടെ 200 മീറ്റര്‍ ചുറ്റളവിലുള്ള കടകളിൽ ഇലക്ട്രോണിക് സിഗരറ്റുകളും നിക്കോട്ടിന്‍ ഉല്‍പ്പന്നങ്ങളും വില്‍ക്കുന്നതും പൂർണ്ണമായും നിരോധിച്ചിട്ടുണ്ട്.