ന്യൂയോർക്ക്- സൗദി അറേബ്യയുടെ സുരക്ഷയ്‌ക്കോ ചെങ്കടലിലും ബാബ് അൽമന്ദബ് കടലിടുക്കിലും നാവിഗേഷൻ സ്വാതന്ത്ര്യത്തിനോ ഭീഷണി സൃഷ്ടിക്കുന്ന വേദിയായി മാറാൻ യെമനെ അനുവദിക്കില്ലെന്ന് യു.എൻ രക്ഷാസമിതിയിൽ സൗദി അറേബ്യ വ്യക്തമാക്കി. ഭീകരവാദ സംഘങ്ങൾ ആയുധബലത്താൽ യെമനിലും മേഖലയിലും സ്വന്തം അജണ്ടകൾ അടിച്ചേൽപ്പിക്കുന്നത് അംഗീകരിക്കാനാവില്ലെന്ന് യു.എന്നിലെ സൗദി സ്ഥിരം പ്രതിനിധി ഡോ. അബ്ദുൽ അസീസ് അൽവാസിൽ പറഞ്ഞു. യെമനിലെ നിലവിലെ സ്ഥിതിഗതികൾ വിശകലനം ചെയ്യാൻ ചേർന്ന രക്ഷാസമിതി സെഷനിൽ സംസാരിക്കുകയായിരുന്നു അദ്ദേഹം.
ഹൂത്തികൾ നടത്തുന്ന ആക്രമണങ്ങൾ യെമനും മേഖലയ്ക്കും അപ്പുറത്തേക്ക് വ്യാപിക്കുന്ന ഭീഷണിയാണെന്നും ഇത് ആഗോള വ്യാപാരത്തെയും വിതരണ ശൃംഖലകളെയും ബാധിക്കുമെന്നും അൽവാസിൽ ചൂണ്ടിക്കാട്ടി. നിർബന്ധിത നാടുകടത്തൽ, പട്ടിണിക്കിടൽ, സ്ത്രീകളെ ഭയപ്പെടുത്തൽ, കുട്ടികളെ യുദ്ധമുന്നണിയിലേക്ക് റിക്രൂട്ട് ചെയ്യൽ എന്നിവയിലൂടെ ഹൂത്തികൾ യെമൻ ജനതയെത്തന്നെയാണ് ലക്ഷ്യമിടുന്നത്.
സെപ്റ്റംബർ, ഒക്ടോബർ മാസങ്ങളിൽ സൗദിയിലെ അബഹ ഖമീസ് മുശൈത്ത്, ജിസാൻ, നജ്‌റാൻ, റിയാദ് നഗരങ്ങളെയും മക്ക, മദീന തൈബ പവർ സ്റ്റേഷൻ എന്നിവിടങ്ങളെയും ലക്ഷ്യമിട്ട് ഹൂത്തികൾ ഡ്രോൺ-മിസൈൽ ആക്രമണങ്ങൾ നടത്തി. ഒക്ടോബർ 6, 7 തീയതികളിൽ അബഹ, കിംഗ് ഖാലിദ് വിമാനത്താവളങ്ങൾക്ക് നേരെയുണ്ടായ ആക്രമണത്തിൽ മൂന്ന് പേർ കൊല്ലപ്പെടുകയും ഡസൻ കണക്കിന് ആളുകൾക്ക് പരിക്കേൽക്കുകയും ചെയ്തു. ചെങ്കടലിലെ കപ്പലുകൾക്ക് നേരെ നടക്കുന്ന ആക്രമണങ്ങൾ ആഗോള ഊർജ വിതരണ സുരക്ഷയ്ക്കും ഭീഷണിയാണെന്ന് അദ്ദേഹം കൂട്ടിച്ചേർത്തു.
ഐക്യരാഷ്ട്രസഭയുടെ ചാർട്ടറിനും അന്താരാഷ്ട്ര നിയമത്തിനും അനുസൃതമായി, രാജ്യത്തിന്റെ പരമാധികാരവും പൗരന്മാരുടെയും പ്രവാസികളുടെയും സുരക്ഷയും സംരക്ഷിക്കാൻ ആവശ്യമായ എല്ലാ നടപടികളും സ്വീകരിക്കാൻ സൗദി അറേബ്യയ്ക്ക് അവകാശമുണ്ട്. യു.എൻ പ്രതിനിധി സമർപ്പിച്ച പദ്ധതി യെമൻ സർക്കാർ അംഗീകരിച്ചപ്പോൾ ഹൂത്തികൾ അത് നിരസിക്കുകയാണുണ്ടായത്. ഹൂത്തി ഭീകരരിൽ നിന്ന് രാജ്യത്തെയും സ്ഥാപനങ്ങളെയും പുനഃസ്ഥാപിക്കാനുള്ള യെമൻ ജനതയുടെ ശ്രമങ്ങൾക്ക് സൗദിയുടെ പൂർണ്ണ പിന്തുണയുണ്ടാകും. 2012 മുതൽ 2026 വരെയുള്ള കാലയളവിൽ യെമന് 1,260 കോടി ഡോളറിന്റെ സാമ്പത്തിക-വികസന സഹായവും 450 കോടിയിലധികം ഡോളറിന്റെ മാനുഷിക സഹായവും സൗദി അറേബ്യ നൽകിയിട്ടുണ്ടെന്നും പ്രതിനിധി പ്രസ്താവിച്ചു.
ഏറ്റവും പുതിയ വാർത്തകൾ വാട്സാപ്പിൽ ലഭിക്കാൻ Join Our WhatsApp Group