പൈലറ്റ് സ്മിത്ത് മച്ചാറിന്റെ ആരോഗ്യനിലയിൽ പുരോഗതി; രോഗമുക്തിക്കായി പ്രാർഥിച്ചവർക്ക് നന്ദി പറഞ്ഞ് ഇന്ത്യൻ എംബസി

അബുദാബി: സഹപൈലറ്റിന്റെ അക്രമത്തിന് ഇരയായി ഗുരുതരമായി പരുക്കേറ്റ ഫ്ലൈ ദുബായ് വിമാനത്തിൻ്റെ പൈലറ്റ് ക്യാപ്റ്റൻ സ്മിത്ത് മച്ഛാറിന്റെ ആരോഗ്യനിലയിൽ തൃപ്തികരമായ പുരോഗതിയുണ്ടെന്ന് അബുദാബിയിലെ ഇന്ത്യൻ എംബസി അറിയിച്ചു. സമൂഹമാധ്യമമായ എക്സിലൂടെയാണ് ക്യാപ്റ്റൻ സ്മിതിന്റെ ആരോഗ്യം വീണ്ടെടുക്കുന്നതിൽ കാര്യമായ പുരോഗതിയുണ്ടെന്ന് എംബസി അധികൃതർ വ്യക്തമാക്കിയത്.

അദ്ദേഹത്തിന്റെ കുടുംബവുമായും ഡോക്ടർമാരുമായും പ്രാദേശിക അധികൃതരുമായും എംബസി നിരന്തരം ബന്ധപ്പെടുന്നുണ്ടെന്നും സാധ്യമായ എല്ലാ സഹായങ്ങളും നൽകുന്നുണ്ടെന്നും അറിയിച്ചു. സ്മിതിന്റെ വേഗത്തിലുള്ള രോഗമുക്തിക്കായി പ്രാർത്ഥിച്ച എല്ലാവർക്കും എംബസി നന്ദി രേഖപ്പെടുത്തി.
സെപ്റ്റംബർ 30 നാണ് ദുബായിൽ നിന്നും ടെൽ അവീവിലേക്ക് പോയ ഫ്ലൈ ദുബായ് വിമാനത്തിലെ കോക്പിറ്റൽ സഹ പൈലറ്റിൻ്റെ ആക്രമണത്തിൽ സ്മിതിന് ഗുരുതരമായി പരിക്കേറ്റത്.