ഹൂത്തികൾക്കെതിരെ പോരാട്ടം; സൗദി സൈന്യത്തിന് ആത്മബലമേകി ഗ്രാൻഡ് മുഫ്തി- രാജ്യത്തെ സംരക്ഷിക്കാൻ ജീവൻ ബലി നൽകാനും തയ്യാറായിരിക്കുക

റിയാദ്- യമനിലെ ഹൂത്തി വിമതർ സൗദി അറേബ്യക്ക് നേരെയുള്ള ആക്രമണങ്ങൾ തുടരുന്നതിനിടെ ഹൂത്തികൾക്കെതിരെ ആഹ്വാനവുമായി സൗദി അറേബ്യ ഗ്രാൻഡ് മുഫ്തി ശൈഖ് സ്വാലിഹ് ബിൻ ഫൗസാൻ അൽ ഫൗസാൻ. ഹൂത്തികൾക്കെതിരെ പോരാടുന്ന സൗദി സൈന്യത്തോടും സഖ്യകക്ഷികളോടും അതിർത്തികളിൽ ജാഗ്രത പാലിക്കാനും ആവശ്യമായെങ്കിൽ ജീവത്യാഗത്തിന് പോലും സന്നദ്ധരാകാനും അദ്ദേഹം ആഹ്വാനം ചെയ്തു.

രാജ്യത്തിന്റെ അതിർത്തികൾ കാക്കുന്നതും രാജ്യത്തിന്റെ ഒരു ഇഞ്ച് മണ്ണ് പോലും തൊടാൻ ആരെയും അനുവദിക്കാതെ സംരക്ഷിക്കുന്നതും വലിയ പുണ്യപ്രവർത്തിയാണ്. മുൻനിരയിലുള്ള സൈനികർ തങ്ങളുടെ കമാൻഡർമാരുടെ ഉത്തരവുകൾ കൃത്യമായി അനുസരിക്കണമെന്നും അദ്ദേഹം ആവശ്യപ്പെട്ടു.
ഭൂമിയിൽ അഴിമതിയും നാശവും വിതയ്ക്കുന്ന, ജനങ്ങളെ ഭിന്നിപ്പിക്കുന്ന, മുസ്ലിംകളുടെ വിശുദ്ധ സ്ഥലങ്ങൾക്കെതിരെ തിന്മ ആസൂത്രണം ചെയ്യുന്ന ഒരു ശത്രുവിനോടാണ് സൈന്യം പോരാടുന്നതെന്ന് അദ്ദേഹം കൂട്ടിച്ചേർത്തു.
സൗദിയുടെ പിന്തുണയുള്ള യമനിലെ ഔദ്യോഗിക സർക്കാരിന്റെ അധികാരം രാജ്യം മുഴുവൻ പുനഃസ്ഥാപിക്കുക എന്നത് ഏറ്റവും അടിയന്തരമായ ബാധ്യതയാണെന്ന് അദ്ദേഹം വ്യക്തമാക്കി. ഹൂത്തികൾ സമീപ ആഴ്ചകളിൽ സൗദി അറേബ്യക്ക് നേരെ മിസൈൽ-ഡ്രോൺ ആക്രമണങ്ങൾ ശക്തമാക്കിയ സാഹചര്യത്തിലാണ് ഗ്രാൻഡ് മുഫ്തിയുടെ പ്രസ്താവന.