വാഷിംഗ്ടൺ: അമേരിക്കൻ വൻകരയിൽ ആവേശം വാനോളമുയർത്തി ലോകകപ്പ് ഫുട്ബോൾ ടൂർണമെന്റ് നോക്കൗട്ട് ഘട്ടത്തിലേക്ക് കടക്കുന്നു. ഗ്രൂപ്പ് ഘട്ടത്തിലെ കടുത്ത പോരാട്ടങ്ങൾക്കൊടുവിൽ യോഗ്യത നേടിയ മികച്ച 32 ടീമുകളുടെ ഫിക്സ്ചർ സംഘാടകർ പുറത്തുവിട്ടു. ഇന്ന് മുതൽ തന്നെ ഈ ജീവനമരണ പോരാട്ടങ്ങൾക്ക് പന്തുരുളും. അമേരിക്കയിലെ പ്രമുഖ സ്റ്റേഡിയങ്ങളെല്ലാം ഇനി വരാനിരിക്കുന്ന കടുത്ത പോരാട്ടങ്ങളെ വരവേൽക്കാൻ പൂർണ്ണ സജ്ജമാണ്.
ഫുട്ബോൾ ലോകത്തെ വൻശക്തികളെല്ലാം അടുത്ത ഘട്ടത്തിലേക്ക് യോഗ്യത ഉറപ്പാക്കിയതോടെ പ്രവചനാതീതമായ മത്സരങ്ങളാണ് ആരാധകരെ കാത്തിരിക്കുന്നത്. മുൻ ചാമ്പ്യന്മാരായ ബ്രസീലിന് ഏഷ്യൻ കരുത്തരായ ജപ്പാനാണ് റൗണ്ട് ഓഫ് 32-ൽ എതിരാളികൾ. വിട്ടുകൊടുക്കാത്ത പോരാട്ടവീര്യമുള്ള ജപ്പാൻ ബ്രസീലിയൻ നിരയ്ക്ക് കടുത്ത പരീക്ഷണമായിരിക്കുമെന്നാണ് വിലയിരുത്തൽ. യൂറോപ്യൻ വൻശക്തികളായ പോർച്ചുഗലും ക്രോയേഷ്യയും തമ്മിലുള്ള നേർക്കുനേർ പോരാട്ടമാണ് ഈ റൗണ്ടിലെ ഏറ്റവും ശ്രദ്ധേയമായ മറ്റൊരു മത്സരം.
മറ്റ് പ്രധാന മത്സരങ്ങളിൽ ജർമ്മനി പരാഗ്വെയെയും, ഫ്രാൻസ് സ്വീഡനെയും നേരിടും. ലയണൽ മെസ്സിയുടെ അർജന്റീനയ്ക്ക് കേപ് വെർദെയാണ് എതിരാളികൾ. സ്പെയിൻ ഓസ്ട്രിയയുമായും, ഇംഗ്ലണ്ട് ഡി.ആർ കോംഗോയുമായും മാറ്റുരയ്ക്കും. ആതിഥേയരായ അമേരിക്ക ബോസ്നിയ ഹെർസഗോവിനയെ നേരിടുമ്പോൾ അയൽക്കാരായ മെക്സിക്കോയ്ക്ക് ഇക്വഡോറാണ് എതിരാളികൾ.
നെതർലൻഡ്സ് – മൊറോക്കോ, ബെൽജിയം – സെനഗൽ, ദക്ഷിണാഫ്രിക്ക – കാനഡ, ഐവറി കോസ്റ്റ് – നോർവേ, ഓസ്ട്രേലിയ – ഈജിപ്ത്, സ്വിറ്റ്സർലൻഡ് – അൾജീരിയ, കൊളംബിയ – ഘാന എന്നിവയാണ് ഈ റൗണ്ടിലെ മറ്റ് ആവേശകരമായ മത്സരങ്ങൾ. ഗ്രൂപ്പ് ഘട്ടത്തിൽ പിഴവുകൾ തിരുത്താൻ അവസരമുണ്ടായിരുന്നെങ്കിൽ, നോക്കൗട്ട് ഘട്ടത്തിൽ ഒരു ചെറിയ അശ്രദ്ധ പോലും ടൂർണമെന്റിൽ നിന്നുള്ള പുറത്താകലിന് കാരണമാകും. അതുകൊണ്ടുതന്നെ തന്ത്രങ്ങളും പ്രത്യാക്രമണങ്ങളും നിറഞ്ഞ ഫുട്ബോൾ വിരുന്നാകും അമേരിക്കയിൽ ഇനി കാണാൻ കഴിയുക. ഇന്ന് മുതൽ ആരംഭിക്കുന്ന ഈ ഫുട്ബോൾ മാമാങ്കത്തിന്റെ ആവേശത്തിലാണ് ലോകമെമ്പാടുമുള്ള കായികപ്രേമികൾ.