ഇറാനിൽ പ്രമുഖരുടെ ആസ്തികൾ കണ്ടുകെട്ടി; കായിക താരങ്ങളും സിനിമാക്കാരും പട്ടികയിൽ

​ടെഹ്‌റാൻ– രാജ്യത്തിന്റെ സുരക്ഷയ്ക്കും സ്ഥിരതയ്ക്കും ഭീഷണിയാകുന്ന വിധത്തിൽ വിദേശ ഇന്റലിജൻസ് ഏജൻസികളുമായും പ്രതിപക്ഷ ശൃംഖലകളുമായും സഹകരിച്ച 63 പ്രമുഖരുടെ ആസ്തികൾ ഇറാൻ ജുഡീഷ്യറി കണ്ടുകെട്ടി. രാജ്യത്തെ പ്രശസ്തരായ ചലച്ചിത്ര താരങ്ങൾ, കായിക പ്രതിഭകൾ, മാധ്യമ പ്രവർത്തകർ എന്നിവരാണ് ഈ നടപടിക്ക് വിധേയരായവരിലധികവും. വിദേശ രാജ്യങ്ങളിൽ ഇരുന്ന് ഇറാൻ വിരുദ്ധ പ്രവർത്തനങ്ങൾക്ക് നേതൃത്വം നൽകുന്ന മാധ്യമ ശൃംഖലകളുമായി ഇവർക്ക് അടുത്ത ബന്ധമുണ്ടെന്ന് ജുഡീഷ്യറി കണ്ടെത്തി. ശത്രുരാജ്യങ്ങളെ സഹായിക്കുന്ന രീതിയിലുള്ള ഇടപെടലുകൾ നടത്തിയതിനും സൈബർ ഇടങ്ങളിലൂടെ രാജ്യത്തിനെതിരെ പ്രചാരണം നടത്തിയതിനുമാണ് നടപടി.
​
ബാങ്ക് അക്കൗണ്ടുകൾ മരവിപ്പിക്കുന്നത് ഉൾപ്പെടെയുള്ള കർശനമായ നീക്കങ്ങളാണ് അധികൃതർ സ്വീകരിച്ചിരിക്കുന്നത്. രാജ്യ സുരക്ഷ മുൻനിർത്തി വിദേശ ബന്ധമുള്ള ഇത്തരം പ്രവർത്തനങ്ങൾക്കെതിരെ വിട്ടുവീഴ്ചയില്ലാത്ത നടപടികൾ തുടരുമെന്ന് ടെഹ്‌റാൻ പ്രോസിക്യൂട്ടർ അറിയിച്ചു. യുഎസ്-ഇസ്രായേൽ സംഘർഷം നിലനിൽക്കുന്ന പശ്ചാത്തലത്തിൽ ആഭ്യന്തര സുരക്ഷ ശക്തമാക്കുന്നതിന്റെ ഭാഗമായാണ് ഈ നടപടിയെന്നാണ് വിലയിരുത്തപ്പെടുന്നത്.