തെക്കൻ ഇറാനിൽ ശക്തമായ ഭൂചലനം; പ്രകമ്പനം ഖത്തറിലും അനുഭവപ്പെട്ടു

ദോഹ– തെക്കൻ ഇറാനിൽ ശക്തമായ ഭൂചലനം അനുഭവപ്പെട്ടതായി റിപ്പോർട്ട്. ഇന്ന് രാവിലെ പ്രാദേശിക സമയം 8:11-ഓടെയാണ് ഭൂചലനം രേഖപ്പെടുത്തിയത്. റിക്ടർ സ്കെയിലിൽ 5.73 തീവ്രത രേഖപ്പെടുത്തിയ ഭൂചലനമാണ് ഉണ്ടായതെന്ന് നാഷണൽ സീസ്മിക് മോണിറ്ററിങ് നെറ്റ്‌വർക്കും ജിയോളജിക്കൽ സർവേ അതോറിറ്റിയും റിപ്പോർട്ട് ചെയ്തു.

ഇറാന്റെ തെക്കൻ മേഖലയിലുണ്ടായ ഈ ചലനത്തിന്റെ ആഘാതം അയൽരാജ്യമായ ഖത്തറിലും പ്രകടമായിരുന്നു. ഖത്തറിന്റെ വിവിധ ഭാഗങ്ങളിൽ സെക്കൻഡുകൾ നീണ്ടുനിന്ന പ്രകമ്പനം അനുഭവപ്പെട്ടതായി ജനങ്ങൾ സാക്ഷ്യപ്പെടുത്തി. പെട്ടെന്നുണ്ടായ ചലനത്തിൽ ജനങ്ങൾക്കിടയിൽ നേരിയ പരിഭ്രാന്തി പടർന്നെങ്കിലും, ഖത്തറിലോ ഇറാനിലോ നിലവിൽ നാശനഷ്ടങ്ങളോ ജീവാപായമോ റിപ്പോർട്ട് ചെയ്യപ്പെട്ടിട്ടില്ല. സ്ഥിതിഗതികൾ അധികൃതർ നിരീക്ഷിച്ചുവരികയാണ്.