തെഹ്‌റാന്‍ – ഇറാന്‍ തലസ്ഥാനമായ തെഹ്റാനിലെ കമാന്‍ഡ് കെട്ടിടം ലക്ഷ്യമിട്ട് ഇസ്രായില്‍ നടത്തിയ വ്യോമാക്രമണത്തില്‍ ഇറാന്‍ സായുധ സേനാ ചീഫ് ഓഫ് സ്റ്റാഫ് മേജര്‍ ജനറല്‍ മുഹമ്മദ് ഹുസൈന്‍ ബാഖിരി കൊല്ലപ്പെട്ടതായി ഇറാന്‍ ടി.വിയും ഇറാന്‍ റെവല്യൂഷണറി ഗാര്‍ഡിനോട് അടുപ്പമുള്ള ഫാര്‍സ് ന്യൂസ് ഏജന്‍സിയും സ്ഥിരീകരിച്ചു. ഇസ്രായില്‍ ആക്രമണത്തില്‍ ഇറാന്‍ പരമോന്നത നേതാവ് ആയതുല്ല അലി ഖാംനഇയുടെ ഉപദേഷ്ടാവായ അലി ശംഖാനി ഗുരുതരമായി പരിക്കേറ്റ് മരിച്ചതായി ന്യൂയോര്‍ക്ക് ടൈംസ് റിപ്പോര്‍ട്ട് ചെയ്തു. അലി ശംഖാനിക്ക് ഗുരുതരമായി ഇറാന്‍ വൃത്തങ്ങള്‍ നേരത്തെ അറിയിച്ചിരുന്നു.
ഇസ്രായില്‍ ആക്രമണങ്ങളില്‍ ആറ് ആണവ ശാസ്ത്രജ്ഞര്‍ കൊല്ലപ്പെട്ടതായി ഇറാനിലെ പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു. അബ്ദുല്‍ഹമീദ് മിനുശഹര്‍, അഹ്മദ് റിസ ദുല്‍ഫുഖാരി, അമീര്‍ ഹുസൈന്‍ ഫഖിഹി, മുത്‌ലബി സാദ, മുഹമ്മദ് മഹ്ദി തഹ്റാന്‍ജി, ഫെറൈദൂന്‍ അബ്ബാസി എന്നിവരാണ് ഇസ്രായിലി ആക്രമണത്തില്‍ രക്തസാക്ഷികളായ ആണവ ശാസ്ത്രജ്ഞര്‍ എന്ന് തസ്‌നീം ന്യൂസ് ഏജന്‍സി റിപ്പോര്‍ട്ട് ചെയ്തു.
ഇസ്രായില്‍ ആക്രമണത്തില്‍ കൊല്ലപ്പെട്ട മേജര്‍ ജനറല്‍ ഹുസൈന്‍ സലാമിയുടെ പിന്‍ഗാമിയായി നിലവിലെ ആഭ്യന്തര മന്ത്രി മേജര്‍ ജനറല്‍ അഹ്മദ് വഹീദിയെ റെവല്യൂഷണറി ഗാര്‍ഡ് കമാന്‍ഡന്‍-ഇന്‍-ചീഫായി നിയമിച്ച് ഇറാന്‍ പരമോന്നത ആത്മീയ നേതാവ് അലി ഖാംനഇ ഉത്തരവ് പുറപ്പെടുവിച്ചു. ഇറാന്‍ സായുധ സേന ചീഫ് ഓഫ് സ്റ്റാഫിന്റെ ചുമതലകള്‍ താല്‍ക്കാലികമായി വഹിക്കാന്‍ അഡ്മിറല്‍ ഹബീബുള്ള സയാരിയെയും അലി ഖാംനഇ നിയമിച്ചു.