തെഹ്‌റാന്‍ – പന്ത്രണ്ടു ദിവസം നീണ്ട ഇറാന്-ഇസ്രായില്‍ യുദ്ധത്തില്‍ ഇറാനില്‍
610 പേര്‍ കൊല്ലപ്പെടുകയും 4,700 ലേറെ പേര്‍ക്ക് പരിക്കേല്‍ക്കുകയും ചെയ്തതായി ഇറാന് ആരോഗ്യ മന്ത്രാലയം പുറത്തിറക്കിയ പുതിയ കണക്കുകള്‍ വ്യക്തമാക്കുന്നു. കഴിഞ്ഞ 12 ദിവസത്തിനിടെ ആശുപത്രികളില്‍ ഭയാനകമായ കാഴ്ചകള്‍ നിറഞ്ഞതായി മന്ത്രാലയ വക്താവ് ഹുസൈന്‍ കെര്‍മന്‍പൂര്‍ ട്വിറ്ററില്‍ എഴുതി.
സാധാരണക്കാരുടെ മരണവുമായി ബന്ധപ്പെട്ട കണക്കുകള്‍ മാത്രമാണിത്. യുദ്ധത്തില്‍ കൊല്ലപ്പെട്ട സുരക്ഷാ സൈനികരെയും സൈനിക മേധാവികളെയും ഈ കണക്കില്‍ ഉള്‍പ്പെടുത്തിയിട്ടില്ല. കൊല്ലപ്പെട്ടവരില്‍ 13 കുട്ടികളും ഉള്‍പ്പെടുന്നു. ഇക്കൂട്ടത്തില്‍ ഏറ്റവും ഇളയ കുട്ടിക്ക് രണ്ട് മാസം മാത്രമാണ് പ്രായം. അഞ്ച് ഡോക്ടര്‍മാരും പാരാമെഡിക്കുകളും കൊല്ലപ്പെട്ടവരുടെ കൂട്ടത്തിലുണ്ടെന്നും ആരോഗ്യ മന്ത്രാലയം അറിയിച്ചു.
ഇസ്രായില്‍ ആക്രമണങ്ങളില്‍ ഏഴ് ആശുപത്രികളും ഒമ്പത് ആംബുലന്‍സുകളും തകര്‍ന്നതായും ആരോഗ്യ മന്ത്രാലയം റിപ്പോര്‍ട്ട് ചെയ്തു. ചീഫ് ഓഫ് സ്റ്റാഫും റെവല്യൂഷനറി ഗാര്‍ഡ് കമാന്‍ഡറും ഉള്‍പ്പെടെ നിരവധി ഉന്നത സൈനിക നേതാക്കള്‍ ഇസ്രായില്‍ ആക്രമണത്തിന്റെ ആദ്യ ദിവസം തന്നെ ഇറാന് നഷ്ടപ്പെട്ടു. ആണവ പദ്ധതി വികസിപ്പിക്കാന്‍ ഇറാന് ആശ്രയിച്ചിരുന്ന നിരവധി മുതിര്‍ന്ന ആണവ ശാസ്ത്രജ്ഞരും കൊല്ലപ്പെട്ടു. ഇറാനുമായുള്ള യുദ്ധത്തില്‍ ഇസ്രായിലില്‍ 28 പേര്‍ കൊല്ലപ്പെടുകയും 1,300 ലേറെ പേര്‍ക്ക് പരിക്കേല്‍ക്കുകയും ചെയ്തതായി ഇസ്രായിലി ആംബുലന്‍സ് സര്‍വീസ് അറിയിച്ചു.