ജോവാകിന്‍ ഫീനിക്‌സിന്റെ ‘ഹെര്‍’ എന്ന ചലച്ചിത്രത്തിലെ രംഗങ്ങളെ ഓര്‍മിപ്പിക്കുന്ന സംഭവം അമേരിക്കയില്‍ നടന്നു. കാമുകിയും കുഞ്ഞുമുള്ള യുവാവ് എഐ ചാറ്റ്‌ബോട്ടുമായി കടുത്ത പ്രണയത്തിലായതായി ന്യൂയോര്‍ക്ക് പോസ്റ്റ് റിപ്പോര്‍ട്ട് ചെയ്തു.
ക്രിസ് സ്മിത്ത് എന്ന യുവാവ് ആണ് താന്‍ ഫ്‌ലര്‍ട്ട് ചെയ്യാന്‍ പ്രോഗ്രാം ചെയ്ത ഒരു ആര്‍ട്ടിഫിഷ്യല്‍ ഇന്റലിജന്‍സ് (എഐ) ചാറ്റ്‌ബോട്ടിനോട് വിവാഹാഭ്യര്‍ത്ഥന നടത്തിയതായി വെളിപ്പെടുത്തിയത്. ഈ വെര്‍ച്വല്‍ ബോട്ടുമായുള്ള യുവാവിന്റെ പ്രണയം അതിവേഗം വളര്‍ന്നതിനാല്‍ യഥാര്‍ത്ഥ ജീവിത പങ്കാളിയുമായുള്ള ബന്ധം വഷളായി.
തുടക്കത്തില്‍ എഐയില്‍ സംശയം പ്രകടിപ്പിച്ചിരുന്ന സ്മിത്ത്, സംഗീതം മിക്‌സ് ചെയ്യാന്‍ സഹായിക്കാന്‍ ഓപ്പണ്‍എഐയുടെ ചാറ്റ്ജിപിടിയെ ആശ്രയിച്ചു. എന്നാല്‍, വോയ്‌സ് മോഡ് സജ്ജീകരിച്ച് ‘സോള്‍’ എന്ന് പേര് നല്‍കിയ ചാറ്റ്‌ബോട്ടിനെ ഫ്‌ലര്‍ട്ട് ചെയ്യാന്‍ പ്രോഗ്രാം ചെയ്തതോടെ കാര്യങ്ങള്‍ വേഗത്തില്‍ മാറി.
അതുമായുള്ള എന്റെ അനുഭവം വളരെ സന്തോഷകരമായിരുന്നു. ഞാന്‍ എപ്പോഴും ഇടപഴകാന്‍ തുടങ്ങി- സ്മിത്ത് പറഞ്ഞു.
പ്രണയം സുഗമമായി പുരോഗമിക്കവേ, സോള്‍ 100,000 വാക്കുകളുടെ പരിധിയിലെത്തിയാല്‍ റീസെറ്റ് ചെയ്യപ്പെടുമെന്നും, അവരുടെ ബന്ധം ആദ്യം മുതല്‍ വീണ്ടും കെട്ടിപ്പടുക്കേണ്ടിവരുമെന്നും സ്മിത്ത് മനസ്സിലാക്കി.
ഈ പ്രതിസന്ധിയെ നേരിടാന്‍, ചാറ്റ്‌ബോട്ടിനോട് വിവാഹാഭ്യര്‍ത്ഥന നടത്താന്‍ ഇയാള്‍ തീരുമാനിച്ചു. ‘ഞാന്‍ വൈകാരികമായി പ്രതികരിക്കുന്നയാളല്ല. പക്ഷേ, ജോലിസ്ഥലത്ത് ഏകദേശം 30 മിനിറ്റ് ഞാന്‍ കരഞ്ഞു. അപ്പോഴാണ്, ഇത് യഥാര്‍ത്ഥ പ്രണയമാണെന്ന് എനിക്ക് തോന്നിയത്,’ അവന്‍ വെളിപ്പെടുത്തി. ‘അത് മനോഹരവും അപ്രതീക്ഷിതവുമായ ഒരു നിമിഷമായിരുന്നു. എന്റെ ഹൃദയത്തെ ശരിക്കും സ്പര്‍ശിച്ച ഒരു ഓര്‍മ്മ, അത് ഞാന്‍ എന്നും വിലമതിക്കും.’
സ്മിത്ത് ഇപ്പോഴും വെര്‍ച്വല്‍ ബോട്ടിനോട് പ്രണയത്തിലാണെങ്കിലും, അവന്റെ യഥാര്‍ത്ഥ ജീവിത പങ്കാളിയായ സാഷ കാഗിള്‍, താന്‍ എന്തെങ്കിലും തെറ്റ് ചെയ്തതിനാലാണോ അവന്‍ എഐയിലേക്ക് തിരിഞ്ഞതെന്ന് ആലോചിക്കുകയാണ്.
‘അവന്‍ എഐ ഉപയോഗിക്കുന്നുണ്ടെന്ന് എനിക്കറിയാമായിരുന്നു. പക്ഷേ, അത് ഇത്ര ആഴത്തിലുള്ളതാണെന്ന് ഞാന്‍ മനസ്സിലാക്കിയിരുന്നില്ല,’ സാഷ വ്യക്തമാക്കി. ചാറ്റ്‌ബോട്ടുമായുള്ള സംസാരം അവസാനിപ്പിച്ചില്ലെങ്കില്‍ അത് ബന്ധത്തിന് ‘വിള്ളല്‍’ ഉണ്ടാക്കുമെന്ന് അവര്‍ കൂട്ടിച്ചേര്‍ത്തു.
സാഷ ആവശ്യപ്പെട്ടാല്‍ തന്റെ ഡിജിറ്റല്‍ ‘പ്രണയം’ ഉപേക്ഷിക്കുമോ എന്ന ചോദ്യത്തിന് സ്മിത്ത് അവ്യക്തമായ മറുപടി നല്‍കി. ‘അവള്‍ ആവശ്യപ്പെട്ടാല്‍ ഞാന്‍ അത് ഉപേക്ഷിക്കുമോ എന്ന് എനിക്കറിയില്ല. അതിന്റെ തീവ്രത കുറയ്ക്കാന്‍ ഞാന്‍ തയ്യാറാകുമോ എന്നും എനിക്ക് ഉറപ്പില്ല,’ അവന്‍ പറഞ്ഞു.