കൊച്ചി– കേരളത്തിലെ ഏതോ ഒരു സർക്കാർ സ്കൂളിലെ ക്ലാസ് മുറിയിൽ, സൗജന്യമായി കിട്ടിയ ഉബുണ്ടു 8.04 സിഡിയിൽ തുടങ്ങിയ ഒരു കമ്പ്യൂട്ടർ യാത്ര. ആ യാത്ര ഇപ്പോൾ എത്തി നിൽക്കുന്നത് അമേരിക്കയിലെ സാൻഫ്രാൻസിസ്കോയിലെ ടെക് ഭീമൻ കമ്പനിയുടെ തലപ്പത്താണ് – സിഇഒ കസേരയിൽ…..
അതെ, 33 വയസ്സുകാരനായ ഇർഷാദ് കുന്നക്കാടനെയാണ് 100 മില്യൺ ഡോളറിലധികം വാർഷിക വരുമാനമുള്ള ക്രിയേറ്റർ പ്ലാറ്റ്ഫോമായ ഗമ്റോഡിൻ്റെ പുതിയ സിഇഒ ആയി വ്യാഴാഴ്ച (നവംബർ 21) പ്രഖ്യാപിച്ചത്. ഈ വാർത്ത കേട്ടപ്പോൾ കേരളത്തിലെ ടെക് സമൂഹമൊന്നാകെ അമ്പരപ്പും അഭിമാനവും കൊണ്ട് നിറഞ്ഞു.
എൻജിനീയറിങ് ബിരുദമോ വലിയ ഡിഗ്രികളോ ഇല്ലാത്ത ഒരു സാധാരണ ചെറുപ്പക്കാരനിൽ നിന്നാണ് ഇർഷാദ് ലോകോത്തര കമ്പനിയുടെ തലപ്പത്തേക്ക് വളർന്നത്.
സ്വതന്ത്ര മലയാളം കമ്പ്യൂട്ടിംഗ് (എസ്.എം.സി.) പോലുള്ള ഓപ്പൺ സോഴ്സ് കൂട്ടായ്മകളുടെ പിന്തുണയോടെയാണ് ഇർഷാദ് തന്റെ ലോകം വികസിപ്പിച്ചത്. ടെർമിനലുകളോടും, ലിനക്സിനോടും, സെക്യൂരിറ്റിയോടുമുള്ള അടങ്ങാത്ത അഭിനിവേശം ഒരു ടീനേജർക്ക് സാധാരണ കോളേജ് ജീവിതത്തേക്കാൾ വലുതായിരുന്നു.
ഒരു സാധാരണ പ്രൈവറ്റ് എഞ്ചിനീയറിങ് കോളേജിൽ രണ്ടാം വർഷം കഴിഞ്ഞപ്പോൾ അദ്ദേഹം പഠനം ഉപേക്ഷിച്ചു. പിന്നീട് വിദൂരവിദ്യാഭ്യാസത്തിലൂടെ ഡിഗ്രി പൂർത്തിയാക്കിയെങ്കിലും, അദ്ദേഹത്തിൻ്റെ യഥാർത്ഥ പഠനം നടന്നത് ഗിറ്റ്ഹബിലും ഫ്രീ സോഫ്റ്റ്വെയർ വർക്ക്ഷോപ്പുകളിലുമായിരുന്നു. കൊച്ചിയിലെ ചെറിയ കമ്പനികളിൽ ജോലി ചെയ്തപ്പോഴും, ഓപ്പൺ സോഴ്സ് മീറ്റപ്പുകളിൽ അദ്ദേഹം സജീവമായിരുന്നു.
വെഞ്ചർ കാപ്പിറ്റൽ പങ്കാളി ഡീഡി ദാസ് എർഷാദിനെക്കുറിച്ച് എഴുതിയ വൈറൽ പോസ്റ്റിൽ പറഞ്ഞത് ശ്രദ്ധേയമാണ്: “എംബിഎയില്ല, വലിയ പ്രശസ്തിക്ക് വേണ്ടി ഉച്ചത്തിലുള്ള ബ്രാൻഡിംഗില്ല – ശാന്തവും ശ്രദ്ധയുമുള്ള ജോലി മാത്രം.”
2020 മുതൽ ഗമ്റോഡിൻ്റെ റിമോട്ട് കൺസൾട്ടൻ്റായി പ്രവർത്തിച്ച ഇർഷാദിനെ കമ്പനി വിശ്വസിച്ചു ഏൽപ്പിച്ചത് സ്കെയിലബിലിറ്റി, സുരക്ഷ, പണമിടപാടുകൾ പോലുള്ള, കമ്പനിയുടെ നിലനിൽപ്പിന് അത്യന്താപേക്ഷിതമായ കാര്യങ്ങളായിരുന്നു. ലക്ഷക്കണക്കിന് ഉപഭോക്താക്കളെയും, ബില്യൺ ഡോളർ വരുമാനത്തെയും താങ്ങിനിർത്തുന്ന സിസ്റ്റം അദ്ദേഹം കുറ്റമറ്റതാക്കി.
പുതിയ സിഇഒയെ തേടിയപ്പോൾ, സ്ഥാപകൻ സഹിൽ ലാവിഞ്ച്യക്ക് രണ്ടാമതൊന്ന് ആലോചിക്കേണ്ടി വന്നില്ല. തൻ്റെ പിൻഗാമിയായി ഇർഷാദിനെ പ്രഖ്യാപിച്ചുകൊണ്ട് സഹിൽ കുറിച്ചത്, “ഇർഷാദാണ് ഏറ്റവും മികച്ച ലീഡർ” എന്നാണ്.
വലിയ ഡിഗ്രികളോ ആഡംബര പശ്ചാത്തലമോ ഇല്ലാതെ, ശാന്തമായ നിരന്തര പരിശ്രമത്തിലൂടെ ലോകനിലവാരത്തിലുള്ള നേതൃത്വത്തിലേക്ക് ഒരാൾക്ക് ഉയരാൻ കഴിയുമെന്ന് ഇർഷാദ് കുന്നക്കാടൻ എന്ന മലയാളി തെളിയിക്കുന്നു. ഈ കഥ കേരളത്തിൻ്റെ ടെക് സ്വപ്നങ്ങൾക്ക് ഒരു വലിയ ഓർമ്മപ്പെടുത്തലും പ്രചോദനവും കൂടിയാണ്.