റിയാദ്: ജനുവരി ട്രാന്‍സ്ഫറില്‍ അല്‍ നസര്‍ റിലീസ് ചെയ്ത അന്‍ഡേഴ്‌സണ്‍ ടലിസ്‌കക്ക് പകരം ടീമിലെത്തുക ആസ്റ്റണ്‍ വില്ലയുടെ കൊളംബിയന്‍ താരം ജോണ്‍ ഡുറാന്‍. 77 മില്ല്യണ്‍ യൂറോയ്ക്കാണ് ജോണ്‍ ഡുറാന്‍ അല്‍ നസറില്‍ എത്തുന്നത്. ടീമിന്റെ മുന്നേറ്റ നിരയുടെ കരുത്ത് വര്‍ധിപ്പിക്കുന്നതിന് വേണ്ടിയാണ് പുതിയ വിദേശ താരത്തെ അല്‍ നസര്‍ ടീമിലെത്തിക്കുന്നത്.
നേരത്തെ അല്‍ നസര്‍ ജര്‍മ്മന്‍ ക്ലബ്ബായ ബയേര്‍ ലെവര്‍ക്യൂസന് വേണ്ടി കളിക്കുന്ന നൈജീരിയന്‍ മുന്നേറ്റ താരം വിക്ടര്‍ ബോണിഫേസിനെ സ്വന്തമാക്കാനുള്ള ശ്രമത്തിലായിരുന്നു. എന്നാല്‍ നൈജീരിയന്‍ താരമായ ബോണിഫേസിന്റെ ഡീല്‍ നടക്കാതെ പോവുകയായിരുന്നു. താരത്തിനായി യൂറോപ്പിലെ പ്രമുഖ ക്ലബ്ബുകള്‍ രംഗത്തുണ്ട്. കഴിഞ്ഞ ദിവസമായിരുന്നു ബ്രസീലിയന്‍ താരമായ ടലിസ്‌ക അല്‍ നസര്‍ വിട്ട് തുര്‍ക്കി ക്ലബ്ബായ ഫെനര്‍ബാഷെയിലേക്ക് ചേക്കേറിയത്.
അതേ സമയം 2024-25 സീസണ്‍ സൗദി പ്രോ ലീഗില്‍ നിലവില്‍ നാലാം സ്ഥാനത്താണ് ക്രിസ്റ്റ്യാനോയുടെ ക്ലബ്ബായ അല്‍ നസര്‍ എഫ്‌സി. 17 റൗണ്ട് മത്സരങ്ങള്‍ പൂര്‍ത്തിയാകുമ്പോളാണ് ഇത്. 10 ജയം, അഞ്ച് സമനില, രണ്ട് തോല്‍വി എന്നിങ്ങനെയാണ് ഈ കളികളില്‍ അല്‍ നസര്‍ നേടിയത്. ഒന്നാം സ്ഥാനക്കാരായ അല്‍ ഹിലാലിനേക്കാള്‍ എട്ട് പോയിന്റ് പിന്നിലാണ് അല്‍ നസര്‍.
ചുരുക്കിപ്പറഞ്ഞാല്‍ ലീഗില്‍ ഇനി ഒന്നാം സ്ഥാനത്ത് ഫിനിഷ് ചെയ്യുക അവര്‍ക്ക് ഏറെക്കുറെ അസാധ്യമാണ്. 17 കളികളില്‍ 43 പോയിന്റാണ് ഒന്നാം സ്ഥാനത്തുള്ള അല്‍ ഹിലാലിനുള്ളത്. രണ്ടാം സ്ഥാനത്തുള്ള അല്‍ ഇത്തിഹാദിനും അത്ര തന്നെ പോയിന്റുണ്ട്. 17 കളികളില്‍ 37 പോയിന്റുമായി അല്‍ ഖ്വദിസിയാഹാണ് മൂന്നാമത്.