റിയാദ്: സൗദി പ്രൊ ലീഗില്‍ അല്‍ നസ്‌റിനെ സമനിലയില്‍ പിടിച്ചുകെട്ടി അല്‍ ഹിലാല്‍. മല്‍സരം 1-1 സമനിലയിലാണ് കലാശിച്ചത്. അല്‍ നസ്‌റിനായി തലിസ്‌ക ഗോള്‍ നേടിയപ്പോള്‍ സെര്‍ജി മിലിങ്കോവിചിന്റെ വകയായിരുന്നു അല്‍ ഹിലാലിന്റെ സമനില ഗോള്‍. മത്സരത്തിന്റെ ആദ്യ മിനുട്ടിലായിരുന്നു അല്‍ നസ്‌റിന്റെ ഗോള്‍. ഒട്ടാവിയോയുടെ അസിസ്റ്റില്‍ നിന്നുമായിരുന്നു തലിസ്‌കയുടെ ഗോള്‍ പിറന്നത്.
സമനില ഗോളിനായി അല്‍ ഹിലാല്‍ നിരന്തരം ശ്രമിച്ചു. ഒടുവില്‍ അല്‍ ഹിലാലിന് 77ാം മിനിറ്റില്‍ ലക്ഷ്യം കാണാനായി. അല്‍ ദാസരിയുടെ ബാക്ക് ഹീല്‍ പാസ്സില്‍ നിന്നും റിനാന്‍ ലോദി നല്‍കിയ ക്രോസ് മിലിങ്കോവിച്ച് വലയിലാക്കുകയായിരുന്നു.
കിങ് കപ്പിലെ അവസാന മത്സരത്തില്‍ അല്‍ താവൂനോട് എതിരില്ലാത്ത ഒരു ഗോളിന് അല്‍ നസര്‍ പരാജയപ്പെട്ടിരുന്നു. മത്സരത്തില്‍ സൂപ്പര്‍താരം ക്രിസ്റ്റ്യാനോ റൊണാള്‍ഡോ നിര്‍ണായക പെനാല്‍റ്റി നഷ്ടപ്പെടുത്തിയിരുന്നു. ഇന്നലത്തെ മത്സരത്തിലും ക്രിസ്റ്റ്യാനോക്ക് ഫോം കണ്ടെത്താനായില്ല. പ്രൊ-ലീഗില്‍ ഒമ്പത് കളിയില്‍ 25 പോയിന്റുമായി അല്‍ ഹിലാല്‍ ഒന്നാംസ്ഥാനത്താണുള്ളത്. ഇത്രയും കളിയില്‍ 24 പോയിന്റുമായി അല്‍ ഇത്തിഹാദ് രണ്ടാമതും 19 പോയിന്റുമായി അല്‍ നസ്ര്‍ മൂന്നാമതുമാണ്.