മാഞ്ചസ്റ്റർ സിറ്റിയിലേക്ക് കൂടുമാറി പിഎസ്ജി ഗോൾകീപ്പർ ഡൊണാറുമ്മ

പാരീസ്– ഇറ്റാലിയൻ ഗോൾകീപ്പർ ജിയാൻല്യൂജി ഡൊണാറുമ്മ മാഞ്ചസ്റ്റർ സിറ്റിയിലേക്ക് കൂടുമാറി. താരത്തിന്റെ മെഡിക്കൽ പരിശോധന ഇന്ന് ഉച്ചയ്ക്ക് നടക്കും. ഇരു ക്ലബ്ബുകളും ആഴ്ചകൾക്ക് മുൻപ് തന്നെ ദീർഘകാല കരാറിൽ ധാരണയിലെത്തിയിരുന്നു. എഡേഴ്സൺ ഫെനർബാഷെയിലേക്ക് പോയതിനെ തുടർന്നാണ് ഈ ട്രാൻസ്ഫർ സ്ഥിരീകരിച്ചത്.

റിപ്പോർട്ടുകൾ പ്രകാരം, 35 മില്യൺ യൂറോയും 4 മില്യൺ യൂറോ അധിക ബോണസും ഉൾപ്പെടെ ഏകദേശം 39 മില്യൺ യൂറോയാണ് ഡൊണാറുമ്മയുടെ ട്രാൻസ്ഫർ തുക.

കഴിഞ്ഞ സീസണിൽ പിഎസ്ജിയുടെ ചാമ്പ്യൻസ് ലീഗ് വിജയത്തിൽ നിർണായക പങ്കുവഹിച്ച ഡൊണാറുമ്മ, എഡേഴ്സന്റെ എട്ട് വർഷത്തെ മികവിന് ശേഷം മാഞ്ചസ്റ്റർ സിറ്റിയിൽ പെപ് ഗ്വാർഡിയോളയുടെ ടീമിന്റെ പ്രധാന താരമാകുമെന്ന് പ്രതീക്ഷിക്കപ്പെടുന്നു. ട്രാൻസ്ഫർ ഡെഡ്‌ലൈനിന്റെ അവസാന ദിനത്തിലെ പ്രധാന കൈമാറ്റങ്ങളിൽ ഒന്നായാണ് ഇത് കണക്കാക്കപ്പെടുന്നത്.